M’nông – Ntŭk kan soay n’gor Dak Lak an gĭt, kơp tât lĕ khay 10/2022 dĭng lĕ sŏk an tơm prăk ngih dak tă bah nău kan Soay Dak Lak ƀư, geh bơi 5.000 rmen prăk, rlău nău nchrăp lĕ năm, hao rlău 20% nkôp đah rơh aơ năm bah năp. Ăp ndơ sŏk geh hao âk nkôp đah rơh aơ năm e geh: Sŏk bah ăp Doanh nghiệp bah dih ngih dak, soay nuĭh geh prăk sa âk, prăk soay neh n’hanh sŏk bah Xổ số.

Dak Lak lôch jêh ơm nău kan sŏk ndơ̆ tơm prăk.

Săk rnglăy sŏk an tơm prăk ta Dak Lak năm aơ kơp dơn hao jêng tâm ban ta ăp ntŭk, đah 10/13 ntŭk kan mpeh tâm Ntŭk soay lĕ sŏk rlău nău nchrăp năm 2022. Bah aƀaơ tât lĕ năm Ntŭk soay Dak Lak rgum tay mbơh ƀư geh săk rnglăy ăp rmôt trong mkra mât uănh sŏk soay, njrăng n’gang mô tŏng soay, tâm nĕ rgum ntrôl dăng ăp trong mkra ntŭk ntop kơl an nuĭh ndơ̆ soay tă bah ăp trong mkra rgâl sam ƀŭt hành chính.