Dâk uănh dak hoch dôl thăng, wa Rơ Lah Kem ta xă Chư Rcăm, nkuăl Krông Pa, nsôr n’hâm jong rngot: 1 ha neh bah rnăk wâl n’hanh nklăp 100 ha neh bah kônh wa bôn H’Lang lĕ geh dak me Ba “rdu”:

          “Bah năp đaơ, 1 ha gâp geh bah 5 tât 6 tấn. Tât aƀaơ pĭch rlâm lĕ hôm, dak klôn rdu lĕ. Âk jay gŭ ta aơ trơn lĕ hôm, mô hăn mô dơi, ntŭk aơ êp pĭch rlâm lĕ hôm. Âk nuĭh ta aơ hen lĕ hôm”.

          Nuĭh ƀon lan ƀon H’Lang nchrăp trơn tât ntŭk gŭ mhe gay dêr pĭch rlâm.

Wa Hà Văn Đường, Kruanh UBND xă Chư Rcăm an gĭt, rlău 100 ha neh tuch tăm bah kônh wa ƀon H’Lang geh roh ƀhiău, nu nău pĭch rlâm neh dak me Ba dôl ntêt nkri nău rêh rlău 100 rnăk ta aơ. Jâng ntung Lệ Bắc, nthoi 2 xă Chư Rcăm n’hanh Ia Rsươm lĕ geh pĭch rlâm tât n’gâng ntung 2 đah kơh dak.

Gay đăp mpăn an nuĭh ƀon lan, dŭt năm 2020, UBND nkuăl Krông Pa lĕ uănh an nău nchrăp ƀư ntuh kơl ndâk ƀư ndơ dŏng, đăp mpăn ƀon lan gŭ ta ƀon H’Lang, rnoh neh bơi 7 ha gay trơn rlău 102 rnăk nuĭh Jrai tâm nkual geh pĭch rlâm neh. UBND xă Chư Rcăm lĕ geh dăn đă đah nkuăl joi trong mkra pă neh tuch tăm an nuĭh ƀon lan rnoi mpôl đêt geh pĭch rlâm lĕ neh:

          “Aƀaơ, pơng trong hoch tơm bah dak me Ba jêng pơng phah nkual nĕ. Aƀaơ, pơng phah tâm nkual môch n’hanh nkual ƀon lan gŭ jêng an ƀư tĭng nău nchrăp trơn. Pơng khuch dŭt têh, jêng lah roh ƀhiău rnoh neh nĕ dâl ăp rnăk kâng kơh dak me. Nău jêr lah neh tuch tăm bah xă Chư Rcăm mô âk, aƀaơ an rgâl neh n’hŭch neh tuch tăm an kônh wa”.

       Rlău 100 ha neh tuch tăm bah nuĭh ƀon lan ƀon H’Lang lĕ jêng n’glău dak me Ba.

   Wa Hồ Văn Thảo, Kruanh UBND nkuăl Krông Pa an gĭt, nkuăl geh 13 ntŭk pĭch rlâm njok kơh jong nklăp 45 km ntŭk dak me Ba hoch rlău 8 xă, nkuăl têh. Lvang pĭch rlâm hô ngăn geh ta 2 xă Ia Rsai n’hanh Chư Rcăm. Khay bah năp, tâm nău tơm prăk đêt bah nkuăl ach o, ntŭk mhe rgum tŏng ăp đăp mpăn an nuĭh ƀon lan đah nău mbơh ƀư ăp nău nchrăp kan trơn ƀon lan nkual pĭch rlâm. Tĭng nĕ, lvang 2012-2014, nkuăl mbơh ƀư nău nchrăp pă rlău 870 nuĭh ta 4 ƀon bah xă Ia Rsai. Năm 2019, nkuăl nchrăp ƀư tay pă ntŭk gŭ jăch ndăn an 31 rnă, 116 nuĭh ta 2 xă Ia Rsươm n’hanh xă Ia Rsai. Năm 2020 tât aơ tay, ƀư tĭng nău nchrăp kan trơn rlău 102 rnăk ƀon H’Lang. Tât aơ tay, nău pĭch rlâm neh njok dak me Ba hôm e geh ăp nar ma mô dơi mkra gay bah. Wa Hồ Văn Thảo, an gĭt:

          “Bôk năp ri đăp mpăn nău rêh, drăp ndơ bah nuĭh ƀon lan, drăp ndơ ngih dak lah kơl lor bôk năp. Prăk an ƀon H’lang ri an trơn ngăch, lah ƀư rbông âk rhiăng mét lah lĕ rhiăng rmen prăk. UBND nkuăl lĕ geh kơp uănh lĕ gay dăn UBND n’gor, n’gor dăn đă N’gâng kan tuch tăm mât rong n’hanh hun hao ƀon lan”.

  Nău rêh bah nuĭh ƀon lan geh ntêt nkri, neh tuch tăm roh, yơn mô hŏ dơi mkra gay nking n’gang.       

N’gâng kan ƀon lan kơt nuĭh ƀon lan Krông Pa, Gia Lai, mpŏng kâp ăp gưl ăp nău kan bah trung ương tât ƀon lan ơm geh ăp trong mkra lor gay mkra tât dŭt tât lôch nău pĭch rlăm neh dak me Ba, đăp mpăn nău rêh an nuĭh ƀon lan./.