Tât aƀaơ, bar pe jât nai ntĭm ta nhih nti THPT Pleime, ta xã Ia Ga, nkuâl Chư Prông n'gor Gia Lai, nha mô hŏ trok lĕ rnoh prăk ntop kơl rlău 800 rkeh prăk, lah nău way kơl an nai ntĭm pah kan ta ăp nkual dŭt jêr jŏt mha êng. Nguyễn Thế Hùng- Hiệu trưởng Nhih nti THPT Pleime, xã Ia Ga, nkuâl Chư Prông an gĭt, 27 cán bộ, nai ntĭm bah đơn vị geh rnon prăk ntop kơl tâm 6 khay, ntơm bah khay 7 tât khay 12/2021, đah lĕ rngôch rnoh prăk lah 837 rkeh prăk.

Ntơm bah bôk năm tât aƀaơ, nhih nti hŏ âk tơ̆ njuăl siƀŭt dăn đă tât Sở Giáo dục n'hanh Đào tạo n'gor Gia Lai n'hanh Liên đoàn Lao động n'gor Gia Lai mĭn uănh, yơn mô hŏ dơi nkra. Dơi gĭt, nkô̆ bah nău mbrơi trok prăk kơl an nai ntĭm nhih nti THPT Pleime lah tă bah Sở mbrơi dơn siƀŭt n'glêh an bah Ủy ban Dân tộc mpeh uănh an săk ăp thôn dŭt jêr jŏt mha êng tâm nkual rnoi  mpôl đê̆ n'hanh mpeh yôk yang lvang năm 2021-2025. Nău dja jêng tât mô năn rgâl di trong kơl tâm 6 khay kêng dŭt năm 2021 an cán bộ, nai ntĭm bah nhih nti THPT Pleime.