Năm 2024, n’gor Dak Lak nchih nkah tay ăp nău dơi khlay tâm nău kan tăch n’gluh n’hanh rĭng geh tĭng bôk nuĭh. Aơ lah nkô̆ dơi nkoch ta Tâm nchră n’glôch jêh pah kan năm 2024, an ƀư nău kan năm 2025. Năm 2024, lĕ rngôch ndơ geh ƀư ta n’gor nchroh geh 141.326 rmen prăk, hao rlău 16% rđĭl đah năm 2023.

Nsĭt geh tăch n’gluh tât rlău 1,8 rmen USD, hao bơi 24% rđĭl đah năm bah năp nơh, rlău 15% trong nchrăp. Ndrel đah nê, rĭng geh tĭng bôk nuĭh bah n’gor nchroh geh rlău 72 rkeh prăk/nuĭh, rlău trong nchrăp ndơ̆ luh lah 68 rkeh prăk/nuĭh. Dak Lak uănh khlay tay tâm pah kan ăp tŏng geh nău rêh. Rnoh rnăk ach o hŏ hŭch âk, ntơm bah rlău 9% kêng dŭt năm 2023 jŭr hôm 6% kêng dŭt năm aơ. Năm 2025, Dak Lak n’gluh tât rnoh hun hao wăng sa geh 8%. Kruanh Ủy ban nhân dân n’gor Dak Lak Phạm Ngọc Nghị đă ăp nkuâl ntik n’hao lĕ nuih n’hâm dơn kan, n’gluh ăp trong nkra gay tĭng ƀư geh nău dơi trong nchrăp năm 2025, hao ngăch, tât ntŭk tâm nău tĭng ƀư ăp nău kan bah Nghị quyết Đại hội Đảng bộ n’gor tâl XVII ndơ̆ luh.