Gay đăp mpăn an năch pâl nđaih rnôk Tết Nguyên đán n'hanh wơt năm mhe 2023, ăp nhih pah kan dơi kan n'gor Dak Nông dôl n'hao dăng hăn ôp uănh, nkoch trêng, mbơh gĭt pháp luật mpeh đăp mpăn hăn trong dak n'glău Tà Đùng – ntŭk dơi uănh lah Vịnh Hạ Long ta nkual Tây Nguyên.

N'glău Tà Đùng – n'glău dak bât thủy điện Đồng Nai 3, ta nkuâl Dak Glong, n'gor Dak Nông, lah ntŭk gŭ rêh bah rhiăng rnăk ƀon lan mât gŭk ka, lơh joi ka ta n'glău n'hanh njŭn leo năch hăn pâl nđaih ma duk mpan. Ta nklang dak bât aƀaơ geh 6 ntŭk mât ka, ăp ntŭk rgum nklăp 4-5 rnăk. Geh mpôl kan dơi kan nkah, ntĭm nti tĭng jăp ăp trong mât đăp mpăn njrăng n'gang bah rmok dak, mât kloh uĕh dak n'hanh mât njrăng bri, wa Bùi Văn Điệp, nuĭh mât gŭk ka ta n'glău Tà Đùng hŏ 3 năm aơ, nkoch:

Mât tui ka ri lor bôk năp he  ân mât kloh uĕh dak, ăp ntil ndơ ân mât kloh uĕh da dê. Hôm đăp mpăn hăn trong dak ri he ân mât đăp mpăn đŏng, ntĭt kơt nsoh ao đông, nkhêp geh ntil nău ri uĕh an săk nơm đŏng. Hôm mpeh  bri ri ta aơ bu nkoch trêng mbro, he lơi dĭng kăl si, yor aơ lah mbri gưl neh dak, nkual mât ndray.

Ndrel đah 6 ntŭk mât ka gŭk, n'glău Tà Đùng hôm geh 3 ndrâm duk đăng ký njŭn wơt năch đŏng. Ƀan đăp mpăn hăn ntung trong n'gor Dak Nông hŏ ƀư ôp uănh siƀŭt đăng ký, đăng kiểm duk, ăp ndơ ntrŭp dŏng đăp mpăn kơt ao đông, ndơ wơt kơl, têk hao rnôk ngâm, ndơ njrăng n'gang ŭnh sa...wa Trần Quốc Long, giám đốc du công ty pâl nđaih ta aơ, an gĭt:

Ăp nuĭh ƀĭt bah mpôl hên hŏ an hăn ntĭm nti, dơi pă an siƀŭt kơp dơn kruanh duk mpan ƀit duk rdeng năch pâl nđaih. N'hanh ăp nuĭh kan hŏ dơi hăn kơi năp nti mpeh pâl nđaih tă bah Sở Văn hoá Thể thao n'hanh pâl nđaih Dak Nông ƀư. Mpôl hên dŭt mpŏng UBND n'gor n'hanh ăp n'gâng kan nta trong dơh an ăp doanh nghiệp ta nkual Tà Đùng lah pơk dơi jrô nti pă an siƀŭt kơp dơn nău dơi ƀit duk mpan gay ăp nuĭh dơi tât nti n'hanh n'hao nău gĭt blău bah he gay rhŏ dŏng an năch pâl nđaih.

 Tĭng nchih rgum bah nhih pah kan dơi kan, ta n'glău Tà Đùng - thủy điện Đồng Nai 3 n'hanh 4 (nkuâl Dak Glong) geh 34 bôk duk pâl nđaih, mpŭn n'hanh xuồng máy ƀơch rgơm dôl dŏng. Lôch hăn ôp uănh, mpôl kan dơi kan saơ du doanh nghiệp geh 4 bôk duk pâl nđaih lĕ nar đăng kiểm. Rlău ma nê, hôm geh duk mpan mô hŏ đăng ký. Tĭng wa Lê Đình Hải, Groi kruanh Jrô kan mât uănh duk mpan n'hanh nuĭh ƀĭt - Sở Giao thông vận tải Dak Nông, aơ lah nău jêr nkra đah n'gâng kan ta ntŭk rnôk dŭt âk duk mpan lah nuĭh ƀon lan pâng êng, mô tŏng nău dơi đăng kiểm:

Sở Giao thông Vận tải way kan nsum đah ăp nhih  pah kan geh tât nău dơi kan n'hao dăng pah kan nkoch trêng, ntrŭt ntrôl rgŏ jă nuĭh ƀon lan nkra bah ăp duk mpan mô tŏng nâp uĕh gay ƀư đăng kiểm, đăng ký nchuăt dŏng tĭng nău way. Nkre nhih pah kan đăng kiểm lah Chi cục đăng kiểm mbrô 5 ta Nha Trang kan nsum uĕh đah n'gâng kan ta ntŭk way ntĭm nti nuĭh ƀon lan đŏng yơn ăp duk mpan dja nuĭh ƀon lan pâng êng, mô geh hồ sơ jêng mô tŏng ntŭk nsing gay đăng kiểm.

Bah meng nău ntĭm nti nuĭh ƀon lan ƀư đăng ký, đăng kiểm duk mpan tĭng nău way an, pă ao đông an ăp rnăk ka gŭk n'hanh gŭ rêh meng n'glău dak bât, ăp n'gâng kan dơi kan ta Dak Nông way hăn ôp ŭanh mbro, nkoch trêng, nkah mât đăp mpăn an ăp nău kan ta n'glău Tà Đùng. Tĭng nê đă nuĭh tơm duk mpan, duk rdeng nuĭh pâl nđaih lhăt bêng ir, rlău rnoh nuĭh an rdeng; nsrŭng kât duk mpan di ntŭk way an; đă năch nsoh ao đông rnôk hăn nklang dak bât...

Dơi uănh lah Vịnh Hạ Long ta dor yôk bah Tây Nguyên, yơn nău kan pâl nđaih ta n'glău dak bât Tà Đùng hôm ntoh êng. Bol tât aƀaơ mô hŏ geh nău tât rmoh rmanh yô̆ nđach, pâl nđaih Tà Đùng ân leo ƀư mât bôk kan lhăt n'hanh ăp tŏng rêng gay đăp mpăn lơn an năch pâl nđaih.

Bah năp Tết nguyên đán Quý Mão, Thủ tướng Chính phủ hŏ geh siƀŭt njuăl mpeh mât đăp mpăn hăn ntung trong rnôk Tết. Tâm nê, Thủ tướng Chính phủ đă ăp n'gor n'hao dăng hăn rsong uănh, rmal  lhăt ăp nău tih đăp mpăn hăn ntung trong, trong loih, trong dak. Rmal ăp nuĭh mô nsoh ao đông rnôk hăn duk mpan; duk mpan mô rvăt năp ăp tŏng ao đông, nuĭh ƀĭt duk mpan mô geh bằng, mô geh siƀŭt kơp dơn an ƀĭt, siƀŭt way an kan tâm di...Ôp uănh nău tĭng ƀư quy định pháp luật mpeh mât đăp mpăn hăn ntung trong ta ndrâm nsrŭng năch rkăng dak me, ndrâm nsrŭng duk năch pâl nđaih, ăp mbor n'hong trong dak, lơn lah ăp trong rdeng năch bah kơh hăn tât ăp gôl dak,  ăp trong dak me n'hanh nkual dak geh ƀư lễ hội.

VOV Tây Nguyên/Nuĭh rblang: Điểu Thân