Ôi 6/5 râng Lễ Ntơm pơk Đại lễ Phật đản Liên hiệp quốc- Vesak 2025, Kruanh dak Lương Cường rhơn rnê n’hanh rnê âk nkô̆ Đại Lễ Vesak 2025: “Tâm rnglăp n’hanh tâm yô̆ yor nuih n’hâm uĕh lŏng kon nuĭh: Trong chrat ang Phật giáo yor an bah tâm lơh tâm su lam ntŭr neh n’hanh hun hao jŏ jong". Aơ lah du nău mpơl gĭt lor geh nkô̆ khlay jru hvi tâm rnôk lam ntŭr neh dôl ât rdâng đah âk ntul rlong kơt tâm lơh tâm  su, roh nău tâm ban, rgâl n’hâm sial trôk nar n’hanh roh nuih n’hâm uĕh lŏng tâm nău rêh.

Kruanh dak lah rjăp, Việt Nam lah du neh dak geh nău way ơm Phật giáo jŏ ơm, krêp dêh jru hvi đah lịch sử rdâk njêng neh dak n’hanh  mât njrăng neh dak. Rlău âk rơh rdjuh thăng bah lịch sử, Phật giáo Việt Nam way mpư n’hao nuih n’hâm “Kơl jăt tĭng nkrum kơl neh dak ƀon lan đăp mpăn”, trong chroh way hăn ndrel rnoi nuĭh. Ăp rnoh khlay kơt nuih n’hâm rŏng dak, nuih n’hâm uĕh lŏng, nău gĭt rƀŏng êng tât nău rêh rsang uĕh bah Phật giáo hŏ lăp jru tâm nuih  n’hâm nuĭh Việt n’hanh rgop hŭr tŏ tâm săk tơm văn hóa rnoi nuĭh Việt Nam.

Ndrel râng nar lễ, Tổng thống Sri Lanka lah rjăp tât nău tâm boh krêp dêh n’hanh tâm boh đah Việt Nam bah  âk năm aơ. Aƀaơ, nău tâm boh nê dơi rdâk tay nâp dăng lơn. Ntơh măt kruanh rđău kan âk dak kơt Trung Quốc, Ấn Độ, Campuchia... n’hanh Tổng thư ký Liên hiệp quốc hŏ njuăl nău lư tât Vesak 2025.