1. Nău wăng sa Việt Nam ndâk nsơm ngăch, geh tâm rmôt dak geh nău ngăch hao GDP dŭt âk.

Rlet rlău âk nău jêr jŏt yor nuh srê Covid-19 n’hanh ăp nău tât ta lam ntur neh, Việt Nam lĕ geh ƀư dơi, lĕ rngôch nkô̆ mpŏng kan, nău kan nkre lah rgum njrăng, rdâng, mât săm nuh srê, nkre ntrôl ndâk nsơm n’hanh hun hao wăng sa- rêh jêng, rdâk njêng n’gâng kan wăng sa đăp mpăn, mât kan êng ndrel đah nău leo kan, nsrôih lăp kan ndrel đah lam ntur neh têh jru n’hanh săk rnglăy. Nău wăng sa têh bôk năp lĕ đăp mpăn, lạm phát lĕ dơi mât njrăng, ăp  nău kan têh an geh tâm ban bâh n’gâng kan wăng sa lĕ geh mât đăp mpăn tâm nău mâp âk jêr jŏt. Hao GDP năm 2022 nchroh geh klâp ma 8,02%, rnoh hao dŭt âk tâm lvang năm 2011-2022. GDP râng geh du hê nuĭh năm 2022 tĭng rnoh khlăy aƀaơ nchroh geh klâp ma 95,6 rkeh prăk/hê, tâm ban dah 4.110 đôlar, hao 393 đôlar đah năm 2021. Rnoh mbrô ndơ dŏng CPI hao 3,15% đah năm 2021, geh nkô̆ mpŏng ŭch bâh Quốc hội ngluh mbơh. Lạm phát  râng geh ta năm 2022 hao 2,59% đah năm 2021, đê̆ lơn đah rnoh CPI râng geh nsum (hao 3,15%).

2.Âk nău khlay dơi ntrŭnh geh nkô̆ trong kan đah hun hao bah neh dak

 Rƀŭn nchră trung ương 5 n’hanh trung ương 6, khóa 13 lĕ ntrŭnh âk nkô̆ nău khlay kơt: Nchrŏng trong dăp rgum lĕ rngôch lam dak năm 2021-2030 n’hanh uănh tât năm 2050; ntrôl dăng tay công nghệ mhe, rgâl mhe; rgâl trong ntĭm rđău bah Đảng; ndâk njêng n’hanh jêh Ngih dak pháp quyền xã hội chủ nghĩa Việt Nam; Nău kơl, pháp luật mpeh neh ntu; nău lŏ mir, ƀon lan, thôn ƀon, wăng sa nsum; n’hao uĕh rmôt đảng viên tâm lvang mhe... N’gâng kan Chính trị an 6 nghị quyết nkual mpeh hun hao wăng sa-rêh jêng, đăp mpăn mât njrăng bri dak-rnă njrăng tât năm 2030, uănh tât năm 2045, nta an tâm ban ŭch âk mpeh nău wât n’hanh nău kan tâm lam Đảng, lam ƀon lan, lam tahen. Tĭng nkô̆ nău nĕ, Quốc hội, Chính phủ lĕ rgâl trong ƀư, rgâl jêng na nê̆ ăp bôk nău kan, nău nchrăp ƀư, nău ntrŭnh an nê̆ n’hanh mbơh ƀư dâl tâm nău ngăn, pơk luh trong dơi hun hao nâp nâl, lĕ rngôch bah neh dak n’ăp bah năp n’hanh jŏ jong.

3. Nău kan rdâk njêng, Nkra mhe Đảng, njrăng rdâng sa nkhiăn, sa ƀer, nău kan mô ueh ăp nar lơ ma răng dăng.

Năm 2022, nău kan tâm rdâng njrăng rdâng sa nkhiăn sa ƀer mpŭng lir lĕ hăn tâm nău têh jru na nê̆, tâm rgop na nê̆ đah rdâk njêng, nkra mhe nău kan Đảng, njrăng nău mĭn mô ueh mpeh chính trị, nău mĭn, nău rêh. Nău geh njêng rnâng kan ntĭm leo njrăng rdâng sa nkhiăn sa ƀer ta 63 n’gor, nkuăl ƀon têh bôk năp lĕ geh săk rnglăy. Nău rmal kỷ luật cán bộ, đang viên geh nău tih lĕ geh ƀư na nê̆, tâm di, di đah nău ntrŭnh bâh Đảng n’hanh pháp luật bâh ngih dak. Ăp ntŭk kan tâm phong lĕ phong, uănh nđôi bơi tât 2.500 rơh mpeh ăp nău tih sa nkhiăn, sa ƀer, nău jêr kơt lah: Nău tih ta ăp ntŭk Cục lãnh sự (n’gâng kan nchră nău đah dak bah dih); ăp nău kan geh ta công ty Việt Á, Tập đoàn FLC, Tân Hoàng Minh, Công ty AIC, Tập đoàn Vạn Thịnh Phát...nău kan njrăng rdâng sa nkhiăn sa ƀer, mpŭng lir, geh ntop tay nău knơm bâh ƀon lan, cán bộ, đảng viên ta nău leo kan bâh Đảng n’hanh ăp gâl kan.

