Ntơm bah năm 2015 tât aƀaơ, n’gor Gia Lai hŏ hŭch 189 nhih pah kan ngih dak n’hanh n’hŭch rlău 1.500 biên chế sa prăk khay ngân sách. Nău dơi geh dja kơl glêh tam nuĭh kan, hŭch đêt roh huach prăk ngân sách, nkre n’hao săk tam rhŏ dŏng nău kan. Aơ lah nău lư dơi mbơh ta Tâm nchră n’glôch jêh bôk nău kan mbrô 64 năm 2018 bah Ban Thường vụ Tỉnh ủy Gia Lai, ƀư ôi 29/11. Siƀŭt mbơh ta rnôk tâm nchră an saơ, ntơm năm 2015 tât aƀaơ, Gia Lai hŏ nsrôih dăp rgum, n’glăp n’hanh nchrai ăp nhih pah kan ngih dak kan mô geh nău tam mô lah geh nău dơn  kan tâm trŭp. Kêng dŭt, n’gor hŏ hŭch 189 nhih pah kan ngih dak, tâm ban đah 17,5%.

Tât kêng dŭt khay 6/2024, lam n’gor hôm 891 nhih pah kan ngih dak. Tâm trong kan ntĭm nti- geh rnoh dŭt âk tâm lam n’gâng kan ngih dak- n’gor hŏ hŭch 86 nhih nti mầm non n’hanh phổ thông, ndrel 406 ntŭk rgum nti. Mpeh dak si, n’gor dăp rgum tay ăp ntŭk rgum kan dak si nkuâl nkual ƀon têh, hŭch 24 bôk kan. Ăp nhih pah kan văn hóa, thể thao dơi dăp rgum glêh tam, hŭch rlău 39% bôk kan gưl nkuâl. Đah nău nsrôih tĭng ƀư jăp ăp nău đă bah Trung ương, Gia Lai hŏ ƀư lôch jêh uănh an ăp đề án ntŭk gŭ pah kan ta ăp nhih pah kan ngih dak tâm năm 2023, njêng ntŭk nsing an nău n’hŭch đêt biên chế n’hanh dăp rgum tay nuĭh kan. N’gor dôl an ƀư ăp trong nkra gay ntrŭt ntrôl dăng dăp rgum n’hanh rgâl mhe lam trong ƀư, đăp mpăn geh nău tam n’hanh mô ƀư khuch tât săk tam rhŏ dŏng nău kan.