Ta năp nău mô tŏng nai ntĭm, n'gâng kan ntĭm nti n'gor Kon Tum n'hanh Gia Lai hŏ tĭng ƀư du đêt trong nkra gay đăp mpăn pah kan ntĭm nti bah ăp nhih nti.

Nău lư bah Sở Giáo dục n'hanh Đào tạo n'gor Kon Tum an saơ, đah gưl nti Mầm non aƀaơ n'gor hôm mô tŏng rlău 700 rnoh biên chế, Tiểu học mô tŏng 477 nai ntĭm, Trung học cơ sở mô tŏng bơi 500 nai ntĭm n'hanh Trung học phổ thông mô tŏng 43 nai ntĭm. Gay nkra bah nău mô tŏng nai ntĭm, n'gâng kan ntĭm nti n'gor Kon Tum tĭng ƀư dăp rgum, n'glăp tay ăp ntŭk ntĭm nti mầm non, phổ thông ngih dak jê̆ chrai; tâm pă, dăp rgum lam tâm ban rmôt cán bộ mât bôk kan, nai ntĭm, nuĭh kan ta tĭng nkuâl, nkra bah nău rmeh, mô tŏng êng tĭng ntŭk ăp nkuâl; tâm pă, dăp rgum nai ntĭm gưl trung học phổ thông ntĭm nti du đêt tiết ta gưl trung học cơ sở, nai ntĭm trung học cơ sở ntĭm du đêt tiết ta gưl tiểu học. Wa Thái Khắc Hòa, Kruanh Jrô kan ntĭm nti nkual ƀon têh Kon Tum an gĭt, lam  nkual ƀon têh mô tŏng bơi 160 nai ntĭm gŭ ntĭm na nê̆  ta jrô nti, jêng trong nkra lah:

        “Dăp rgum tay jrô nti gay tâm pă nai ntĭm đăp mpăn tâm di ta ăp nhih nti. Tĭng ƀư n'glăp rgum ăp ntŭk ntĭm nti jê̆ chrai rgum sĭt nhih nti tơm hŏ n'glăp dơi 7 ntŭk ntĭm nti đŏng tâm nê geh 2 ntŭk mầm non n'hanh 5 ntŭk ntĭm nti tiểu học. Tĭng ƀư nău rgâl nai ntĭm bah nhih nti rmeh sĭt tât nhih nti mô ăp tŏng gay dăp rgum tay tâm di nău kan đah ăp nhih nti. Đah ăơ bộ môn hôm mô tŏng kơt Tin học, tiếng Anh gưl tiểu học n'gâng kan hŏ tâm pă nai ntĭm hăn nti bar nhih nti. Rlău ma nê n'gâng kan hŏ tâm pă nai ntĭm Tin học, tiếng Anh Trung học cơ sở ntĭm Tin học, tiếng Anh ta gưl tiểu học”.

Ta Gia Lai, aƀaơ dôl mô tŏng rlău 3700 nai ntĭm gŭ ta jrô nti đŏng. Wa Phạm Văn Đại - Kruanh Jrô kan ntĭm nti nkuâl Ia Grai an gĭt, aƀaơ hôm mô tŏng bơi 300 nai ntĭm. Tĭng ƀư di kơt bôk nău kan ntĭm nti phổ thông nsum 2018, năm nti 2022-2023 mbra lah lor bôk năp môn nti Tiếng Anh n'hanh Tin học jêng môn nti nchâp đă bah jrô 3 ta gưl nti tiểu học, rgâl bah hôm ma sơch kơt ntơm nơh. Nău ngăn geh dja ƀư nkuâl ơm mô tŏng nai ntĭm hôm lơn ma jêr jŏt tay đŏng rnôk mô hŏ tŏng rnoh nai ntĭm mât nti 2 bộ môn dja.

       “Aƀaơ jêr jŏt bah n'gâng kan ntĭm nti nkuâl Ia Grai lah tĭng ƀư bôk nău kan ndrôm siƀŭt giáo khoa mhe đah bộ môn anh văn jrô 2 n'hanh tin học jrô 3 aƀaơ mô tŏng dŭt âk. Đah lĕ rngôch rnoh nai ntĭm anh văn hôm mô tŏng dŭt đêt ta đơn vị nhih nti lah hôm 5 nhih nti mô hŏ geh nai ntĭm anh văn n'hanh 8 nhih nti mô hŏ geh nai ntĭm Tin học jêng dŭt jêr jŏt".

