Bah năp êp Tết Nguyên đán Quý Mão 2023 n’hanh di nkah gĭt 93 năm Nar ndâk njêng Đảng, tĭng nău way bah rnoi nuĭh, nar 11/1, ta nkual ƀon têh Hồ Chí Minh, Kruanh dak Nguyễn Xuân Phúc lĕ tât an nkao, su nhang Kruanh Hồ Chí Minh; khâl, an ndơ, mbah rhơn Tết rnăk wâl ăp đồng chí Kruanh Đảng n’hanh Ngih dak lĕ khĭt.

Kruanh dak mpoh nhang nkah gĭt Kruanh dak Hồ Chí Minh ta Bảo tàng Hồ Chí Minh.

Mpoh nhang, an nkao ta Bảo tàng, Kruanh dak Nguyễn Xuân Phúc n’hanh Mpôl kan an đêt mnĭt nkah gĭt Kruanh dak Hồ Chí Minh-Nuĭh janh dăng rklaih luh đăp mpăn rnoi nuĭh-Nuĭh văn hóa kiệt xuất bah rnoi nuĭh Việt Nam. Mpơl nău kan gĭt hô ngăn tât Kruanh dak Hồ Chí Minh-lĕ nsơr lôch nău rêh nơm an nău kan rklaih luh đăp mpăn rnoi nuĭh, kơp dơn ngoăy neh dak, ndâk njêng neh dak Việt Nam xã hội chủ nghĩa đăp mpăn, kơp dơn ngoăy. Tât mpoh nhang Đại tướng Lê Đức Anh, Kruanh dak bah năm 1992-1997, Kruanh dak Nguyễn Xuân Phúc nkoch kloh, bôl ta ăp nău kan, đồng chí Lê Đức Anh djôt lĕ nuih n’hâm, rgop âk an nău khlay tâm ăp nău têh bah neh dak.