Kêng măng 12/12, Kruanh dak Lương Cường lĕ tât khâl n’hânh pah kan đah N’gâng kan tâm rnglăp nchră. Kruanh dak dŭt n’hâm rnê rhơn ăp nău geh khlay ma ăp rơh kruanh, cán bộ tâm rnglăp nchră nău dơi geh. Kơp bah bôk năm kan Đại hội 13 tât aƀaơ, trong kan tâm rnglăp nchră nău bah dih, tâm rnglăp bah dih lĕ geh âk săk rnglăy dŭt khlay, nkô̆ nău têh khlay, rgop an nău geh nsum bah neh dak.

Tâm nĕ, khlay ngăn lah tâm rnglăp nchră nău bah dih lĕ mât uĕh têh dăng ƀư tơm hăn lor tâm nău ndâk njêng n’hanh mât nâp ntŭk ntô tâm rnglăp đăp mpăn an hun hao. Mpeh trong rƀŏng an trong kan tâm rnglăp nchră nău năm tât, Kruanh dak Lương Cường lah rjăp nkô̆ nău “bôl nău rgâl âk nău nâp nâl”, tâm rgop ăp soan dăng rnoi nuĭh n’hanh soan dăng mhe, nâp nâl đah nău rƀŏng têh, ngăch mpeh trong ƀư, đăp mpăn prêh ngăn nău geh neh dak-rnoi nuĭh. Trong kan nchră nău bah dih an ƀư tĭng nău kan bôk năp lah rgop đăp mpăn, tâm rnglăp, ndăn ăp nuĭh n’hanh nta nơih bah dih gay hun hao neh dak.