Rơh tâm rlong geh 2 bảng: Bảng nău mĭn n’hanh Bảng nău nchrăp kan.Mpeh Bảng nău mĭn geh ăp nău mĭn ntơm njêng nău kan lĕ geh mô lah ê hŏ geh ndơ ƀư, mbơh kơl kan, nău kan lor bôk năp, yơn ê hŏ geh ndơ̆ ta ntŭk tăch rgâl n’hanh ê hŏ geh ntoh luh nău doanh prăk kan. Ntơm leo kan bôk năp geh nău mĭn ueh mbra geh leo ƀư nti kan, kơl an ƀư lôch nău kan, tâm rgop nuĭh way kan, nuĭh ntuh kơl gay ma dơi geh rdâk njêng ăp nău kan geh nău dơi.

Mpeh nchrăp nău kan geh ăp nău ƀư ntơm njêng nău kan lĕ geh ntiol ndơ ƀư, nău kơl kan, ndơ geh rlong kan lĕ geh ndơ̆ ta ntŭk tăch rgâl mô lah rlong ƀư đah bu năch ngăn ngên, n’hanh lĕ geh ntoh luh  prăk kan, mô lah ê hŏ geh prăk bâh nău kan yơn lĕ geh prăk dŏng ngăn geh kơp dơn đah ăp ntil săm ƀŭt, tŏng nău gay ma nkra njêng nău kan gay ma uănh năl săk rnglăy nău kan tơm prăk.

Ăp nău kan geh nău dơi gegh rơh nkhêp gay ma kơl an ƀư lôch nău kan tăch rgâl, n’hao nău dơi mbơh tơih nău kan, tâm rgop nuĭh kan n’hanh tât râng ăp ntŭk pâl rlưn ntơm njêng nău kan ta rnoh têh hvi lơn.

Groi Giáo sư, Tiến sĩ Lê Đức Niêm, groi Hiệu trưởng Ngih nti Đại học Tây Nguyên, uănh năl bôk nău rơh tâm rlong năm aơ geh nău kan khlăy ngăn, lah na nê̆ nău mĭn rgâl nău kan jêng nău khlăy ngăn ngên.  “Bôk nău kan Bâh nău mĭn tât rnoh khlăy lah nău mbơh dŭt khlăy ngăn, mpơl nău mĭn rgâl mhe mĭn kan tĭng nghị quyết bâh Đảng, kơt Nghị quyết 57. Nĕ lah nău ndơ̆ ăp ntrong kan, công nghệ ta nău ngăn gay ma njêng ăp nău khlăy. Aơ lah rơh nkhêp gay ma ăp nuĭh ntơm ƀư nău kan, doanh nghiệp mhe njêng tât râng kan, năp lor lah kơt nti, lôch nĕ mbơh tơih ăp nău ntơ, nkre lah ryơk n’hao nău mĭn n’hanh nău geh ma doanh nghiệp njêng kan”.

Đah sinh viên, rơh tâm rlong lĕ geh pơk luh du rơh gĭt kan mhe, rgum gĭt nău mhe n’hanh rlong đah ăp nău mĭn mhe. Oh Trần Thị Thiện Hạnh, sinh viên ngih nti Đại học Tây Nguyên nkoch. “Rơh tâm rlong dŭt khlăy ngăn. Kơl an gâp gĭt rgum nău blău, geh rơh nkhêp rlong kan, rlong soan nơm, bâh nĕ ntop tay nău git vât n’hanh kơl an ntrong pah kan let năp tay”.

Wa Trần Thanh Sơn, Groi Giám đốc ntŭk kan khoa học n’hanh Công nghệ n’gor Đăk Lăk, an gĭt nău kan rgâl mhe min kan dôl geh nău mhe n’hanh mpong kan na nê̆ lơn đah Nghị quyết 57 n’hanh Luật khoa học, Công nghệ n’hanh rgâl mhe min kan. Rơh tâm rlong mpŏng tât rnoh khlăy n’hanh tâm rgop an ntuk rêh jêng. Ntŭk kan khoa học n’hanh công nghệ mbra geh nsrôih tâm rlong doanh nghiệp, nuĭh ntuh kơl gay ma hăn ndrel đah ăp nău dơi geh nkhôm rnê, kơl an hun hao doanh nghiệp n’hanh pơk hvi nău kan săk rnglăy.