Kêng măng 28/12, ta Nhih pah kan kruanh dak, Kruanh dak Nguyễn Xuân Phúc wơt Đại sứ Sri Lanka, Đại sứ Campuchia ntĭnh sĭt dŭt jêh năm kan. Wơt Đại sứ Sri Lanka, Kruanh dak Nguyễn Xuân Phúc lah rjăp, Việt Nam way uănh khlay tâm boh tâm rnglăp way ơm n'hanh tâm boh âk ntil đah Sri Lanka, ŭch rŏng ndơ̆ tâm boh bar dak hun hao ngăn ngăn lơn đŏng.

Tâm let năp tay, Kruanh dak Nguyễn Xuân Phúc dăn đă, bar dak tâm khâl tay mpôl kan gưl têh n'hanh ăp gưl, ta ăp trong kan Chính phủ, Quốc hội, Đảng chính trị n'hanh tâm nđŭr ƀon lan. Wơt Đại sứ Campuchia tât ntĭnh sĭt, Kruanh dak Nguyễn Xuân Phúc mbah rhơn Đại sứ lôch jêh nău kan, rgop uĕh an tâm boh bar dak, lơn lah tâm năm tâm rnglăp Việt Nam – Campuchia 2022. Kruanh dak ŭch rŏng, let năp tay ta nău kan Đại sứ way nkah mpeh neh dak Việt Nam, rgop tay suan he tâm nău mât ndray, bun dăp tâm rnglăp way ơm, tâm rnglăp, tâm boh n'hanh tâm kơl nsum đah bar dak.

VOV/Nuĭh rblang: Điểu Thân