Kêng măng 13/1, ta Nhih pah kan kruanh dak, kruanh dak mâp nuĭh ntơh măt dak bah dih râng ăp nău kan nkah ndray 50 năm Nar ký Hiệp định Paris mpeh dŭt bah tâm lơh tâm su, plơ̆ tay đăp mpăn ta Việt Nam. Lah ta rơh wơt, Ntơh măt Kruanh rđău kan Đảng, Ngih dak n'hanh ƀon lan Việt Nam, Kruanh dak lah uĕh ăp nău rŏng uĕh lăng, nău tâm rnglăp, ŭch tĭng kơl khlay ma băl mpôl dak bah dih hŏ n'hanh dôl rong an Việt Nam n'hanh mpơl nău nsing nơm ăp băl mpôl dak bah dih mbra ndrel hăn đah ƀon lan Việt Nam tâm n'gâng kan rdâk njêng n'hanh mât njrăng neh dak nar aơ.

Kruanh dak lah rjăp Đảng, Ngih dak n'hanh ƀon lan Việt Nam way nchih nkah nău kơl khlay bah băl mpôl dak bah dih, mô tâm mưch rmot rnoi nuĭh, săk ntô, chroh rƀŭn, way bah meng Việt Nam tâm ăp năm khay rlăch ndăng dŭt jêr jŏt. Nău kơl khlay nê hŏ jêng du gâl bah lịch sử dâk lơh phŭng rlăng lăp tŭn jot neh dak bah ƀon lan Việt Nam yor ma đăp mpăn, dah rŏng bah neh dak, tâm ban kơt đăp mpăn tâm di n'hanh nău leh lam ntŭr neh.

VOV/Nuĭh rblang: Điểu Thân