Năm aơ, Hội Liên hiệp Bu ur Việt Nam nkuâl Di Linh, n’gor Lâm Đồng geh trong nchrăp kơl 63 rnăk ach o, dăch kêng ach o, tâm  nê 32 rnăk bu ur rnoi mpôl đê̆. Hội Liên hiệp bu ur ăp xã, thị trấn kan nsum ra uănh tay ăp rnăk lah nuŭh rnoi mpôl đê̆ geh nău ŭch manh tơm prăk ntop kơl neh gŭ, jay gŭ, neh tuch tăm, rgâl nău kan n’hanh hun hao tuch tăm tĭng rêng rnoh khlay gay ntop kơl tơm prăk tĭng di quy định.

 Tât aƀaơ, Hội Liên hiệp bu ur tĭng ƀư tay nsing nơm manh ăp Ngân hàng Chính sách Xã hội an hội viên bu ur ach o manh tơm  prăk gay hun hao wăng sa đah lĕ rngôch n’gluh geh an manh 195 rmen prăk. Bah meng nê, Mpôl nsing nơm manh đah Ngân hàng Nông nghiệp n’hanh Phát triển nông thôn Di Linh rlău 10 rmen prăk an rlău 150 rnăk manh. Wa Ka Hương – Groi kruanh Hội Liên hiệp bu ur nkuâl Di Linh, n’gor Lâm Đồng an gĭt:

“Di Linh lah ntŭk geh âk ƀon lan rnoi mpôl đê̆ gŭ rêh, tâm nê, rnăk ach o nha hôm dŭt âk đŏng, tâm  nê geh rnăk oh yuh bu ur rnoi mpôl đê̆. Hội Liên hiệp Bu ur nkuâl hŏ geh dŭt âk trong nkra gay jut jăng ji ngot n’hŭch ach o đah hội viên rnoi mpôl đê̆. Kơt, hŏ pah kan đah Ngân hàng Chính sách nkuâl nta trong dơh an hội viên ach o dơi manh tơm prăk gay hun hao wăng sa rnăk wâl, n’hanh Hội bu ur nkuâl njêng Prăk nkrem an bu ur ach  o, tă bah oh yuh nơm rgop ăp nuĭh 10 rbăn prăk, n’hanh aƀaơ prăk nkrem hao tât 1 rmen prăk. Ma prăk nkrem dja, oh yuh hŏ dơi ntop kơl tơm prăk hun hao wăng sa rnăk wâl, jut jăng ji ngot n’hŭch ach o”.