Kơi ntĭm, nti bah dih mông lah nău ŭch geh di bah du đêt kon se nti n’hanh nai ntĭm nti. Yơn lah, bah meng nău ŭch râng nti êng, way ntoh nău djơh lah nchâp đă kon se hăn kơi nti bah dih mông đah trong ƀư êng êng đŏng. Ntơm bah nar 14/2/2024, Thông tư 29 bah Bộ Giáo dục n’hanh Đào tạo quy định mpeh kơi ntĭm, nti bah dih mông geh nău tam  ngăn. Rđĭl đah quy định dôl dŏng aƀaơ, thông tư dja geh âk ntŭk mhe, wăch rgum nău mât uănh tâm bah ri aơ nơh. Bộ Giáo dục n’hanh Đào tạo lah rjăp, nău mĭn bah Bộ lah mô mpăng nău kơi ntĭm, nti bah dih mông, yơn ân geh ăp quy định tâm di gay mât uănh uĕh lơn nău kơi ntĭm, nti bah dih mông tâm n’hanh bah dih nhih nti;

 Geh kon dôl nti tiểu học, yơn yuh Nguyễn Thu Hương ta quận Hai Bà Trưng, nkual ƀon têh Hà Nội mô an kon hăn kơi nti bah dih mông bah dih nhih nti, yor ăp kon hŏ nti bán trú lĕ ma nar ta nhih nti. Yor kơt nê̆, rnôk Bộ Giáo dục n’hanh Đào tạo n’gluh Thông tư 29 quy định mpeh kơi ntĭm, nti bah dih mông, yuh saơ rhơn n’hanh n’grŏ tĭng:

Gâp ŭch đah quy định mpeh nău tiểu học ri mbra mô dơi kơi ntĭm tay ăp môn tơm. Yor tâm rnôk nti kon se nti gưl 1, gâp mĭn nău nti ta nhih nti ntĭm nti an ăp kon ri hŏ tŏng hôm, ăp kon nti du nar măng ta nhih nti hôm, lah kơi nti tay măng đŏng ri mbra dŭt rgănh. Lah kơi nti tay ri nklăp ăp kon mô dơn nti tay ăp môn năng khiếu ri tâm di lơn tâm rnôk dja.)

Ta Dak Lak, lôch rnôk Thông tư 29/2024/TT-BGDĐT bah Bộ Giáo dục n’hanh Đào tạo dơi n’gluh an dŏng geh nău tam ntơm bah nar 14-2, âk nhih nti ta n’gor Dak Lak hŏ manh rlu ƀư kơi ntĭm, nti bah dih mông, rgâl trong nchrăp ntĭm nti tâm di đah quy định mhe. Ăp nhih nti ta Dak Lak hŏ mbơh lam hvi nkô̆ quy định mhe tât nai ntĭm, kon se nti n’hanh me bơ̆ kon se, nkre manh rlu kơi ntĭm tay bah dih mông ôp uănh ăp tŏng, rgâl di trong nchrăp ntĭm nti an tâm di. Wa Võ Ngọc Nam, Hiệu trưởng Nhih nti Trung học Cơ sở Phan Chu Trinh (nkual ƀon têh Buôn Ma Thuột, n’gor Dak Lak) an gĭt, nhih nti hŏ đăm jru nkô̆ thông tư tât lam lĕ rngôch nai ntĭm, me bơ̆ n’hanh kon se nti. Nkre, đă 100% nai ntĭm ký ton tĭng ƀư jăp quy định kơi ntĭm, nti bah dih mông. Bah meng nê, nhih nti ôp uănh tay ăp tŏng, rgâl trong nchrăp ntĭm nti gay đăp mpăn tâm di đah nuih n’hâm bah thông tư. 

Nai Nguyễn Thị Thu Hiền, nai ntĭm Ngữ văn ta Nhih nti Trung học Cơ sở Phan Chu Trinh nkoch, Thông tư 29 lah trong nchrăp di. Măt êng, âk me bơ̆ nha hôm ŭch an kon hăn kơi nti tay đŏng, lơn lah kon se nti jrô 9, jrô 12 dôl nchrăp an ăp rơh thi khlay. Yor kơt nê̆, ân geh trong ntĭm nti na nê̆ gay me bơ̆ kon se bah hôm rvah rvăch, mô gĭt an kon he ntŭk hăn nti bah dih mông.

Tĭng wa Võ Đức Tân, me bơ̆ geh kon hăn nti jrô 11 ta nkuâl Cư Kuin, n’gor Dak Lak, Thông tư 29 kơl kon se geh tay mông râng ăp nău kan rlong gĭt, hŭch bah ir mpet jâk hăn nti. Yơn lah, đah kon se nti kêng dŭt gưl, nău ôn thi lah dŭt khlay. Geh kon dôl nti jrô 11, păng mpŏng lah, ăp gưl mât bôk kan mbra ơm geh ntĭm nti na nê̆ gay kon se mbra dơi ôn tập ăp tŏng ma mô tih quy định.

