Kêng măng 17/10, UBND n’gor Lâm Đồng ƀư Tâm nchră uănh năl lôch jêh tĭng ƀư n’hanh ăp jêr jŏt, kŏ kol tâm hun hao pâl nđaih tuch tăm. Lôch rnôk geh trong nchrăp bah UBND n’gor, ăp năm aơ, n’gâng kan pâl nđaih n’gor Lâm Đồng hŏ kan nsum đah ăp nhih pah kan geh tât ƀư hăn uănh năl di ngăn n’hanh kơp dơn 33  ntŭk pâl nđaih tuch tăm. Yơn  lah, tă bah mâp âk mpêr n’gar nking kol yor ăp quy định bah pháp luật dôl dŏng aƀaơ, jêng tât nău hun hao pâl nđaih tuch tăm ta n’gor Lâm Đồng mâp âk jêr jŏt.

Lah n’glôch jêh tâm nchră, wa Phạm S, Groi kruanh UBND n’gor Lâm Đồng lah rjăp: Gay ntrŭt ntrôl pâl nđaih tuch tăm hun hao dăng, geh nău đăt ndal tâm let năp tay, n’gor dôl rđău đă ăp nhih pah kan  dơi kan rdâk njêng trong nchrăp dŏng neh âk ntil ƀư an pâl nđaih tuch tăm nkre đah ăp quy định kloh rvah, na nê̆ hao rblang dăn gưl geh nău  dơi kan uănh an dŏng. Nău dja tĭng ƀư nsing tâm  Luật neh ntu năm 2024 n’hanh ăp siƀŭt quy định na nê̆ an dŏng geh tât.