Tâm ăp nar dja, ndơ Tết ta Dak Lak hŏ ntơm khuh n'gôr. Ta ăp siêu thị, ntŭk rgum tăch rgâl têh, chợ, cửa hàng tạp hóa... ndơ Tết hŏ pla tăch âk ntil, đah ăp săk  ntô uĕh. Gay tŏng an nău ŭch geh rvăt năp bah nuĭh ƀon lan rnôk tết, UBND n'gor Dak Lak ntêm an rlău 1.510 rmen prăk gay rvăt ntêm ndơ.

Hăn ôp uănh ta du đêt ntŭk tăch ndơ ta nkual ƀon têh Buôn Ma Thuột kơt chợ Tân An, chợ Nklang Buôn Ma Thuột, rvăt năp Tết hŏ ntơm khuh n'gôr. Rvăt năp dŭt ơm lah kho ao, jep ntô jot. Ăp ndrơng ndơ tăch bánh, kẹo, mứt, hŏ pla tăch âk ntil, săk ntô uĕh. Yuh Lê Thị Diễm Huyền, nuĭh tăch kho ao ta Chợ Buôn Ma Thuột an gĭt, rnôk dja rnoh âk nuĭh rvăt hŏ ntơm hao đêt, yơn yuh hôm mĭn na nê̆ rnôk rvăt n'glăp ndơ tăch đŏng:

       Năm aơ ntêm du đêt ndơ uĕh, năm aơ Noel đah Tết tâm dăch nsum jêng kônh wa  nuĭh tăch ndơ jê̆ wĭ wă đŏng. Nô nău tăch rvăt năm aơ ri saơ mbơm oi mô lăng peh ngăn ơm."  

          Tĭng yuh Nguyễn Thị Nga, ta phường Tân Hòa, nkual ƀon têh Buôn Ma Thuột, ăp ntŭk tăch rgâl mĭn uănh na nê̆ n'hao ndơ tăch an tâm di  đah ngăn ngăn. Kơt rnăk yuh, bol saơ chợ Tết âk mpưm ndơ tăch, yơn yuh mô rvăt năp âk kơt ăp năm:

          "Gâp saơ ndơ tăch năm aơ âk mpưm ăp ntil ndơ, rnoh khlay ri hao rlău năm e nơh du đêt. Êng săk gâp nơm ri gâp rvăt ăp ndơ dŏng sa khlay,, hôm puăch ka rêh ri dăch kêng Tết mơ gâp rvăt nchrăp an ăp nar 30, nar 1 Tết dơm, hôm nar 2,3,4,5 ri lĕ rngôch ăp chợ hŏ tăch ăp tŏng hôm jêng rnăk gâp mô rvăt ntêm, tâl kât nđik".

Ta siêu thị Co.opmart Buôn Ma Thuột, aƀaơ ndơ dŏng Tết hŏ n'hao âk hôm; tâm nê rnoh ndơ Việt âk 95%. Wa Trần Thị Thành Nhân, Groi Giám đốc siêu thị an gĭt, năm aơ, rlău ma ƀư bôk nău kan đăp mpăn rnoh khlay ndơ, siêu thị geh âk bôk nău kan n'hŭch rnoh khlay dơi dŏng mbro ntơm bah aơ tât Tết.

"Đơn vị hŏ geh trong nchrăp ntêm ndơ tăch đah rnoh hao âk rđĭl đah năm e nơh lah 15%, đơn vị hŏ kan nsum đah ăp tơm nuĭh pă an ndơ tăch geh trong nchrăp ƀư njêng tâm ban kơt n'hao rnoh âk ndơ ntêm gay tŏng ăp ndơ tăch n'hanh âk ntil săk ntô đŏng. Siêu thị Coop mart way ton đăp mpăn rnoh khlay n'hanh thuk rlău bah dih ntơm bah 5 tât 10% nkre ƀư tay bôk nău kan n'hŭch rnoh khlay gay ntop nău geh an nuĭh rvăt dŏng đŏng"

Dak Lak aƀaơ geh 148 chợ, 1 chợ bôk tơm, 8 trung tâm thương mại, siêu thị n'hanh rlău 60 cửa hàng tiện ích n'hanh du đêt cửa hàng tiện lợi. Tĭng wa Lưu Văn Khôi, Giám đốc Sở Công thương n'gor Dak Lak, tơm ndơ Tết năm aơ hao nklăp 56% rđĭl đah năm e nơh. 

"Sở Công thương mpôl hên hŏ pah kan đah ăp ntŭk tơm njêng tăch rgâl, ăp trong tâm pă tăch, ăp siêu thị, Trung tâm thương mại gay đă ăp ntŭk tăch ndơ dja n'hao dăng ƀư njêng tăch rgâl ndơ lôch nê hôm geh trong nchrăp mât dŏng ăp tơm ndơ tăch n'hanh lor nchrăp ntêm nkrem tơm ndơ tăch gay đăp mpăn tŏng ăp an nuĭh rvăt dŏng tâm kêng dŭt năm tâm ban kơt rnôk Tết Nguyên đán Quý Mão 2023".

N'gor Dak Lak geh rlău 1,8 rkeh ƀon lan. Nhih pah kan dơi kan nchroh nău ŭch dŏng ndơ tâm khay tết mbra hao 20% rđĭl đah nar ngăn. Jêng,  UBND n'gor Dak Lak ntêm an rlău 1.510 rmen prăk gay ntêm ndơ tăch. Rmôt ndơ dơi n'gor Dak Lak ntrŏng ân ƀư đăp mpăn rnoh khlay n'hanh ntêm nkrem lah ndơ sa, puăch sŭr djăr, tăp kik djăr, dak ngi, đường, bột ngọt n'hanh ăp ntil bum biăp, play do, dak pring. Aƀaơ, hŏ geh 10 doanh nghiệp têh rdâk njêng trong nchrăp rnă ntêm ndơ dŏng sa, dak pring đah nklăp rlău 420 rmen prăk.

Ntơm bah aơ tât bah năp n'hanh bah kơi Tết Nguyên đán Quý Mão 2022, mpôl kan dơi kan n'gor Dak Lak hŏ ôp ŭanh lhăt ntŭk tăch rgâl gay ngăch ban saơ, rmal ăp nău tih pháp luật kơt ƀư ndranh tăch, nkrâm ndơ tăch, tăch rgâl ndơ rvăt n'glăp ntŭng, mô an tăch, mô gĭt kloh tu tơm luh, mô geh ntô lĭr, mplư rlăm tăch rgâl...

Kruanh rđău kan Cục mât uănh ntŭk tăch rgâl n'gor Dak  Lak an gĭt, dôl an ƀư trong nchrăp rlăch ndăng hô đah mpôl tăch ntŭng ntơ, mplư rlăm tăch rgâl n'hanh ndơ tăch mô gĭt tu tơm luh ăp khay kêng dŭt năm 2022 lĕ ma bah năp n'hanh bah kơi Tết Nguyên đán Quý Mão. Bah meng nê, mpôl mât njrăng ntŭk tăch rgâl ƀư hăn ôp uănh rlău 70 đơn vị lĕ ma, ăp kho mât prăp, ntŭk rgum bun ndơ tăch, ăp trung tâm thương mại, siêu thị chợ bôk tơm, kơp lĕ ma ăp nuĭh geh nău kan tăch rgâl ma trong mạng xã hội... gay rmal lhăt ăp nău tih pháp luật mpeh tăch rgâl, nde tâm rnôk kêng dŭt năm, dăch Tết gay n'hao rnoh khlay mô tâm di.

VOV Tây Nguyên/Nuĭh rblang: Điểu Thân