Khay Noel năm aơ, mông nar noel mprang lam ăp ƀon chroh ta Dak Lak. Ndrel đah nê lah nău khuh n’gôr bah ăp nuĭh rvăt năp ăp ndơ yông lĭr chrêk lơp mha êng gay njêng mông nar răm mƀak an rnăk wâl tâm rnôk dja.

Rlău 1 pơh aơ, ta Nhih brah giáo xứ Châu Sơn, xã Cư Êbur, nkual ƀon têh  Buôn Ma Thuột, kônh wa kon chroh rgum lĭr yông gŭr ntơr lơp chrêk nchăp wơt noel. Lĕ dĭng nuĭh rhơn nđơr da dê. Nuĭh ri ntrŭp ŭnh, nuĭh têk điện, nuĭh ƀư pư̆ lŭ, nuĭh rdâk mpông mpêr, lĭr ndê na nê̆ tĭng mpêt krêp ta pư̆ lŭ têh. Wa Trần Trọng Khánh, kruanh thôn 2, xã Cư Êbur nkoch:

“Ăp năm tĭng nău way ơm ri mpôl hên ƀư pư̆ lŭ tâm ban kơt lĕ rngôch ăp ndơ lĭr yông lơp chrêk ntơr gŭr êr bah n’glah gung meng trong ƀon gay ƀư rup uĕh an nar noel n’hanh nkre tâm nuih n’hâm dja lah ryơk brah n’hanh mhâm ƀư gay geh nuih n’hâm tâm rnglăp đah kônh wa kon chroh tâm ban kơt kônh wa ăp ntŭk.”

Ăp nar rlău aơ, bol hŏ mô ru đah nău klêh cà phê, yơn ƀon lan kon chroh xã Ea Tiêu, nkuâl Cư Kuin, nha hôm rong an mông nar gay lĭr lơp chrêk nhih jay n’hanh rnoi chroh đŏng. Sơch na nê̆ ăp play thủy tinh yông uĕh an tơm n’ho Noel, wa Nguyễn Phước Thành, thôn 1, xã Ea Tiêu, nkuâl Cư Kuin an gĭt:

“Đah năm e nơh ri noel năm aơ rhơn nđơr lơn, yor rnoh khlay ndơ, uănh nsum ăp rnăk rvăt năp da dê. Ƀư pư̆ lŭ rnăk wâl, ƀon lan, ăp du n’glah puăn, ƀư du pư̆ lŭ. Uănh nsum rhơn nđơr ngăn.”

Tâm nuih n’hâm rhơn nđơr wơt nar noel đŏng, yuh Trần Thị Anh Thi, ta phường Tân Thành, nkual ƀon têh Buôn Ma Thuột an gĭt, ntŭk tăch pla ndơ Noel năm aơ âk mpưm mpeh săk ntô, gŭr êr, dah rŏng an ăp nuĭh sơch:

“Gâp yông lĭr Noel tĭng ăp nău way ơm ăp năm bah rnăk wâl hên dơm. Rnăk hên ơm geh ndơ yông lĭr tâm jay, djăt ma tât khay Noel ri mbra sŏk tơm n’ho ơm gay dŏng, mô ndơ he mô tŏng geh ri rvăt tay. Kơt năm aơ gâp ŭch dak kông ri gâp rvăt tay dak kông dơm.”

Yuh Lê Thị Kim Anh, nuĭh tơm tăch ndơ ta trong Lý Thường Kiệt, nkual ƀon têh Buôn Ma Thuột an gĭt, khay Noel năm aơ, geh dŭt âk ndơ ƀư ma ti uĕh măt uănh, mpơl nău ndê na nê̆ tĭng ndơ ƀư.

“Năm aơ năch rvăt dŭt ơm, lơn lah ăp jay ngêt sa, nhih pah kan tât ăp quán cà phê bu ŭch yông lĭr ơm gay wăch rgum năch. Tâm rnôk dja dơn geh rnăk wâl nkre sơch rvăt ndơ yông an tơm n’ho, nkre pư̆ lŭ dơm. Wăng sa hun hao jêng nău ŭch geh lơn ma âk jêng săk ntô nar ân lơn ma uĕh.”

Du khay Noel dôl tât tâm nuih n’hâm rhơn nđơr bah kônh wa kon chroh Dak Lak,  rƀŏng tât du năm mhe bêng ler nău rhơn mƀak.