Gay đăp mpăn pă an ăp ntil ndơ dŏng rhŏ an nău ŭch ntŭk tăch tâm rơh tết Nguyên Đán êp tât, n’gor Lâm Đồng lĕ nchrăp n’hanh ntêm nkrem ndơ đah dĭng lĕ khlay kơp êng rlău 1.820 rmen prăk. Tĭng N’gâng kan Công thương n’gor Lâm Đồng, nchroh mbơh nău ŭch dŏng ndơ dŭt năm n’hanh rơh tết Nguyên đán Ất Tỵ 2025 bah n’gor hao 55 nkôp đah năm e.

Gay tŏng nău ŭch dŏng bah ntŭk tăch, ăp nuĭh tăch rwăt, ntŭk tơm tơm pă an ndoh ndơ ta n’gor lĕ ntêm nkrem ndoh ndơ geh khlay hao tât tât rlău 1.820 rmen prăk, dŭt âk lah 5 rmôt ndơ khlay mpeh ndơ ngêt sa, ndơ dŏng, ndơ rêh, ndơ lŏ mir n’hanh pring xăng. Wa Trần Như Hùng Tấn, Kruanh du siêu thị têh ta nkual ƀon têh Đà Lạt an gĭt, rlău rnoh ndơ rhŏ dŏng, ntŭk siêu thị hôm mbơh ƀư bôk nău kan rĭng đăp mpăn rnoh khlay, dăn trong nchrăp tăch ndơ mô hao khlay đah âk ntil ndơ.