Aƀaơ lam n'gor Dak Lak geh 942 nuĭh geh nsing nơm nkual rnoi mpôl đê̆. Tâm nê, lơn âk lah bu klô, đah 889 nuĭh, hôm bu ur 53 nuĭh dơm. Yơn nuĭh geh nsing nơm hŏ geh âk nău rgop khlay tâm nău hun hao wăng sa- rêh jêng kon nuĭh, đăp mpăn rnă njrăng ta ntŭk. Tâm rnoh nê geh wa H’Bliăk Niê -nuĭh bu ur geh nsing nơm ta buôn  Kram, xã Ea Tiêu, nkuâl Čư Kuin.

Rah rơch, way lĕ nuih n'hâm kơl nuĭh ach o jêr jŏt lah nău uănh năl bah âk nuĭh ta Buôn Kram, xã Ea Tiêu, nkuâl Čư̆ Kuin, n'gor Dak Lak rnôk nkoch mpeh wa H’Bliăk Niê (Amĭ Bơ̆ng). Lah nuĭh tă ƀư Groi kruanh UBND nkuâl Čư̆ Kuin, rnôk rlu ranh, wa H’Bliăk Niê dơi nuĭh ƀon lan sơch ƀư nuĭh nsing nơm bah buôn Kram. Păng nsrôih râng pah kan nkra nău tâm rkeh tâm  dâng, rgop êt lhăt tâm rnglăp ƀon lan.wa H’Bliăk Niê nkoch:

"Gâp way hăn ndrel ăp kruanh thôn rgŏ jă kônh wa jăp gơih pah kan jan sa hun hao. Gĭt trong mât chăm tơm cao su, cà phê, mât sŭr, ndrôk gay nsĭt geh wăng sa, mât nti oh kon tât lôch tât dŭt. Kơt nê mơ geh nău rêh uĕh lăng let năp tay. Tâl bar gâp rgop suan ndrel xã, thôn ƀon ntĭm nti kônh wa mât rup uĕh văn hóa rnoi nuĭh he nơm kơt tŭr chĭng goh gong, ăp lễ hội bah rnoi nuĭh he nơm rdâk tay gay an kon său gĭt mpeh nău uĕh êng bah rnoi nuĭh he".

Tât aƀaơ, xã Ea Tiêu hŏ tât di rnoh rdâk njêng ƀon lan mhe. Rĭng nsĭt geh tĭng bôk nuĭh năm 2022 bơi 45 rkeh prăk. Ntŭk ntô ndơ dŏng ntung trong mbluh hăn tât thôn dơi mon nâp uĕh. Lam xã geh 14 jay rgum nsum ta thôn n'hanh 7 jay rgum nsum ta ƀon. Geh dơi nău dja, ndrel đah ăp gưl n'gâng kan, nsum mpôl bah nkuâl tât xã, geh nău rgop bah wa H’Bliăk Niê way ƀư jăp pah kan nkoch trêng gay nuĭh ƀon lan wât dơi nău khlay bah nău rdâk njêng ƀon lan mhe. Yơn lah, wa H’Bliăk Niê hôm mĭn rvê đŏng lah săk tơm văn hoá dôl geh hŭch hêng mbrơi.

"Gâp saơ geh ăp jêr jŏt kơt, nău rêh aƀaơ êng đah kăl e nơh, aƀaơ nău rêh ma drăp ndơ hun hao lơn, yơn âk nuĭh ntlơi chuêl văn hóa bah rơh u che he ntlơi an tay. Rlău ma nău nsrôih wăng sa hôm mô hŏ jêng geh, hôm geh du đêt nuĭh mpơl nuih n'hâm kâp nơm tâm nău ntop kơl bah ngih dak đŏng. Gâp nsrôih rgŏ jă gay kônh wa he jăp gơih pah kan jan sa, mô geh nău kâp nơm tay tâm nău ntop kơl bah nuĭh êng"

Lah nuĭh gĭt wât pháp luật, ơm geh nău tă ơm gĭt pah kan âk năm, rnôk plơ̆ sĭt đah ƀon lan, wa H'Bliăk Niê way nkah kônh wa way tĭng jăp gung trong bah Đảng, Ngih dak. Păng way nkah kônh wa mô djăt tĭng nău bu nsŭk nsôr, têk klônh, ân way tâm rnglăp, tâm rŏng tâm kơl nsum jut jăng ji ngot, n'hŭch ach o.

"Gâp ŭch rŏng ƀon lan he geh nău hun hao, n'hŭch ach o, nsan hao tâm nău rêh, kon său kơt nti tât lôch tât dŭt. Rgŏ jă kônh wa mô djăt tĭng nău bu têk klônh nsŭk nsôr rdâng lơh Đảng ngih dak, way rêh n'hanh pah kan tĭng pháp luật. Tâm ƀon lan he way jăp gơih, tâm rnglăp ndrel rdâk njêng ƀon lan he geh ndrŏng".

Wa Hà Huy Quang, Groi Ban Dân tộc n'gor Dak lak an gĭt, ăp nuĭh bu ur geh nsing nơm tâm ƀon lan rgop dŭt têh tâm nău rdâk njêng wăng sa- rêh jêng kon nuĭh tâm ƀon lan rnoi mpôl đê̆. Nău ngơi bah ăp nuĭh bu ur geh nsing nơm geh nău ring tam lơn, gay ƀon lan djăt tĭng lơn, gay ƀư dơi uĕh mpeh nkô̆ nău leo trong ƀon lan tâm dâng tâm ban kơt hun hao wăng sa rêh jêng kon nuĭh ta nkual ƀon lan rnoi mpôl đê̆, nar lơn ma uĕh, nsĭt geh nău tam lơn.

"Aƀaơ rmôt nuĭh geh nsing nơm lah bu ur tâm nkual rnoi mpôl đê̆ ta n'gor ri mô di lah geh âk, yơn ma đah nău  mha êng bah ăp rnoi mpôl đê̆ ta nkual Tây Nguyên rêh nău way tĭng jăt ur, ri nău ngơi, ntŭk gŭ kan bah bu ur geh nsing nơm dŭt khlay, lơn lah tâm nău ntĭm nti oh kon, rnoi deh keh na, rnăk wâl, mât ndray n'hanh mpư n'hao ăp rnoh khlay văn hoá, săk tơm văn hoá rnoi mpôl đê̆. N'hanh nău rdâk njêng n'hanh hun hao wăng sa rêh jêng kon nuĭh, rdâk njêng nău rêh văn hoá, ri nău ngơi, chữ nchih tâm ƀon lan ăp rnoi mpôl đê̆ dŭt khlay.  

Đah nău rgop an ƀon lan, wa H’Bliăk Niê rhơn n'hao dơi Ban dân tộc n'gor Dak Lak ntăm an bằng khen lah nuĭh nsing nơm geh nău dơi ngăch prăl tâm pah kan nkoch trêng, rgŏ jă ƀon lan rnoi mpôl đê̆ râng hun hao wăng sa- rêh jêng kon nuĭh, mât đăp mpăn rnă njrăng, mât ndray săk tơm văn hóa n'hanh tâm rnglăp rnoi nuĭh.

H’ Zawut Byă/VOVTâyNguyên/Nuĭh rblang: Điểu Thân