Ăp nar aơ, jay nhih ƀon Ea Kjoh A, xă Ea Drông, nkuăl têh Buôn Hồ (aê H’Luin), Bí thư chi bộ ƀon Ea Kjoh An an gĭt, jêh bơi 3 năm geh khuch yor srê, aƀaơ lĕ ƀon mư geh rơh rgum tŏng ăp.

Wa Y Bon nkah tay, rnôk aơ năm bah năp mông nar ƀon lan rngot rngăt. Tâm rơh hô srê Covid-19 năm 2021-2022, ƀon geh khuch hô, an nkhah êng, nchoeng n’gang âk nar. Knơm geh nău ntop kơl bah ăp mpôl lŏng bôk tôr, ngăn lah nău kơl bâh ăp ntŭk kan njêng oh nô đah ƀon ma nuĭh ƀon lan dơi geh ăp nklâm ndơ sa, phe sa gay rlet rlău lvang jêr jŏt.

Nuĭh ƀon lan bah ăp ƀon dơi ndơ ntop kơl, mât uănh bah ăp ntŭk kan njêng oh nô

Nttĭm ty tâm jâng gung bê tông bah năp jay nhih, wa Y Bon rhơn an gĭt, aơ lah ndơ ƀư bah ăp ntŭk kan njêng oh nô ntop kơl rdâk ƀư đah rnoh prăk 15 rkeh, nuĭh ƀon lan tâm ƀon rgop soan gay ƀư jêh. Ăp ntŭk kan njêng oh nô hôm ntop kơl an kônh wa kon ntil tơm tăm, mpa rong gay hun hao wăng sa. Knơm nĕ nău rêh nuĭh ƀon lan tâm ƀon geh âk naư rgâl. wa Y Bon an gĭt tay:

“Jêh nu nău chôt srê dơi nking n’gang ri ƀon lan rhơn ngăn, dơi hăn ntŭk aơ ntŭk ri, tăch rgâl ăp nkual gay hăn ƀư sa, joi prăk gay rgâl nău rêh. Kơt năm aơ geh âk nău rgâl lơn, cà phê ri khlay lơn du đêt, nuĭh ƀon lan ndăn hăn pĕ cà phê bu ri geh prăk âk lơn, kônh wa rhơn yor geh ntop tay an mât uănh rnăk wâl”.

Tĭng nău ƀư njêng oh nô đah ăp ngih pah kan, ntŭk kan đah ăp ƀon lan nuĭh rnoi mpôl đêt, bah năm 2006 tât aƀaơ, ƀon Ea Kjoh A lĕ njêng oh nô đah 4 ntŭk kan ta nkual têh Buôn Hồ lah Công an nkual têh, Chi cục hành án dân sự nkual têh n’hanh 2 ngih sam ƀŭt Tiểu học. Ăp năm ăp ntŭk kan njêng oh nô ƀa ƀơ hăn khâl, an ndơ, ntop kơl, ntĭm nuĭh ƀon lan hun hao nkra njêng, ndâk ƀư ăp ndơ dŏng ntŭk gŭ rêh, jay gŭ, ƀư âk nău pâl răm. Thiếu tá Phan Thị Thúy Hằng, Đội trưởng Đội Chính trị hậu cần, Công an nkual têh Buôn Hồ an gĭt, đah nău ƀư tơm kruanh rmôt njêng oh nô, ntŭk kan ƀa ƀơ đă cán bộ hăn ntŭk njêng oh nô gay ndâk njêng nău tâm boh dăch dêh đah gưl ủy, ban tự quản n’hanh kônh wa tâm ƀon.

“Ban tự quản, Bí thư chi bộ n’hanh ăp đồng chí tâm ƀon ri geh nău tâm rgop ƀa ƀơ đah kruanh công an nkual têh, tâm rgâl, mbơh nu nău ƀa ƀơ. Tă bah nĕ kruanh ntŭk kan dơi gĭt ăp nu naư mpeh nău ta ntŭk gay ntop kơl kơt mbơh ƀư ăp nău geh tât đăp mpăn rnă njrăng. Nu nău đăp mpăn ƀon lan, mô geh nău ntoh luh mhe mô lah nău duh jêr đah rnă njrăng ta ntŭk”.

