Gia Lai lah n'gor geh trong rse điện têh jong n'hanh dŭt uĕh mhe nkual Tây Nguyên. Gay n'hao rnoh dăng n'hanh rnoh đăp mpăn lam njăr trong rse dja, ăp đơn vị mât dŏng hŏ tĭng ƀư âk trong nkra gay đăp mpăn soih aih njăr trong mât dŏng trong rse điện rlău ăp nkual ƀư njêng n'hanh ƀon lan gŭ; ntrôl dŏng âk công nghệ uĕh mhe, hăn tât rdâk njêng n'hanh hun hao trong rse điện đăp mpăn.

 Gia Lai geh trong rse điện 500KV n'hanh 220kv jong bơi 800km, hăn rlău âk mir ba nkual ƀon lan rnoi mpôl đê̆. Nơm geh nkoch trêng mbro mpeh mât đăp mpăn soih aih an trong rse điện jêng kônh wa gĭt êng dŭt kloh nău dơn kan, nsum ti ndrel n'gâng kan điện mât njrăng soih aih an n'gâng điện n'hanh trong rse điện. Nô Rmah Chơn, ƀon Breng 2, xã Ia Dêr, nkuâl Ia Grai, n'gor Gia Lai geh 2 ha cà phê dăch kêng trong rse điện 500kv an gĭt:  

"Gâp geh mir cà phê ta nâm trong rse điện, săk gâp nơm n'hanh rnăk wâl way tĭng jăp ăp nău way mpeh mât đăp mpăn soih aih trong rse điện. Bah nê gâp n'hanh rnăk wâl ndrel nkoch trêng an kônh wa tâm ƀon lan mô dơi ƀư ntŭng rmuănh, ăp rnăk geh mir cà phê, tơm tăm ta nâm trong rse điện ri ân way tĭng jăp ăp nău way mpeh soih aih an trong rse điện".  

          Mpeh Truyền tải điện Gia Lai, nhih pah kan way hăn rsong ŭanh đăp mpăn lam njăr trong trong rse điện, ntuh kơl ndơ dŏng mpăr UAV gay n'hao nău dơi tam hăn rsong uănh, jut rao sứ trong rse điện lĕ ma ti n'hanh ma công nghệ Hotline gay hŭch bah ir jŏ mông koh điện. Lơn lah ta ăp trạm biến áp, công nhân viên n'hanh nuĭh kan bah nhih pah kan way tĭng jăp gŭ kâp njrăng, mât nkra, ăp ntŭk  mpơl mha êng bah ndơ ntrŭp nthoi. Nô Trần Văn Trang, Kruanh mpôl pleh mông kan tơm  ta trạm biến áp 500 kV Pleiku 2, Truyền tải điện Gia Lai, lah:

"Tâm khay dja têk dŏng ăp trong rse biến áp dŭt duh jâk, rlău 80 tât 90% da dê jêng oh nô tât mông pleh kâp njrăng dŭt ŭanh khlay tât nkô̆ nău dja n'hanh ân tĭng groi nđôi grêt dêh. Rnôk têh dŏng duh âk ri geh ma nău khuch tât ndơ ntrŭp dŏng, mbra ƀư jêng duh n'hanh ntoh ăp nău tât rmoh  rman tâm rnôk nchuăt dŏng. Aƀaơ lam trong máy tính mpơl ăp tŏng lĕ rngôch, nuĭh kâp njrăng mbra pơk uănh ta trong máy tính n'hanh ôp ŭanh lam lĕ rngôch nău dăng nchuăt dŏng bah ndơ ntrŭp nthoi. Lĕ rngôch moh geh ntil nău njuăl tât máy tính da dê jêng nău nchuăt dŏng mbra dơi tĭng groi nđôi ngăch lơn, năl saơ nău tât khuch ngăch lơn.

Tĭng wa Trần Khánh Trung, Groi giám đốc Truyền tải điện Gia Lai, ndrel đah 783 km trong rse 220kV n'hanh 500Kv, nhih pah kan hôm dơn mât dŏng 2 trạm biến áp 500kV, 1 trạm biến áp 220Kv đŏng. Nhih pah kan nchrăp dŏng lor kỹ thuật mbrô, ntuh kơl ndơ ntrŭp dŏng têh mhe tĭng rêng mât uănh, nchuăt dŏng. Lôch nê, bah ir roh huach prăk dŏng kan n'hanh n'hao ngăch dăng pah kan: 

Tâm năm 2022, công ty truyền tải điện 3 lah đơn vị lor bôk năp tâm tổng công ty hŏ n'glăp dŏng geh nău ndeh păr mô geh nuĭh ƀĭt UAV tâm pah kan mât dŏng trong rse điện. Đề tài gŭ mĭn rdâk njêng trong mât dŏng trạm biến áp ma ndơ pet lât bah ngai gay bah ir dŏng âk jâng ti kan. Ăp đề tài dja rnôk n'glăp dŏng hŏ rgâl dơi trong kan ƀư ma jâng ti jêng dŏng công nghệ thông tin jêng geh nău dơi an pah kan ndơ̆ rgâl mbrô lvang năm 2021 – 2025 bah Tổng Công ty Truyền tải điện gưl neh dak lah nsum bah Công ty Truyền tải điện 3 lah êng"./.

Hoàng Qui/Nuĭh rblang: Điểu Thân