4.Mbơh ƀư du rơh ăp nău kan nchră nău, n’hao jâng nsan neh dak

Rơh hăn khâl na nê̆ dak CHND Trung Hoa bah nar 30/10 tât 1/11 bah Tổng Bí thư Nguyễn Phú Trọng lĕ nău dŭt khlay, geh săk rnglăy lĕ rngôch, rgop nâp nâl, hun hao tâm boh Việt Nam-Trung Quốc. Ndrel đah nĕ lah ăp rơh khâl gưl ngih dak tât Hàn Quốc, Indonesia bah Kruanh dak Nguyễn Xuân Phúc, rơh khâl Hoa Kỳ, Hà Lan, Bỉ, Luxembourg bah Thủ tướng Phạm Minh Chính, rơh hăn khâl Hungary, Anh, Australia, New Zealand, Philipines bah Kruanh Quốc hội Vương Đình Huệ. Việt Nam râng dŭt n’hâm, lĕ nău kan tâm ăp rƀŭn nchră nkual n’hanh lam ntŭr neh kơt: ASEAN, AIPA, APEC, LHQ... Năm 2022 an saơ nău ƀư lôch uĕh Năm tâm rnglăp dăch dêh Việt Nam-Lào, Việt Nam-Campuchia. Việt Nam mĭn lah tay nău kan nchră nău pơk hvi, ndâk njêng n’hanh mât ntŭk ntô đăp mpăn gay hun hao neh dak, n’hao prêh jâng nsan n’hanh nsing nơm neh dak.

5. Việt Nam geh săch lăp kan ta Hội đồng Nhân quyền Liên hợp quốc

Nar 11/10/2022, Việt Nam lĕ tal 2 geh săch lăp ta hội đồng nhân quyền Liên hợp quốc năm kan 2023-2025, ta rơh rƀŭn nchră bâh Đại hội đồng LHQ khóa 77, geh ƀư ta New York, Mỹ đah rnoh phiếu kơl dŭt âk. Nău geh săch kruanh lah nău kơp dơn bâh ntŭk rêh jêng lam ntur neh đah ăp nău tâm ton n’hanh nău nsrôih têh dăng bâh Việt Nam mpeh ntrôl n’hanh mât nău dơi kon nuĭh. Đah nău kan ta Hội đồng nhân quyền Liên hợp quốc, Việt Nam mbra geh rơh tâm rgop ta nău kan ntrôl an lĕ rngôch ăp nău dơi kon nuĭh bâh nău kan tơm, tâm kơl n’hanh tâm nchră, mât đăp mpăn an ăp nar lơ ma ueh di lơn nău dơi bâh nuĭh ƀon lan ta lĕ rngôch ăp trong kan.

6.Rdâk ƀư lôch uĕh Đại hội Thể thao Đông Nam Á rơh tal 31 (SEA Games 31)

Đah nău mbơh “Yor du Đông Nam Á têh dăng lơn”, Việt Nam lĕ ƀư lôch uĕh Đại hội Thể thao Đông Nam Á rơh tal 31 (SEA Games 31) bah nar 12-23/5/2022. Rlău 14 nar tâm rlong, mpôl thể thao tơm jay Việt Nam geh 206 huy chương mah, 125 huy chương bạc n’hanh 116 huy chương đồng. Việt Nam geh dăng bôk năp lam rmôt đah âk nău dơi geh uĕh, lĕ đăp mpăn du rơh SEA Gemes tâm ban, mbơh rah wah, nuih n’hâm thể thao n’hao prêh, nuih n’hâm tâm rnglăp bah nsum mpôl ASEAN. Việt Nam lĕ geh âk nău uĕh đah du dak tâm ASEAN dăch dêh, ryơk rnê năch, lĕ rdâk hao tay lĕ rngôch n’hanh dôl hun hao têh dăng.

