Kêng măng 28/10, ta Nhih pah kan Chính phủ, Groi Thủ tướng Lê Văn Thành wơt Mpôl thanh tra bah Tổng Vụ ăp nkô̆ nău mpeh dak lêng n'hanh tui ka  - Ủy ban Châu Âu (EC) lôch mpôl hăn uănh na nê̆ mpeh nău nkra bah nău mbơh njrăng lor mpeh lơh joi tui ka mô geh nău way, mô mbơh n'hanh mô tĭng di nău way an (IUU) ta Việt Nam. 

Ta rơh wơt, Groi Thủ tướng Lê Văn Thành lah rjăp, Việt Nam hŏ n'hanh dôl nsrôih dŭt âk gay nkra dŭt uĕh ăp nkô̆ nău dăn đă bah EC đah nău ntrôl rŭch n'hanh dŭt bah lơh joi IUU rƀŏng tât hun hao n'gâng kan lơh joi tui ka jŏ jong, geh nău dơn kan, geh mât njrăng. Groi Thủ tướng dăn đă EC n'hanh ăp dak lăp kan nsum EU tâm boh tay lhăt n'hanh ntop ngăch năn ngăch kỹ thuật, mĭn tât nău mha êng bah n'gâng kan lơh joi ka Việt Nam tâm nău tĭng ƀư nău njrăng đă bah EC mpeh IUU. Dăn đă EC nchih nkah ăp nău nsrôih rdâng lơh joi IUU n'hanh ăp nău tâm ton nsrôih uĕh bah Việt Nam hŏ dơi geh n'hanh ơm ntlơi jăng nău nkah njrăng lor an Việt Nam. 

VOV/Nuĭh rblang: Điểu Thân