Tâm nar rƀŭn, Quân uỷ Trung ương, N’gâng kan neh dak hŏ rnê 35 rmôt ndrel 80 nŭih ntoh lư “Bonh đă blau” bah tahen tâm nkuăl rnoi mpôl đê̆ ndrel gôl yôk năm 2019-2024. Tâm 5 năm ma aơ, Quân uỷ Trung ương, N’gâng kan neh dak, N’gâng kan Chính trị hŏ kơl an rđau, đă ƀư nau tâm rlong “Bonh đă blau” ndâk “rmôt bonh đă blau” tâm ban, ăp ntil, ngăn, nâp, jru, tâm di ma nau ngăn, geh nsum ma nau ƀư nau kan, ăp nau bonh đă bah lam dak, geh âk nau dơi ndrel nau blau ơm...Rgop nau ƀư nâp neh dak, rnă njrăng, nâp nâl lam ƀon lan, mât nau rnơm bah kônh wa ăp rnoi mpôl đê̆ ma Đảng, Ngih dak, tahen; ƀư ân ueh nau kan bah tahen tâm nau kan, pah kan, ƀư ang rup gui “Tahen Wa Hồ” tâm rơh mhe.

            Ntơm năm 2029-2024, ăp rmôt kan tâm lam ntŭk tâm rgop nkoch trêg rlau 250 rbăn nar, đah rlau 20 rkeh tŏ nŭih râng, bonh đă rlau 11 rbăn rnăk, đah 56 rbăn nŭih mô hăn ntrơn du ndrel rlau 20 rbăn kon se hăn nti tay. Hŏ tâm rgop ƀư ntĭm mbơh nau mât neh dak, rnă njrăng ân rlau 18.300 tŏ bu ranh ƀon, kruanh ƀon, nŭih bu rnơm tâm rnoi mpôl đê̆, râng ndâk rmôt dân quân tự vệ, rmôt dự bị động viên bah nkuăl yôk nâp nâl, rklaih ăp nau tât ndal tă tâm dâng, mô ân jêng duh rêng hvi, ntoch jong...

            Thiếu tá quân nhân chuyên nghiệp Nguyễn Thị Thuý, Công ty 723, Binh đoàn 15 (pah kan tâm nkuăl Đức Cơ, Gia Lai) hŏ bonh đă geh nŭih ƀon lan jăng lơi nchroh mhik gay hăn sĭt, nkoch:

            ‘Tâm du tŏ gâp hăn tâm ƀon gay bonh đă ri geh du hê kon se tât ut jâng gâp, păng se lah, hơi yơ, ay hăn joi mê gâp sĭt ân gâp ƀă, gâp nkah klâng me ngăn. Tĭng nau blau bah du hê ƀư me ri gâp gĭt, ăp kon se lah păng ngơi nau nê lah păng roh hôm nau mât chăm bah me nơm. Gâp ndrel ăp tahen hăn nsum gâp hŏ leo kon se nê lăp ngăn tâm bri gay ma ndrel hên hăn bonh đă, jă têk ngăn me kon se nê ndrel du đê̆ nŭih băl mpôl khân păng hăn sĭt ma ƀon lan”.

            Ntoh nau tâm nar rƀŭn, Thượng tướng Trịnh Văn Quyết, Kruanh N’gâng kan Chính trị, tahen ƀon lan Việt Nam lah rjăp, nkuăl rnoi mpôl đê̆ ndrel gôl yôk lah nkuăl tơm khlay tâm nau hun hao văng sa, rêh jêng, neh dak, rnă njrăng, tâm nchră. Nau ngăn cách mạng Việt Nam hŏ saơ, kônh wa ăp rnoi mpôl tâm rnglăp ndrel nau rgop têh nê tâm nau kan cách mạng bah Đảng, âk nkual neh jêng Thủ đô tâm lơh, ntŭk mât rong cán bộ, tahen, âk rmưn oh kon ăp rnoi hŏ hăn tahen, rgop nau ndrel ƀon lan lam dak nsĭt nau dơi tâm nau mât neh dak. Nua kan bonh đă lŏ ƀư rjăp tahen ntơm ƀon lan dĭng geh, yor ƀon lan tâm lơh. Mbơh kloh ngăn neh dak nơm tâm rnôk hun hao nâp, ân geh njêng ntŭk ntu nơih gay hun hao nau dơi nuih n’hâm rŏng dak, nuih n’hâm nsôih êng, geh dăng bah kônh wa ăp rnoi, kơl an kônh wa lŏ rgop tâm nau kan ndâk njêng neh dak, Thượng tướng Trịnh Văn Quyết đă:

            ‘Gưl uỷ rđau kan ndrel cán bộ tâm lam tahen, tâm nê geh ăp rmôt kan, ăp nŭih ntoh lư geh rnê prêh nar aơ lŏ ƀư ueh nau kan tơm, ngăn lah ntŭk nsing rnơm, tâm dăch ndrel kônh wa ăp rnoi tâm ăp nau kan. Tâm rgop ngăn đah gưl uỷ n’gâng kan tâm nkuăl nkoch trêng, bonh đă kônh wa rnơm tâm nau rđau kan bah Đảng, nsôih pah kan, hun hao văng sa, rêh jêng, ƀư nâp neh dak, rnă njrăng, n’hao nau nkah cách mạng nsôih lơh ƀư rai nau mhik ŭch têh klônh, rdâng lơh bah phung rlăng gay nkah nau tâm rnglăp lam rnoi mpôl”.

            Di rnôk aơ, N’gâng kan neh dak ntơm ƀư Bôk nau kan “Nŭih bah ƀon” ntoh klơ Bôk nau ntuh rup neh dak ndrel nchih nkoch klơ báo bah tahen gay nkoch trêng, rêng lơn ăp nau kan ueh, khlay, ngăn, ăp nau mbơh, rup gui ueh mpeh nau tâm rnglăp nting mham đah tahen ndrel ƀon lan, tâm nê geh kônh wa ăp rnoi mpôl đê̆ ndrel gôl yôk./.