UBND n’gor Đăk Lăk mhe geh ntrŭnh Công văn mbrô 12032 mpeh nău pă dăp, leo ƀư nău kan ăp ntŭk kan bâh Ủy ban nhân dân n’gor, Ủy ban nhân dân gâl nkuăl gay ma rdâk njêng du nău kan mât uănh ngih dak tam, geh săk rnglăy, an tâm di đah nău ŭch rgâl mhe hành chính ta rơh mhe. Tĭng nĕ, n’gor mbra ƀư rgum dơn ngoăy n’hanh nglăp nsum du đê̆ ntŭk kan n’gâng kan nkre lah rgâl mhe du đê̆ ntŭk kan gay ma bah ir kŏ văk, n’hao ueh jăp nău kan mât uănh. Na nê̆ sở kế hoạch n’hanh đầu tư đah sở tài chính mbra lăp jêng sở Kinh tế-Tài Chính. Sở Tài nguyên n’hanh Môi trường đah sở nông nghiệp n’hanh phát triển nông thôn mbra  nglăp nsum jêng sở nông nghiệp n’hanh môi trường. Sở xây dựng n’hanh sở giao thông vận tải mbra nglăp nsum jêng sở Xây dựng n’hanh Giao thông. Sở Nội vụ n’hanh sở lao động thương binh xã hội mbra lăp nsum jêng Sở nội vụ n’hanh lao động. Sở Khoa học công nghệ đah Sở thông tin n’hanh Truyền thông mbra nglăp nsum jêng sở khoa học công nghệ n’hanh Truyền thông. N’gor mbra geh ƀư nglăp nsum Đài phát thanh n’hanh truyền hình ndrel đah Báo Đăk Lăk jêng ntŭk kan Truyền thông n’gor Đăk Lăk, kơl an mbơh lĕ ăp rnoh mbơh tơih nău mhe n’hanh n’hao săk rnglăy nău kan mbơh tơih nău mhe. Lôch geh ăp ntŭk kan nglăp nsum n’hanh nchrai kan, Đăk Lăk mbra n’huch geh 9 ntŭk kan, kơl an n’huch dơh ueh nău kan hành chính, bah ir âk ntŭk mâp kan, n’hanh n’hao săk rnglăy pah kan mât uănh ngih dak.