Hợp tác xã lŏ mir công nghệ mhe Liên minh Farm yor Tô Linh Bình, 29 năm deh ƀư Kruanh Hội đồng Quản trị nkre ƀư Kruanh geh ntŭk kan ta thôn 5, xă Hà Mòn, nkuăl Đăk Hà, n’gor Kon Tum. Ndrĭ yơn HTX lŏ geh ntŭk nkra njêng ta âk ntŭk tâm n’gor, kơt Đăk Hà, Ngọc Hồi, Đăk Tô, Kon Rẫy, Sa Thầy, nkual ƀon têh Kon Tum n’hanh n’ăp ta n’gor băl Gia Lai. Gay jăng tâm ƀah ntŭk kan, njêng nău tâm rgop, boăt nthoi rjăp đah ăp nuĭh kan, nô Tô Linh Bình an gĭt, lĕ rngôch 30 nuĭh an gĭt mpeh công nghệ thông tin:

 “Công nghệ thông tin djôt tât nău dơh ngăn n’hanh mô dơi mô geh tâm lŏ mir. Ăp băl ta xă boăt nthoi đah Zalo, Facebook, jêh nĕ ƀư ăp rmôt tâm điện thoại, ta trang êng nơm. Njêng fanpage dơi ƀa bơ joi uănh ăp rup ndah, ăp nău mbơh, video mir jay gay an kônh wa ndrel lăp tâm pă nău blău ơm”.

Nô Tô Linh Bình (đah ma) mât uănh nău kan nkra njêng bah ăp nuĭh Hợp tá xã bah ngai.

Tĭng Tô Linh Bình, nô nsrôih joi tât đah lŏ mir  kloh uĕh yor nău ƀư ngăn bah săk nơm, rnôk gŭ ur an rêh đah mir tơm sa play ƀô dak si tơm tăm. Rnôk lĕ dơi uănh jêng trong hăn mhe, nô nkoch nău ŭch an âk nuĭh ƀon lan, du trong hăn lŏ mir kloh uĕh gay mât njrăng săk nơm n’hanh mât njrăng nsum mpôl. Aƀaơ, 30 HTX lŏ mir công nghệ mhe tâm rgop Farm dôl tăm rlău 50ha cà phê, rlău 70ha sầu riêng ndrel âk ha tơm sa play, tĭng rjăp trong tăm hữu cơ sinh học. Nău mbơh mpeh mir tơm tăm bah tĭng nuĭh kan ndrel ƀa ƀơ dơi joi tâm rmôt. Bah năp ăp nău ntoh hao kơt tu ndrŭng, tơm geh nău mô uĕh ăp nuĭh dơi mbơh ntĭm, ntop kơl ngăch bah ăp nuĭh blău ơm tâm HTX. Nô Lê Quốc Hòa, jay ta thôn 2, xă Đăk Ui, nkuăl Đăk Hà an gĭt, nău dơh bah ăp nuĭh HTX lah dơi gĭt nău ntop kơl, kơl bah ngai n’hanh ăp rnôk:

“Gâp tăm 2ha sầu riêng tâm srah đah play đŭr. Ƀư mpeh sinh học ri saơ đăp mpăn ntop uĕh đah ntŭk ntô. Tă bah mạng xã hội lah dŭt dơh. Geh rnôk he geh nău ri he kuăl tă bah facetime he tâm ôp tă bah nĕ. Moh nău ŭch he kuăl tâm du rmôt nĕ ri rnôk nĕ oh nô dŭt n’hâm ntop kơl ngăch”.

          Mir sầu riêng 3 năm bah du hê Hợp tác xã ta xă Đăk Ui, nkuăl Đăk Hà.

Aƀaơ ăp ndơ cà phê, sầu riêng ndrel du đêt ntil tơm sa play bah Liên minh Farm lĕ mô tŏng nău ŭch bah ntŭk rwăt.

Lĕ ndrel rlet rlău lvang jêr, ăp nuĭh HTX aƀaơ lŏ dôl tâm rgop ndrel ƀư tĭng ăp trong nchrăp uĕh n’hanh ông lơn an ntrong kan lŏ mir hữu cơ. Ta năp măt HTX pơk hvi rnoh neh tăm tŏ êng, nkre dăn mrô nkual tăm gay ndơ dơi hăn ngai. Ndrel đah nĕ dŏng công nghệ joi uănh tâm rnôk mât chăm, uănh nđôi tĭng mir gay nuĭh dŏng dơh joi tu tơm, n’hao rnoh uĕh văn hóa bah tĭng ndơ. Lah mpeh nuĭh djôt bôk, leo an HTX lŏ mir công nghệ mhe Liên minh Farm Tô Linh Bình, nô A Xây, Groi Bí thư rnâng kan N’gor đoàn Kon Tum an gĭt:

          “Tâm nkra njêng lŏ mir kloh uĕh, Tô Linh Bình geh âk ntrong kan, âk nău rgâl mhe n’hanh lơn lah geh nău tâm pă đah đoàn viên druh ndăm, nta an nău kan an đoàn viên druh ndăm jêr jŏt. Tâm ăp năm mhe rlău nô Bình lĕ dơn âk ndơ rnê nkhôm”.

Tâm rgâl nău blău ơm nglăp trong tŏ dak hoch êng.

Năm 2022, đah Hợp tác xã lŏ mir công nghệ mhe Liên minh Farm mhe n’hanh săk rnglăy, nô Tô Linh Bình dơi dơn lap têh, đah ndơ rnê nkhôm Lương Định Của an nuĭh kan lŏ mir mom-doanh nhân rdâk njêng nău kan lŏr mir nkra njêng lam dak. Tâm năm 2022 đŏng Tô Linh Bình dơi UBND n’gor Kon Tum an ndơ rnê nkhôm Nuĭh mom ntoh lư n’gor Kon Tum tâm nău pah kan, nkra njêng tăch rgâl./.