Ôi 24/12, ta Hà Nội, N’gâng kan dak si Rƀŭn nchră mbơh ƀư trong kan dak si năm 2025. Groi Thủ tướng Lê Thành Long tât râng n’hanh ntoh ngơi ntĭm rđău. Năm 2025, ndrel đah nău ntĭm rđău njrăng n’gang nuh srê, n’hao uĕh but uănh, săm ji, N’gâng kan dak si mbra rgum kơp uănh, rgum jêt n’gâng kan ƀĭt joet, dăp ăp ntŭk dak si nchrăp ntêm mpeh tâm N’gâng kan tĭng Bôk nău rgop an tâm nchră ndâk njêng Ntŭk uănh nđôi kop ji Trung ương.

Ndâk ƀư Bôk nău rgop an tâm nchră mbơh an Thủ tướng Chính phủ uănh an njuăl ăp Ngih dak si mpeh tâm n’gâng kan sĭt n’gor mât uănh tĭng Bôk nău rgop an tâm nchră dăp rgum lĕ rngôch, ndâk ƀư tay ăp ngih dak si mpeh tâm n’gâng kan dak si lvang tât năm 2030. Ntoh ngơi ta rƀŭn nchră, Groi Thủ tướng Lê Thành Long lah, N’gâng kan dak si ƀư tĭng uĕh tay nău dăp ndâk ƀư ƀĭt joet; rgop ƀư tŏng ăp, ngăch ăp nău ntrŭnh, nău kơl bah Đảng; mât uănh jru ntĭm rđău bah đồng chí Tổng Bí thư Tô Lâm mpeh rgâl mhe trong kan ndâk njêng pháp luật đah nău mĭn nkre đăp mpăn nău đă mât uănh ngih dak, nkre ntrŭt nsôr mĭn ƀư mhe, soih luh ăp tơm prăk gay hun hao, sŏk nuĭh ƀon lan ta nklang, ƀư tơm, lah nău rƀŏng, nuih n’hâm khlay ngăn an hun hao.