Ôi nar 9/12, Hội đồng nhân dân Nkual ƀon têh Hà Nội khóa XVI hŏ ntơm pơk rơh hop tâl 20. Râng n’hanh lah ta rơh hop, Kruanh Quốc hội Trần Thanh Mẫn njrăng đă, Hội đồng nhân dân nkual ƀon têh Hà Nội ntik n’hao tay nuih n’hâm rgâl mhe tâm  nău kan, ân way lah “ntĭt leo lor ntoh lư” bah Hội đồng nhân dân ăp n’gor, nkual ƀon têh lam dak.

Đah rgâl  mhe nău mĭn tâm rnôk rdâk njêng pháp luật, n’hao săk tam, nsĭt geh tâm mĭn uănh, n’glêh an ăp nkô̆ nău khlay n’glĕ mpeh nău dơi. Kruanh Quốc hội an lah, Rơh hop dja bah Hội đồng nhân dân nkual ƀon têh mbra lah rơh hop nuih n’hâm rhơn nđơr mhe, njêng đăt ndal mhe, ngăch droh rklaih jêr jŏt, mbluh soih tơm suan, rgum hun hao wăng sa – rêh jêng kon nuĭh, đăp mpăn njrăng n’gang neh dak, rnă njrăng n’hanh n’hao geh nău rêh bah ƀon lan Thủ đô, rgop uĕh tâm rơh rgâl mhe, hun hao dăng bah neh dak tâm rơh hun hao mhe. Tĭng nê, Hà Nội ân rgum an rong lor tơm ndơ, njêng đăt ndal dăng lơn mpeh buăt nthoi ntung trong ăp kôp, n’hanh têh uĕh mhe, geh nău tâm mbluh nthoi âk; rgum mât uănh dăp rgum nkre đah ăp trong nchrăp an tĭng ƀư tâm ăp trong kan wăng sa, văn hoá, rêh jêng kon nuĭh…