Rƀŭn nchră dơi ƀư tĭng trong trực tuyến ta Ngih rƀŭn n’gor n’hanh trực tuyến tât 7 ntŭk ƀoh gưl nkuăl n’hanh 71 ntŭk ƀoh gưl xă. Râng rƀŭn nchră geh 400 nuĭh ƀon lan ntoh lư an rlău 60.000 nuĭh ƀon lan n’hanh rlău 400 hợp tác xã, rmôt kan ndrel tâm n’gor, tât mbơh nău ôp đah wa Hồ Văn Mười, Kruanh UBND n’gor Dak Nông mpeh ăp nău wăk kol n’hanh dăn đă, mpŏng kâp bah nuĭh ƀon lan tâm n’gor.

Bah năp nĕ, ăp nuĭh ƀon lan, hợp tác xã ta Dak Nông lĕ njuăl nău rlău 300 nău ôp tât Kruanh UBND n’gor, dăn đă ăp trong mkra, nău kơl dôh rklaih jêr jŏ an nkra njêng lŏ mir. Ăp nău nuĭh ƀon lan ta ntŭk uănh tât rgum âk mpeh nău ntop kơl prăk ntuh kơl nkra njêng; nău tâm rgop, kan ndrel nkra njêng tĭng trong khlay.