Đah bôk nău “Đà Lạt- nkuăl ƀon têh poăn yan kao”, Festival kao Đà Lạt tal 9 năm 2022 geh ƀư tâm 2 khay, bâh nar 1/11 tât lĕ nar 31/12. Ndrel đah ăp bôk nău kan geh ƀư dŭt âk ta Đà Lạt, rlău 40 bôk nău kan vơt tĭng êng lĕ geh ƀư lam ăp ntŭk êng ta n’gor. Aƀaơ, du đê̆ bôk nău kan vơt tĭng lĕ geh ƀư âk ta du đê̆ nkuăl, nkuăl ƀon têh ta n’gor kơt lah: rơh tâm rlong nău ueh ao dai kao, pla n’hơ ăp ntil ndơ bum mbo, lễ hội ndranh vang.. Tĭng nău mbơh bâh wa Sử Thanh Hoài, kruanh UBND nkuăl Lạc Duơng, n’gor Lâm Đồng, ta ntŭk lĕ geh nchrăp ăp ntil nău kan vơt tĭng mât đăp mpăn geh ƀư đăp mpăn n’hanh ueh di.

 “Ƀư tĭng nău ntrŭnh bâh UBND n’gor mpeh nău ăp ntŭk tâm n’gor an geh tât râng bôk nău kan gay vơt tĭng Festival kao Đà Lạt, nkuăl Lạc Dương geh du đê̆ nău kan gay ma vơt tĭng. Nĕ lah khay tâm mâp pih hồng nchrăp ƀư ta nar 19/11, ndrel đah nĕ lah nkuăl Lạc Dương lĕ geh ƀư rơh tâm nđur ndơ sông sa chĭng gong, tâm rgop đah ăp doanh nghiệp ƀư rơh tâm rlong nchoăt seh ta xã Đa Nhim”.

Ndrel đah n’gâng kan ta ntŭk, ăp nău kan vơt năch kơt lah ngih răk ngêt sông an năch, ngih rlu năch, ntŭk pâl rlưn lĕ geh nchrăp tŏng ăp nău ueh gay ma mât đăp mpăn vơt năch pâl nđaih tât.

Wa Đinh Thiên Long, du hê nuĭh tơm ntŭk ngêt sông răk năch ta nkuăl ƀon têh Đà Lạt an gĭt, gay ma vơt tĭng nar Fesstival Kao Đà lạt rơh aơ, rlău ma n’hao nău ueh vơt năch, ntŭk ngêt sông wa lĕ geh nchrăp du đê̆ ndơ sa ơm geh ƀư bâh ăp ntil biăp, bum, play nsĭt tât nău ueh êng ta Đà Lạt.

 “Ta năp Festival rĭ nău bôk năp lah mpôl hên ƀư lôch ueh nău khlăy tơm khlăy bâh du ntŭk răk ngêt sông ueh kơl an năch, mpeh nău mât kloh ueh ndơ sông sa gay ma vơt âk năch pâl nđaih. Đà Lạt geh rnoh ndơ ơm geh âk mpeh ndơ sa, yor nĕ gâp ŭch lah năch mbra geh gĭt nău way ueh êng ndơ sa bâh nuĭh ƀon lan ta nkuăl ƀon têh kao”.

Rlău ma ăp nău njroh mprơ,  pâl rlưn, pla n’hơ, mbơh tơih ăp ntil ndơ nsĭt tay nău ntơ “Đà Lạt- tâm rgop nău ueh bâh neh jêng”, kao lah ntil ndơ tơm khlăy dôl geh n’gâng kan ta ntŭk, nuĭh ƀon lan n’hanh doanh nghiệp ndăn nchrăp gay ma kơl an nău ŭch uănh pâl bâh năch, ngăn lah ăp ntŭk ƀư kao geh pă dăp ta ăp nkual ntŭk rêh jêng, ăp trong hăn tơm n’hanh văr dak bât xuân Hương. Êng công ty mât kloh ueh ntŭk ƀon têh Đà Lạt lĕ nchrăp 400 rbăn gri kao, dŭng kao ăp ntil gay ma ƀư ueh an trong nkuăl ƀon têh, dăp ăp kao ta ăp trong hăn ta rơh Festival kao rơh aơ.