7. Ntŭk mât prăk kaih, tăch neh ntu, ngih jay ndeh klư...geh âk nău rgâl ndal, an geh doh rklaih ngăch.

Năm 2022 geh saơ ăp nău rgâl têh dăng bâh ăp ntŭk tăch rgâl kơt lah neh ntu, ngih jay, trái phiếu doanh nghiệp, chứng khoán, pring xăng...ntŭk tăch rgâl chứng khoán  hao jŭr ndal, hao dŭt âk tâm ăp khay bôk năm n’hanh jŭr ndal dŭt thuk tâm ăp khay dŭt năm. Yor geh nău khuch tât bâh ntŭk tăch rgâl lam ntur neh, rnoh pring xăng tâm dak hao khlăy đŏng, ndrel đah nĕ lah ăp nău  mô rŏng rnoh pă an ƀư an âk ntŭk tăch pring xăng ntâl mpông mô lah tăch tăch du đê̆ dơm. Nău aơ du gâl lah yor nău nsrôih doh rklaih ăp nău tât mô di, kŏ khan jŏ bâh ăp nău kan tăch rgâl ta du đê̆ doanh nghiệp têh, nkre lah an lor an geh doh rklaih răng dăng, an bah lĕ rngôch ăp nău kŏ khan nĕ tâm năm 2023.

8. Nu nău mô tŏng dak si, ndơ dak si ƀư jêr jŏt an trong kan but uănh săm ji

Âk ngih dak si ta lam dak geh nău mô tŏng dak si, hóa chất ndoh ndơ, dak si jŏ jong yor âk nkô̆ nău, tâm nĕ geh âk wăk kol tâm ăp sam ƀŭt geh tât rwăt, ndranh dak si, ndoh ndơ dak si jêng tât trong wât, trong ƀư êng êng. Nău aơ lĕ ƀư khuch uĕh tam but, săm ji, khuch tât nău tâm ban n’hanh đăp mpăn nău rêh jêng. Aơ lah du nău kơl lor ntĭm rđău rmal bah Chính phủ, N’gâng kan dak si n’hanh ăp n’gâng kan nău kan geh tât.

9. Rdâk njêng nău khlăy ngih dak, nău khlăy văn hóa, nău khlăy rnăk vâl n’hanh nău rêh tâm di kon nuĭh Việt Nam ta rơh mhe.

Ŭanh tay nău geh 1 năm ƀư tĭng nglôch lôch bâh Tổng Bí thư Nguyễn Phú Trọng ta rơh rƀŭn nchră văn hóa lam dak mbơh tơih ƀư tĭng Nghị quyết Đại hội 13 bâh Đảng, nar 29/11, ta Hà Nội lĕ geh ƀư rơh tâm nchră khoa học ngih dak “nău khlăy ngih dak, nău khlăy văn hóa, nău khlăy rnăk vâl n’hanh nău rêh tâm di bâh kon nuĭh Việt Nam ta rơh mhe”, nar 17/12 ta Bắc Ninh lĕ geh rơh tâm nchră văn hóa 2022 đah bôk nău “Trong kan, nău kơl kan n’hanh rnoh kan an hun hao văn hóa”. Ăp rơh tâm nchră aơ geh ƀư lôch 1 năm rơh rƀŭn nchră văn hóa lam dak an saơ nău an lor bâh Đảng, ngih dak n’hanh lĕ ntŭk rêh jêng tâm nău nsrôih rdâk njêng du n’gâng kan văn hóa Việt Nam ueh mhe, geh nău ueh êng  mpôl rnoi, gay ma văn hóa ngăn ngên lah soan dăng tâm ntŭk rêh jêng, nău kan tơm mpeh nău mĭn n’hanh lah nău gay ma hun hao bâh neh dak tĭng nău mĭn Nghị quyết Đại hội Đảng lam dak tal 13.

10. Ntrôl dăng rgâl mrô ngih dak

Nar 22/4/2022, Thủ tướng Chính phủ lĕ an nău ntrŭnh mrô 505/QĐ-TTg sŏk nar 10/10 ăp năm lah Nar rgâl mrô ngih dak. Năm 2022 lah năm uănh saơ âk săk rnglăy ntoh lư tâm ndâk njêng Chính phủ mrô, wăng sa mrô, nău rêh jêng mrô n’hanh tăch rgâl điện tử. Rgâl mrô lĕ jêng lam ƀon lan, lĕ rngôch, đah nău râng dŭt n’hâm bah ăp n’gâng kan, nău kan, ƀon lan. Nghị quyết Trung ương 6 lĕ na nê̆ uănh rgâl mrô lah du trong hun hao mhe geh nău rgâl têh, kơl ntrôl ngăch, rhoăt đêt tâm rnôk công nghiệp rgâl mhe, neh dak rgâl mhe./.