Tâm nau nkah nar bôk năp geh rklai n’gor Dak Lak, wa Y Per Niê, tâm Phường Đạt Hiếu, nkuăl têh Buôn Hồ (tă pah kan tâm Đồn điền cà phê Rossi bah rơh ơm) mbơh: Jêh rkalih, đồn diền Rossi tă geh lah nau mât bah phung ơm hŏ geh Ngih dak jao ân mât nsum. Ăp gưl n’gâng kan ntơm tăm tay, ndâk tay ƀon lan:

            ‘Rklaih đăp mpăn jêh nê ri đồn điền nơm rgum nsum, ndâk jêng nông trường, ƀư văng sa, rgum ƀon lan ƀư trong hoch dak, trong hoch bah ƀon T’rinh tă bah đồn điền Rossi tât ntŭk ri gay ma tŏ cà phê, tŏ ba lŏ ri ma ƀon lan rgơn ngăn ri ma bu gơih ngăn kan. Khân păng kuih mương ngăch ngăn. Lah nsum lah công nhân ndrel ƀon lan ăp nŭih kŏ rhoen yor ntơm bah aơ mô hôm geh phung rlăng in”.

            Jêh lôch 50 năm lơh dơi Buôn Ma Thuột ndrel rklaih n’gor Dak Lak, nuih n’hâm ƀon lan rhơn ngăn. Ăp năm khay jâk rgănh geh njêng ăp nau ueh, pơk luh nau hun hao văng sa, rêh jêng mhe. Ngăn lah, tơm cà phê, nau ntoh bah nkualư Tây Nguyên, ho rgop nau khlay tâm nau geh dơi, n’hao nau geh văng sa ndơ ndrel ƀư rjăp nau dăng bah Cà phê Việt nam tâm lam ntur neh. Wa Ama Loan, ta Phường Thắng Lợi, nkuăl ƀon têh Buôn Ma Thuột, ntoh nau rhơn:

            ‘Ngăn lah năm aơ lah năm nkah 50 năm lơh dơi Buôn Ma Thuột, ndrel kŏ lah Lễ hội cà phê geh ƀư têh ngăn kơp ntơm sa ơm tât rnôk aơ. Nau dơi bah gâp ndrel ăp nŭih tâm ƀon lan ăp nŭih mbơh nau ueh bah rnoi Rđe. Nê lah ntơ tanh njuh, ăp nau ƀư goh nteh ơm kơt: Kipah, Đinh năm, đơn T’rưng...ngăn lah năm aơ nkah 50 năm rklaih n’gor Dak Lak, gâp saơ nau rêh bah kônh wa geh âk nau rgâl, hun hao ngăn. Kônh wa hŏ geh nau mĭn nau kan, hun hao văng sa, ngăn lah ntơm năm e, cà phê geh rnoh khlay. Nê lah nau rhơn ân nŭih tăm cà phê”.

            Lễ hội cà phê Buôn Ma Thuột tal 9 năm 2025, geh âk nau rhơn ân nŭih tăm, ê nkra ndrel tăch cà phê; mbơh nau geh dơi pâl n’aih, ntuh kơl tâm nau kan cà phê ndrel ăp ndơ tuch tăm, mbơh nau ơm ueh bah kônh wa ăp rnoi, ngăn lah Ntŭk ơm yau chĭng gong Tây Nguyên, ndơ nkoch mbơh bah rnoi nŭih. Wa H’Bích Byă, tâm ƀon Brê, xã Hoà Phú, nkuăl ƀon têh Buôn Ma Thuột, ngơi:

            ‘Lễ hội aơ lah nau rhơn ngăn ân ƀon lan tâm n’gor nơm. Ăp nŭih ƀon lan tăm cà phê kŏ rhơn yor cà phê dôl ma geh rnoh mra tŏng prăk ân nau ntuh kơl tăm. Gâp kŏ rhơn yor aơ lah nau nkhêp gay cà phê bah nơm luh tâm dak ba dih. Uănh tay 50 năm rlau aơ, nau rêh kônh wa nơm hun hao, ngăn lah 2 năm ma aơ, cà phê hao khlay, kônh wa nơm trok lĕ dôih rnon ri ma rhơn ngăn”.

            Đah nau mĭn “Buôn Ma Thuột-ntŭk tât bah cà phê lam ntur neh”, Lễ hội Cà phê Buôn Ma Thuột tal 9 rnê ăp nŭih ntoh lư tâm nau kan văn hoá, pâl n’aih, gĭt jru mpeh cà phê ndrel nau ơm bah Tây Nguyên. Nô Y Miu Niê, tâm xã Ea Drông, nkuăl têh Buôn hôd, lah ngoai tâm ăp nŭih ntoh măt ân nau mbơh Lễ hội tâm rnôk aơ dôl nsôih gay nkoch nau “Buôn Ma Thuột-ntŭk tât bah cà phê lam ntur neh”:

            ‘Gâp saơ Lễ hội Cà phê geh nau khlay ngăn, m’ak ngăn, kônh wa ƀon lan kŏ rhơn vơt dơn lễ hội. Bah nê, njêng nau nsôih ân kônh wa ƀon lan gơih tâm nau kan tuch tăm. Ŭch lah bah rnôk aơ mra kơl an rnoh cà phê bah ƀon lan khlay lơn, kônh wa ƀon lan mra geh nau rêh hơm răm, sâm geh lơn. Gâp knŭng lah du he ebu mom, yơn bah ăp nau nkoch ơm ndrel nau mhe rnôk aơ, jêh 50 năm rklaih, nau rêh bah kônh wa nơm ngăn ngên geh rgâl âk, ueh lơn, nâp lơn ndrel hun hao lơn đŏng”.

            “Buôn Ma Thuột-Janh dăng ndrel ueh” lah ăp nau ma nơm dơi saơ tâm ăp nar khay Pe aơ. N’gul rach năm hŏ rlau kơp ntơm nar geh dơi lơ 10/3/1975, Buôn Ma Thuột hôm dŭt dăng ngăn bah Tây Nguyên. Nar aơ, leo tât nau rhơn mpeh grăp cà phê Tây Nguyên- “nau ueh bah nkuăl neh”, rlet ngai tât lam ntur neh./.