Hăn du trong mêt uănh ăp tơm mhe tăm tâm nkuăl tăm bri bôk tu dak tâm xã Ia Lôp, nkuăl Ea Sup, n’gor Dak Lak, wa Nguyễn Văn Diện, Kruanh rmôt mât njrăng ŭnh sa bri thôn Thanh niên ndâk kan mbơh, nkual aơ mhe geh tăm âk rbăn tơm sao ôch ndrel xà cừ:

            ‘Rgŏ jă bôk nau kan tăm tơm si tăm bri ri săk gâp lah ăp nŭih mât ndrel lah nŭih ƀon lan mra kơt tĭng, râng ndrel rmôt mât njrăng ndrel ăp ntŭk kan, rmôt kan gay ma nsôih ăp năm mra rdâng ŭnh sa ndrel mât chăm, gay ma tơm hun hao ueh ngăn”.

            Ntrŭnh ƀư Bôk nau kan Rkeh tơm si-yor du neh Việt Nam ndrih, tâm năm aơ, hŏ geh 76 rbăn tơm drih geh tăm tâm 63 ha, tâm nkuăk bri bôk tu dak nkuăl Ea Súp, n’gor Dak Lak. Sao ôch ndrel xà cừ lah ăp ntil tơm tâm di đah neh tăm bah nkual, geh nau dơi hao jêng. Yuh Trần Thị Thuý, Groi Bí thư Đoàn nkuăl Ea Sup nkoch, nau kan tăm tơm si ndơn geh âk nau kơl an bah ăp ntŭk kan, rmôt kan, nau kơt tĭng ndel râng bah ƀon lan, ngăn lah rmôt đoàn viên druh ndăm:

            ‘Phung hên mra lŏ nkoch trêng ân đoàn viên, druh ndăm ndrel kônh wa ƀon lan kơt tĭng bôk nau kan aơ. ĂP nŭih ri du năm mra tăm du tơm si, n’hao nau nkŭm n’hâm bri tâm nkuăl. Jêh rnôk tăm ri hên mra lŏ mât chăm gay ma tơm hun hao ueh, leo nsĭt màu ndrih ân nkuăl n’har bri Ea Súp phung hên”.

            Ndrel ma Dak Lak, tâm năm 2022, Trung ương Đoàn kŏ ntrŭnh tăm mhe 25 rbăn tơm ndrih tâm rlau 14 ha tâm xã Quảng Sơn, nkuăl Dak Glong, n’gor Dak Nông. Wa Vũ Đức Hưng, Kruanh jrâu kan mât chăm ndrel njrăng bri, Công ty TNHH du ntŭk kan mât njrăng bri Quảng Sơn, mbơh:

            ‘Nkuăl bri ma phung hên tăm rkeh tơm si ndrih-Yor du Việt Nam ndrih năm aơ geh nau khlay tâm nau njrăng dak lip ndrel njrăng trong bri tâm bôk tu dak tâm Dak Nông. Công ty mât njrăng bri Quảng Sơn tâm rgop nsum đah nŭih ƀon lan ta aơ gay ma mât chăm ndrel mât neh bri tâm rơh tât gay ma njêng du nau dơi nkŭm nâp, mât nau rêh nŭih ƀon lan ta aơ”.

            Ntơm năm 2021 tât rnôk aơ, bôk nau kan rkeh tơm si, yor du Việt Nam ndrih hŏ tăm tơm si tâm 4 n’gor Quảng Nam, Quảng Ngãi, Dak Lak ndrel Dak Nông. Nkô̆ nau tât năm 2025 mra tăm mhe 100 rkeh tơm di tâm lam dak, gay rgop nau ƀư Bôk nau kan tăm du rmen tơm si bah Chính phủ. Tĭng nô Ngô văn Cương, Bí thư Rnâng kan rđau kan Trung ương Đoàn, đah nau ƀư âk ntil, tâm, di ma ăp n’gor, bôk nau kan n’hao nau blau bah đoàn viên, druh ndăm ndrel ƀon lan mpeh nau nâp bah bri, mât njrăng bri, mât njrăng dak, rƀŏng tât hun hao nâp nâp:

            “Tâm rơh rlau aơ ri Trung đoàn kŏ tâm rgop nsum đah rmôt kan ƀư ân dơi ăp nkô̆ nau aơ. Bôk nau kan kŏ rgum đoàn viên, druh ndăm kŏ kơt lah ƀon lan râng ueh ngăn ndrel ma rkeh đoàn viên druh ndăm râng tâm lam dak. Ăp đoàn viên druh ndăm mra tăm mhe ndrel mât chăm du tơm tâm du ănm. Bah nau kan aơ ri phung hên ŭch lah Việt Nam bah nơm tâm rơh tât mra bdri lơn, ueh lơn ndrel nâp lơn”.

            Ndrel ma bôk nau kan “Du rkeh tơm ndrih-yor du dak Việt Nam”, năm aơ, UBND n’gor Dak Nông hŏ rgŏ jă “tết năm tơm si mro mrăng nkah git Wa Hồ”. Tâm 3 rkeh tơm si ndrih geh tăm rnôk aơ, geh nklăp du rkeh tơm n’ho 3 n’ha geh tăm tâm ăp trong Quốc lộ 14 ndrel 28, tâm ăp nkuăl dôl geh bu tă kăl lơi, in tih dôih. Wa Lê Quang Dần, Groi Giám đốc N’gâng kan tuch tăm ndrel hun hao ƀon lan n’gor Dak Nông mbơh: Bri njok trong Quốc lộ rơhr lau aơ geh in âk ngăn. Bah năp nau nê, n’gor nsôih tăm tay bri tâm ăp nkuăl aơ.

Êng tâm nar rgŏ jă “Tết năm tơm si mro mrăng nkah gĭt Wa Hồ”, ndrel ma ăp đoàn viên, druh ndăm, cán bộ nŭih pah kan bah ăp ntŭk kan Ngih dak, n’gor Dak Nông rgŏ jă rláu 3.250 cán bộ, tahen ăp rmôt râng tăm tâm ăp ntŭk trong njock Quốc lộ 14 ndrel 28, đah nau mĭn “Sŏk nau ndâk njêng gay ma rdâng nau lơh khuch”:

            “Ân geh nau mĭn ueh, nê lah sŏk nau ndâk gay ma rdâng nau lơh. Phung hên nsôih ngăn, ŭch gay geh ƀư. Rnôk aơ, UBND n’gor hŏ rgum âk ngăn rmôt tahen tăm ta ăp nkuăl aơ, gay ma ƀư nau nsôih ngăn tâm nau mât njrăng, ndâk tay neh bri tâm 2 ntrong hăn aơ”.

            N’gor Dak Nông rnôk aơ hôm nklăp 260 rbăn ha bri, nkŭm n’hâm nklăp 38%, dêh lơn 4% rđil nau geh nsum bah lam dak. N’gor nsôih n’hao nau nkŭm n’hâm bri hao 40% tâm năm 2025 ndrel 42% tâm năm 2030./.