Ntơm bah rlau 70 nau nkoch mbơh khlay geh ndơn mpeh tahen khĭt tâm rnôk tâm lơh kăl e, rlau 2 khay ma aơ, Rmôt hăn joi, rgum nting tahen K75 n’gor Lâm Đồng hŏ ƀư geh 32 rơh mêt uănh, rgum geh rlau 800 tŏ nŭih râng ndrel máy móc kuih kuai rlau 2.100 mét khối neh lŭ, joi, rgum geh 26 nting tahen tâm 9 xã, phường tâm lam n’gor. Trung tá Trần Xuân Hổ, Kruanh rmôt K57, N’gâng kan rđau tahen n’gor Lâm Đồng mbơh, bah nau ƀư nau kan ri rmôt kan mro ndơn geh nau kơl an ngăn bah n’gâng kan ndrel ƀon lan tâm n’gor: ‘Ăp nkuăl ngăn lah rmôt kan ƀư nau ntrŭnh bah ăp xã, phường phung hên tât pah kan ri saơ geh nau kơl an, n’ăp ma ndeh klơ, n’ăp ma drăp ndơ kŏ hăn joi kơl. Nŭih ƀon lan tâm nkuăl kŏ kơl an, kơl an âk ngăn mô kâp geh trok tâm, leo ntrơn du ôh”.

 Ndrel ma nau kan hăn joi, rgum leo nting tahen tahen khĭt tâm neh bri, rơh ngoai bah Bôk nau kan 500 măng nar, n’gor Lâm Đồng ƀư rjăp ngăn nau sŏk nting mham kơl an năl moh săk bah tahen tâm 11 môch tâp tâm lam n’gor. Thượng tá Trần Thanh Sơn, groi kruanh Chính trị N’gâng kan rđau tahen n’gor Lâm Đồng mbơh, ăp môch tâp tâp ăp tahen hŏ geh âk tŏ rgâl, nkra, n’hao ƀư mhe ri ma nau kuih joi, leo ăp nting tahen mâp âk nau jêr ngăn. Ăp cán bộ, tahen ƀư nau kan kŏ nsôih ‘rlet nar, rlau mih” ndrel mro nkah nơm ân đăp mpăn yơn ăp nhoat, ăp nau ƀư ân geh ƀư rjăp, nâp:   ‘Bri mih nar tâm rnôk aơ tât jêr ngăn. Bri mih mro yơn lah oh nô hôm nsôih gay ma ƀư. Ƀư ntơm bah ôi ơm ân tât dĭng nar, tât lôch kêng măng la hôm nsôih gay ntrŭnh ƀư ân ueh nau kan bah nơm. Nau sŏk nting mham dơi geh ƀư tĭng nau ntrŭnh đă bah N’gâng kan neh dak ntrŭnh đă, ntơm rnôk ƀư jêng nau kan mrô, nau ndơn joi nting tahen ân tât nau rgum sŏk nting mham ndrel tâp tay lŏ geh ƀư ân nâp rjăp, mô dơi geh vĭ vĕ ôh”.

  Tâm 4.776 môch ê geh năl moh tâm 11 môch, rmôt n’gâng kan bah Lâm Đồng hŏ sŏk 3.625 môch tŏng nau dơi, ƀư jêh bah năp 3 khay nchâp ndrel jao tât Viện Pháp y Tahen, N’gâng kan neh dak gay ƀư nau kan uănh năl ADN. Công an n’gor Lâm Đồng kŏ ndâk 11 ntŭk rgum nsum, ndơn 1.371 mham bah rnoi deh mpeh me bah tahen ê geh uănh năl moh săk, rlau rlau 5 ntil mham rđil ma nau nchrăp.

 Nkoch mbơh bah Quân khu 7, ân saơ, rơh 1 Nau kan 500 măng nar, Lâm Đồng hŏ ntrŭnh ƀư rjăp, săk tam, đăp mpăn 6 kloh: Kloh nau geh, nkoch trêng ân drăng băl tahen, rêng jru hvi; rgum, joi đah nau nsôih, nau kan ndrel nau nkah kơl an jru ngăn; nau kan sŏk nting mham tâm ăp môch tahen khĭt geh ƀư tâm ban, nsôih săk tam. Wa Đinh Văn Tuấn, Groi Kruanh UBND n’gor, Kruanh Rnâng kan rđau kan rgum, joi ndrel uănh năl moh săk bah nting tahen n’gor Lâm Đồng, mbơh lah, nau tă geh bôk năp bah rơh 1 Nau kan 500 măng nar lah nau nsôih gay n’gor lŏ ƀư ueh nau rgum, leo ăp tahen janh dăng sĭt ma ƀon tơm, rnăk vâl ndrel drăng băl tahen:‘Lâm Đồng jêh lôch ơm lor 3 khay. Rmôt kan ƀư jêh ơm ngăn tâm 4 nkuăl bah quân khu. Aơ lah nau rhơn tâm Rnâng kan rđau kan ndrel ăp rmôt râng ƀư nau kan aơ ngăn”.

Đại tá Nguyễn Thanh Quảng, Groi Chính uỷ, N’gâng kan rđau tahen n’gor, Groi Kruanh rnâng kan rđau nau rgum, joi ndrel uănh năl moh săk bah tahen n’gor Lâm Đồng, mbơh:  ‘Tâm rnôk aơ geh nau kan ma hên ê geh dơi ƀư lôch nê lah nau kan rgum, joi nting tahen. Nau nchrăp bah rnâng kan rđau kan gưl n’gor jao ân rmôt rgum joi ndrel phung hên leo luh nkô̆ nau lah 50 nting tahen ri rnôk aơ phung hên mhe geh joi saơ 26 nting tahen. Rơh 1 ê lôch, ê jêh nau kan”

 Lăp tâm rơh 2 Nau kan 500 măng nar, ntơm rnôk aơ tât lôch lơ 27/7/2027 n’gor  Lâm Đồng ân jêh nkô̆ nau rgum, joi geh 124 nting tahen. Đah ăp nŭih tât ƀư nau kan, trong hăn joi mô knŭng lah nau rlong ngăch ma mông nar ma hôm lah ntrong kan gay ma nkah ăp nŭih lĕ chôt khĭt yor nau đăp mpăn bah neh dak. Đah nau kan, nau nsôih ndrel nau kan bah nơm, n’gor Lâm Đồng dôl nsôih leo tay ăp tahen khĭt ê hŏ saơ joi kăl e sĭt ma neh me, mplơng kơl an tay nau kâp rnơm bah băl mpôl rnăk vâl ndrel ndrăng băl tahen./.