Aƀaơ Simexco Đăk Lăk geh tâm rgop ndrel đah klâp ma 65 rbăn ha nkual tăm, hăn ndrel đah klâp ma 70 rbăn rnăk ƀon lan kan lŏ mir, ntrôl nău pah kan nâp nâl, gĭt na nê̆ tu tơm n’hanh n’hao nău dơi ueh jêng cà phê, tiu. Aơ lah nău kan dŭt khlăy ngăn gay ma doanh nghiệp n’hao nău tâm rlong, tât râng jru lơn tay ta rnoh prăk nău kan khlăy lam ntur neh. Ntoh ngơi ta rơh lễ, wa Lương Nguyễn Minh Triết, Bí thư n’gor Uỷ Đăk Lăk, đă Tổng tông ry Simexco 2-9 Đăk Lăk an geh n’hao tay nău kan hăn lor, leo lor bâh doanh nghiệp ngih dak, rgâl mhe ntrong mât uănh, n’hao an săk rnglăy dŏng prăk ngih dak, ntrôl dăng nău kan nkret ƀư, hun hao tăch ndơ cà phê Buôn Ma Thuột n’hanh pơk hvi ntŭk tăch rgâl lam ntur neh.