Tĭng Thông tư 29 bah Bộ Giáo dục n’hanh Đào tạo, mô ƀư kơi ntĭm tay bah dih mông kon se nti tiểu học, mô kơp ăp nuĭh: kơi  năp nti mpeh njroh mprơ, thể dục thể thao, tiăr nti nău blău rêh. Nai ntĭm mbra mô ntĭm tay bah dih nhih nti geh sŏk prăk đah kon se nti ma nai ntĭm nê dôl dơi nhih nti tâm pă nău kan ntĭm nti. Quy định dja gay bah ir nău nai ntĭm leo kon se nti bah he luh bah dih kơi ntĭm tay, mpet đă me bơ̆ an kon hăn nti tay bah dih mông, nkre n’hao nău dơn kan mât bôk kan bah hiệu trưởng đah nai ntĭm mpeh nău mât bôk kan bah he rnôk râng kơi nti tay bah dih nhih nti. Tĭng wa Khúc Thị Huệ, Hiệu trưởng Nhih nti THPT Ngọc Hồi, nkuâl Thanh Trì, Hà Nội, ăp quy định tâm thông tư 29 mbra rgop nkra dơi du đêt nkô̆ nău nuih ăl nău lư, bah me bơ̆ kon se nti geh tât nău kơi nti tay bah dih mông tâm nhih nti n’hanh bah dih nhih nti aƀaơ. Nhih nti tĭng ƀư lhăt jăp ăp quy định tĭng Thông tư tâm ban kơt nău ntĭm nti bah Sở Giáo dục n’hanh Đào tạo Hà Nội: 

Nhih nti rlu nău ôn tập an kon se nti ntơm bah nar 14/2. Năm aơ ôn tập tay an ăp kon se nti jrô 12 ŭch geh ntop kơl dơm nău gĭt nti gay an rơh thi tốt nghiệp. Kon se nti jrô 12 bah nhih nti ri đah lơn âk ri nhih nti dôl rƀŏng trong an ôn tập an ăp kon se ri nha hôm ndop tâm ăp bôk nău kan tâm mông nti ngăn đŏng, ăp nai ntĭm nti n’gluh ăp đề cương, ăp nkô̆ ôn tập. lah ôn tập bah kơi khay 5 ri aƀaơ nhih nti mô hŏ rdâk njêng dơi trong nchrăp nê yor lĕ ma khối ri geh tât tơm prăk ôn tập an kon se nti ri âk ngăn đŏng.)

Tâm nău ngăn kơi ntĭm, nti bah dih mông lah nău ŭch geh di n’hanh lah nău ŭch geh ngăn bah lĕ ma nai ntĭm, kon se nti n’hanh rnăk wâl kon se nti. Thứ trưởng Bộ Giáo dục n’hanh Đào tạo Phạm Ngọc Thưởng lah rjăp, nău mĭn bah Bộ lah mô mpăng nău kan kơi ntĭm, nti bah dih mông, yơn ân n’gluh ăp quy định gay mât uĕh lơn nău kan dja: 

 Lah nai ntĭm dŏng ăp tŏng n’hanh ntĭm di mông bah he n’hanh uănh năl tâm di ăp kon ân mô kâp nti tay bah dih mông, ri hŏ tŏng ăp trong luh bah bôk nău kan. Yơn lah mô dơi ăp tŏng lĕ ngăn ơm. Ntĭt kơt hŏ nkoch lah geh nău ŭch tâm di, geh ăp kon se kơi nti tay bah dih mông gay n’hao nău gĭt bah he geh ăp kon se ân kơi nti tay gay kơl nkah tay nău hŏ tă nti. Nău mĭn rloh rlău bah kruanh Bộ Giáo dục n’hanh Đào tạo lah mât nkô̆ dja an păng di quy định, ƀư an nău kan kơi ntĭm, nti tay bah dih mông n’hanh nău kan bah ăp nai ntĭm nti păng rtŭt glêh n’hanh rĭng grep tay, ƀư an rup gui bah n’gâng kan ntĭm nti, bah nai ntĭm lah lhăt jăp ngăn.)

Thông tư 29 bah Bộ Giáo dục n’hanh Đào tạo n’gluh an rnôk năm nti dôl ƀư jêng du gâl ring tam tât trong nchrăp ntĭm nti bah năm nti bah ăp nhih nti n’hanh kon se nti nơm đŏng, lơn lah ăp kon se nti gưl n’glĕ dŭt. Bol ma kơt nê̆, âk nău rgop lah rjăp, lah ăp nhih nti, nai ntĭm, n’gâng  kan ta ntŭk tĭng ƀư ăp quy định hŏ dơi n’gluh an dŏng tâm Thông tư 29 mbra ndơ̆ nău kan kơi ntĭm, nti bah dih mông hăn di tay trong rƀŏng, bah ir jêng geh nchâp đă kon se hăn nti bah dih mông jêng nuih ăl tay tâm nău lư lam rêh jêng kon nuĭh./.