Me păng deh tâm du rnăk vâl mâp âk nau jêr tâm xã nkuăl jru Dà Knàng, nkuăl Đam Rông, n’gor Lâm Đồng. Ka Huệ rlu nti rnôk dôl tât jrâu 11, gŭ tâm ngih pah kan kơl an mhe Mbŏ. Dôl tât 17 năm, bu ur mom Ka Huệ gơih ngăn tâm nau pah kan jan sa kŏ kơt lah râng nau kan druh ndăm

            Tâm xã Dà Knàng neh ntu, bri n’ik tâm di đah tơm prit Laba. 3 năm bah năp, ntŭk ƀư tâm boh nau tăm prit Laba Dạ Knàng geh ndâk tâm nkual, Ka Huệ sŏk rlau 5000m2 neh gay ma tăm nsum tâm boh bah bu. Kŏ lah rnôk aơ, Ka Huệ nơm ƀư công ngân ta aơ nkre, đah prăk khay 7 rkeh du khay. Păng hôm jă tay 4 nŭih mom tâm xã lăp pah kan nsum, ndrel geh prăk khay. Êng mông hăn pah kan, Bí thư Chi Đoàn thôn Pul, Ka Huệ ndăn rgum druh ndăm tâm ƀoh gay rƀŭn rgum nkoch mbơh ăp nau ntrŭnh bah Đảng, pháp luật bah Ngih dak, nkre ƀư ăp nau kan hun hao văng sa geh săk tam:

             ‘Tâm nau kan nkoch mbơh ri hên mro kơt tĭng ăp nau ntĭm nti bah du têh ân an rơh mom. Ntơm bah nê hên lŏ ntĭm nti ân ăp nŭih druh ndăm tâm ƀon lan tĭng trong ntĭm jŏ jong mra geh dơi. Joi ăp nau kan gay ma rgum rƀŭn druh ndăm tâm ƀon ân geh tâm rnglăp, der nau ƀư tih pháp luật. Tât lôch khay, Đoàn druh ndăm ƀư rƀŭn du tŏ gay ma rgop nau mbơh, nkoch ăp nau kan ueh tam ngăn gay ma dơi leo nsĭt nau săk tam ân ăp đoàn viên. Kơt lah săk gâp ri ân geh ntrŭnh ƀư ân geh săk tam lor gay ma ân đoàn viên kơt tĭng. Tâm aơ ri phung hên dôl ma ƀư nau kan tăm tơm ndrŭng brai, ndrel rnôk aơ du sào tơm n’ha ndrŭng brai ri geh nklăp ntơm 7 tât 10 rkeh prăk tâm du khay”.

            Lah bu ur Bí thư Chi đoàn druh ndăm blau, Ka Huệ hôm lah nŭih nai pă dak si ân thôn, ƀon, nkre lah nŭih mbơh ƀư mpeh rnoh nŭih deh nse đŏng. Thôn Pul, xã Dà Knàng geh 120 rnăk, đah nklăp 120 rnăk, đah 80% lah rnoi K’ho. Yor tâm nkuăl jru, ngai ri ma hôm âk nau rluk mâl ngăn. Ka Huệ hŏ nsôih nkoch mbơh gay ma kônh wa jut jăng lơi nau rlu ơm kơt lah: Tâm gŭ uê sai bah ơm, tâm gŭ tâm dăch dak mhem, n’hao nau blau tâm nau njrăng, rdâng srê, sa duh ngêt sĭn, răk kloh ntŭk ntu:

            ‘Gâp lah Bí thư Chi Đoàn thôn Pul, nkre ƀư nau kan êng. Bah năp nơh ê geh nŭih mbơh mpeh nau deh nse, ê geh nkoch mbơh ri nau tâm gŭ ur sai ơm, tâm dăch dak mham âk ngăn tâm nkuăl aơ, kơt lah: tâm gŭ kon kônh kon yơ gay ma mô roh rnoi deh. Yơn ntơm bah rnôk geh nau kan nkoch mbơh ri kônh wa geh kơt tĭng đŏng, nau kan aơ geh n’huch ndrel n’huch âk ngăn. Druh ndăm gŭ ur sai ri lah rnoi êng, kơt lah rnoi Yuăn, rnoi Cil ndrel ăp rnoi êng êng...Mô hôm nau deh kon tal 3, deh kon tal 4 kơt bah năp nơh ôh, ma rnôk aơ ri kônh wa hŏ blau deh kon knŭng 2 hê gay ma nơih mât rong ân ueh. Rnôk geh srê ji, bonh đă kônh wa hăn chuh n’gang ri kônh wa kơt tĭng ueh ngăn”.

            Đah nau nsôih jŏ nâp, nau blau mĭn nau kan rjăp, bôk năm aơ, Ka Huệ rhơn geh rnglăp Đảng Cộng sản Việt Nam. Wa Mbon K’Thơm, Groi Kruanh UBND xã Dà Knàng, nkuăl Đam Rông, n’gor Lâm Đồng mbơh: Tâm ăp năm rlau aơ, Ka Huệ hŏ nchrăp tâm rgop đah ăp ntŭk kan tâm thôn, xã ntrŭt dăng nau kan mhe ân kônh wa tâm ƀon lan gay ma ƀư rgâl nau mĭn, nau kan. Ngăn lah hom nkoch mbơh gay ma bu jut jăng lơi nau tâm vay ơm tâm gŭ ur sai tâm dăch dak mham. Ntrŭnh ƀư ân geh săk tam nau kan ndâk njêng ƀon lan mhe tâm nkuăl, mpeh săk Ka Huệ nơm, kŏ kơt lah thôn Pul hŏ rgop ngăn tâm ăp nau kan, rgop leo xã Dà Knàng jệh lôch lor mpeh nau ndâk njêng ƀon lan mhe:

            ‘Ka Huệ lah du hê đảng viên mom, gơih n’or tâm nau kan, geh nau nsôih tâm nau kơt tĭng nti nau tă blau nau kan, lah du hê Bí thư Chi đoàn ri Ka Huệ mro ƀư nŭih leo ntrong lor tâm nau hun hao văng sa rnăk vâl ân đoàn viên druh ndăm râm thôn, xã, tâm nau ntrŭnh ƀư ăp nau kan tâm nkuăl ri Ka Huệ mro ƀư ueh. Nkuăl kŏ uănh năl aơ lah du hê bu ur đoàn viên geh nau dơi ngăn gay ma lŏ chiărr nti ntĭm mbơh ngăn gay ma hun hao lơn tay tâm druh ndăm đoàn viên lah êng ndrel bu ur đoàn viên druh ndăm rnoi mpôl đê̆ lah êng”.

            “Ntŭk ŭch druh ndăm geh, ntŭk jêr geh druh ndăm”. Nau ntĭm nti nê bah Wa Gồ hŏ geh rơh mom ndăm tâm nkuăl jru Dà Knàng, nkuăl Đam Rông, n’gor Lâm Đồng nkah mro gay ma ƀư. Tâm nê, săk bah wa Ka Huệ nơm-Bí thư Đoàn druh ndăm bah thôn Pul, xã Dà Kàng lah du hê ntoh mhô. Nau kan nsôih ueh ngăn bah yuh hŏ rgop nau ƀư ueh khlay lơn gay ma rgâl nau mĭn, nau kan ân mom ndăm tâm nkuăl jru, nkuăl ngai./.