Rnă njrăng đăp mpăn dơi mât nâp, nău rêh nuĭh ƀon lan đăp mpăn. Đah nău uănh mĭn ntop kơl bah ăp ntŭk kan, kônh wa tâm ƀon Ea Kjoh A lơ rhơn mĭn nău ƀư sa, hun hao wăng sa tâm năm mhe. Nô Y Đam Niê, ta ƀon Ea Kjoh A nkoch:

“Rlet rlău jêr jŏt bah Covid-19 ri mpôl hên nsrôih hao ƀư sa, mât chăm tơm tăm, mir ba gay rhŏ hao wăng sa, đăp mpăn nău rêh. Tâm năm mhe ri nsôih đŏng, mpŏng geh du năm mhe ƀư sa sâm geh lơn, pơk hvi tuch tăm, nkra njêng ăp ntil tơm tăm geh săk rnglăy wăng sa gay ntop hao nău geh an rnăk wâl, mât oh kon hăn nti.

Jâng gung bê tông bah năp jay Nhih cộng đồng ƀon Ea Kjoh A săk rnglăy bah nău njêng oh nô ntŭk kan đah ƀon

Ta nkual têh Buôn Hồ aƀaơ geh 11 ngih pah kan, ntŭk kan dơi pă jêng 28 rmôt njêng oh nô đah 28 thôn ƀon. Tă bah nău njêng oh nô lĕ rgop n’hao trong kan rgŏ jă ƀon lan, nkoch trêng an nuĭh ƀon lan ta ăp thôn, ƀon. Wa Nguyễn Thị Khánh Hồng, Groi Trưởng ban Dân vận thị ủy Buôn Hồ an gĭt, gay n’hao trong kan njêng oh nô săk rnglăy, tâm năm bah năp, nkual têh lĕ geh trong nchrăp na nê̆, jao rnoh an ƀư an ăp rmôt njêng oh nô đah ăp nău kan kơt ntop kơl mât uănh kon hŏk ach o rlet rlău jêr jŏt, ntop kơl rnăk wâl hun hao wăng sa, rgŏ jă nuĭh ƀon lan rwăt bảo hiểm y tế, rwăt thẻ bảo hiểm y tế an nuĭh ƀon lan jêr jŏt.

“Trong kan njêng oh nô aơ dơi geh bôk năp lah nău dăch đêp đah gưl ủy Đảng đah n’gâng kan ƀon lan kơt kônh wa ta ntŭk, m’hâm ƀư gay an kônh wa dơi wât Đảng n’hanh Ngih dak uănh mĭn tât kônh wa n’hâm ƀư. Bah meng nĕ he uănh khlay tay mpeh trong kan ntop kơl kônh wa hun hao wăng sa. Nsing nơm kơt mbơh ƀư nău aơ du đêt nar tât mbra geh tay âk rnăk ach o dơi rklaih luh, ntop tay rnôk hen dơi dăch đêp đah kônh wa kơt nĕ trong kan nkoch trêng, rgŏ jă kônh wa tâm nău ndâk njêng ƀon lan mhe mbra uĕh lơn, dơh lơn”.

Nău ƀư njêng oh nô đah ăp ƀon lan ta Dak Lak lĕ nsĭt tay săk rnglăy uĕh, rgop nâp nâl đah trong chính trị bah dâng, rhăt jăp tâm boh hăn ndrel đah ăp thôn, ƀon đah ăp ngih pah kan ntŭk kan. Tă bah nĕ rgop khlay tâm nău mât nâp đăp mpăn mpeh rnă njrăng chính trị, đăp mpăn nău rêh jêng, nâp nâl nău tâm rnglăp rnoi nuĭh.