Nar 13/12, Binh đoàn 15 (Bộ Quốc phòng) ƀư Tâm nchră mâp măt nkhêp nkah ndray 80 năm Nar njêng Tahen ƀon lan Việt Nam n’hanh 35 năm Nar lam ƀon lan njrăng n’gang neh dak, nkoch gĭt mpeh nău tĭng ƀư nău dơn kan wăng sa- rêh jêng kon nuĭh bah đơn vị. Tâm năm 2024, Binh đoàn 15 geh âk nău dơi ntoh lư. Đơn vị hŏ an ƀư geh nău tam bôk nău kan njrăng n’gang têh dăng mhe, mât jăp nău dơn kan nchrăp rdâng lơh n’hanh tĭng ƀư geh nău tam ăp trong mât đăp mpăn ta nkual n’har bri ndrel ăp ntŭk khlay.

Rlău ma nê, ăp đơn vị bah Binh đoàn hŏ ntrŭp 750 camera groi nđôi ta ăp nkual duh hô, rgop khlay tâm nău mât đăp mpăn rnă njrăng ta nkual n’har bri Việt Nam – Campuchia. Râng rơh mâp măt, Đại tá Phan Xuân Hòa - Bí thư Đảng ủy ơm, Groi Giám đốc ơm Công ty 715 (mpeh Binh đoàn 15) – mpơl nău rhơn bah năp ăp nău dơi ma Binh đoàn hŏ dơi geh. Binh đoàn hŏ mô dơn njêng luh ndơ dŏng khlay  ma hôm rngleh du gâl gay rdâk njêng ăp ndơ dŏng rêh khlay ta ntŭk tahen gŭ kan đŏng, kơl rgâl geh nău rêh bah ƀon lan ta ntŭk. Let năp tay, Binh đoàn mbra ntik n’hao tay nău way ơm dăng janh, rdâk njêng đơn vị nar lơn ma hun hao dăng.