Wa Nguyễn Đình Thức - Kruanh Jrô kan ntĭm nti nkual ƀon têh Pleiku ri an gĭt, nkual ƀon têh hôm mô tŏng nklăp 600 nai ntĭm. Gay đăp mpăn săk blău ntĭm n'hanh nti, n'gâng kan ntĭm nti rgum uănh tât rêng dăp rgum, đăp mpăn tay rmôt nai ntĭm ta ăp nhih nti. Nkre, nsing ta biên chế dơi jao, lor nchrăp tâm ton kan đah nai ntĭm, nuĭh kan hôm mô  tŏng.

“Jrô kan hŏ hăn pah kan đah ăp nhih nti gay ôp uănh tay lam lĕ rngôch nhih nti jrô nti n'hanh tâm pă nai ntĭm ta ăp nhih nti. Bah năp nău mô tŏng nai ntĭm rnoh âk mhâm geh ri hŏ tâm ôp đah ăp nhih nti dăp rgum tay jrô nti, tâm ndop nhih nti jrô nti an ntêr lĕ gay mpêt dơi biên chế dơi jao tâm nău dơi. Jrô kan hŏ dăn đă đah ăp gưl geh nău dơi kan mĭn uănh tay kalơ nuih n'hâm ăp quy định bah n'gâng kan, bah ngih dak gay tâm pă tŏng rnoh nai ntĭm tâm ban kơt nuĭh kan an ăp nhih nti gay an ƀư nău ntĭm nti".

        Wa Lê Duy Định – Giám đốc Sở Giáo dục n'hanh Đào tạo n'gor Gia Lai an gĭt dôl kan nsum đah Sở Nội vụ pah kan đah ăp nkuâl gay mĭn uănh, nsŏng kơl an UBND n'gor n'glêh an nău tâm pă nkre đah dăp rgum tay jrô nti, nhih nti, rgum ăp ntŭk nhih nti, n'hao rnoh âk kon se/jrô nti an dŭt rnoh tĭng điều lệ ăp gưl nti. Lôch ƀư jêh ăp nkô̆ mơ mĭn tay nău mô tŏng nai ntĭm ta ăp nkuâl gay ƀư tâm pă 1.244 nai ntĭm ma Trung ương jao.

        "Đah ăp jrô nti ta gưl tiểu học ân 35 kon se/ jrô nti, hôm đah ăp jrô nti ta gưl Trung học cơ sở lah ân 45 kon se/jrô nti. Ăp nkuâl tĭng ƀư nău n'glăp ăp nhih nti tâm ban kơt nău đăp mpăn rnoh ăp tŏng kon se ta jrô nti kơt nê̆ mbra mpêt dơi du rnoh nai ntĭm dŭt âk. Rnôk dơi ntop tay rnoh biên chế nai ntĭm, ntop đah nău n'glăp tay ăp nhih nti tâm ban kơt nhih nti tâm pă rnoh âk kon se  nti ta jrô nti đŏng ri trong ntĭm nti ta n'gor Gia Lai mbra geh tŏng rnoh nai dâk ntĭm ta jrô nti"

       Ndrel đah ăp trong manh nkra ta năp măt, gay nkra tâm ban nău mô tŏng nai ntĭm, Sở Giáo dục n'hanh Đào tạo ăp n'gor tâm nkual Tây Nguyên hŏ dăn đă Bộ Giáo dục n'hanh Đào tạo nsŏng kơl an Chính phủ ntop rnoh biên chế n'gâng kan ntĭm nti hôm mô tŏng đŏng. Geh trong sơch lăp kan viên chức đah sinh viên sư phạm dơi ntop kơl prăk hăn nti, prăk dŏng sa tĭng quy định ta Nghị định mbrô 116 bah Chính phủ gay dơh an nkuâl mpeh tơm sơch lăp nuĭh kan.