Tâm rnôk hăn khâl gưl Ngih dak tât Việt Nam, ôi ntri (29/11) Kruanh dak Lương Cường n’hanh kađăch Campuchia Norodom Sihamoni hŏ tât khâl Văn Miếu - Quốc Tử Giám n’hanh chiăm kah trà khlay bah Việt Nam. Nkoch đah kađăch mpeh ndru Văn Miếu - Quốc Tử Giám, Kruanh dak Lương Cường an gĭt aơ lah ndơ ntĭt bah Thủ đô Hà Nội rbăn năm văn hiến, lah nhih nti đại học lor bôk năp bah Việt Nam, ntŭk geh 82 păng lŭ nchih Tiến sĩ dơi UNESCO kơp dơn lah Drăp ndơ ơm yău ntlơi an tay ndơ dŏng nti lam ntŭr neh.

Ndrel chiăm kah trà, Kruanh dak mpơl nău rhơn saơ tâm bah ri aơ nơh tâm boh bar dak hun hao đăp mpăn tay; nău nsing nơm, krêp dêh đah Kruanh rđău kan n’hanh ƀon lan bar dak nar lơn ma sơn nâp n’hanh n’hao dăng. Kruanh dak nsing nơm an lah, kalơ nău kan têh khlay bah he, Kađăch mbra dun dăp an tâm boh uĕh lăng nê, nkre uănh khlay n’grŏ tĭng nău nkoch trêng, ntĭm nti jru hvi an lam nuĭh ƀon lan, lơn lah rơh mom ndăm gĭt wât jru mpeh nău krêp dêh, tâm rnglăp, tâm n’groh an nsum đah bar dak, bar rnoi nuĭh n’hanh ntrŭt ntrôl tâm boh tâm rnglăp Việt Nam - Campuchia.