Rƀŏng tât nkah ndray 80 năm nar njêng Tahen ƀon lan Việt Nam druh ndăm n’gor Kon Tum dôl ƀư âk nău kan geh nkô̆ khlay gay ntĭm nti nău way ơm rŏng dak n’hanh ntik n’hao nău khlay kan bah rơh druh ndăm tâm rdâk njêng ƀon tơm. 

Ta nkual têl ơm yău cách mạng Căn cứ Tỉnh uỷ Kon Tum ta xã Măng Ri, nkuâl Tu Mơ Rông, rlău 100 đoàn viên druh ndăm ăp đơn vị: Tỉnh đoàn Kon Tum, Sư đoàn 10, Bộ Chỉ huy Quân sự n’gor, Bộ Chỉ huy Tahen n’har bri n’gor n’hanh Công an n’gor hŏ ndrel mpoh nhang, n’hơr an kao si mpơl nuih n’hâm nkah gĭt jru ăp rơh kơn cách mạng. Nkhêp geh rnôk dja ta thôn Mô Po, xã Mường Hoong, nkuâl Đăk Glei, druh ndăm 5 mpôl kan n’gor Kon Tum hŏ kơl an ntŭk ƀư “Gâl trong druh ndăm mpoh ang” an 30 rnăk ƀon lan Xơ Đăng. N’gâng geh lĕ rngôch 28 ŭnh măt nar rnoh khlay 50 rkeh prăk kơl nuĭh ƀon  lan dơh ngăch lơn rnôk hăn trong măng.