Thôn Hàng Làng, xã Gung Ré, nkuăl Di Linh, n’gor Lâm Đồng geh âk ngăn nŭih rnoi mpôl đê̆. Ăp năm ma aơ, nau ndâk ndrel rnglăp nŭih mhe geh gưl uỷ, chi bộ thôn uănh khlay. Bu ranh K’Keo, Bí thư Chi bộ thôn Hàng Làng mbơh, rnơm ƀư ueh nau ntĭm, rnglăp nŭih blau, 100% đảng viên tâm chi bộ, ngăn lah cán bộ mom kŏ geh nau nsôih, ƀư ueh nau leo trong tâm nau tuch tăm ndrel nau rêh:

            ‘Bah năp nơh, cho bộ knŭng geh 8 đảng viên, tât rnôk aơ hŏ hao tât 13 đảng viên, tâm nê âk ngăn lah đảng viên rnoi mpôl đê̆. Tâm năm aơ, chi bộ lŏ uănh ndrel leo 2 nŭih rnoi mpôl đê̆ geh nau dơi gay hăn nti jrâu cảm tình Đảng, ndrel jêh lôch nti ri chi bộ mra uănh gay rnglăp. Ngăn lah, chi bộ uănh khlay ngăn tât ăp nŭih geh nau dơi, ăp nŭih nsôih, gơih, blau nau leo trong, kơl an ma Đảng ri hên rgum tâm rnoh nŭih ân geh lăp Đảng. Jêh rnôk lăp đảng, ăp nŭih kŏ geh nau gơih, mro lah nŭih leo trong tâm ăp nau kan, ngăn lah ƀư leo trong lor ân ƀon lan kơt tĭng”.

            Tâm ban ma nê nkuăl rnoi mpôl đê̆ xã Đạ Nhim, nkuăl Lạc Dương, n’gor Lâm Đồng kŏ ƀư ueh nau nchiăr nti, pơk trong ân nŭih geh nau blau gay lăp đảng. Tâm rlau 120 nŭih đảng viên, rƀŭn tâm 10 chi bộ tâm xã Đạ Nhim ri rlau n’gul lah rnoi K’ho. Yuh Cil Pam Ka Duyên, đảng viên mom bah Chi bộ thôn Đạ Tro, xã Đạ Nhim ân lah, geh nŭih ngăn, kan ngăn ri nau nkoch trêng, bonh đă ăp nau ntrŭnh, ntrong kan, nau kan bah Đảng ndrel pháp luật bah Ngih dak mơ leo nsĭt săk geh văng sa ueh, kônh wa tâm nkuăl mơ kơt tĭng. Ndri ma, gay ƀon lan rnơm ndrel ŭch rgâl mhe nau mĭn, nau kan, ntrơn rgâl tơm tăm, leo tơm mhe lăp tăm, n’hao nau geh jêng ri ăp đảng viên mro lah nŭih leo trong lor:

            ‘Jêh rnôk jêng nŭih đảng viên geh tay nau dơi gay gĭt kloh lơn mpeh ăp nau ntrŭnh, ntrong kan bah Đảng, nau ntrŭnh pháp luật bah Ngih dak. Tă bah nê mra dơi bư ueh nau kan, nau ƀư ma chi bộ jao ân. Gâp hŏ kơl an kônh wa tâm ƀon gĭt âk lơn, ngăn lah bonh đă kônh wa ntrơn rgâl tơm tăm, nsôih tăm tay ăp tơm gleh nar gay n’hao nau geh jêng, hun hao văng sa rnăk vâl. Rnôk aơ nau rêh bah kônh wa rnoi mpôl đê̆ ta aơ hŏ bah oi nau jêr âk ngăn rđil ma bah năp nê’.

            Tĭng wa Cil Ha Poh, Bí thư Đảng uỷ xã Đạ Long, nkuăl Đam Rông, n’gor Lâm Đồng, gay mât đăp mpăn ueh nau rnglăp đảng, ngăn lah ăp đảng viên mom nkuăl rnoi mpôl đê̆, nau ndâk joi nŭih, ntĭm nti ân nŭih blau tâm ăp nau kan chính trị rêh jêng, ƀon lan tâm dâng mro lah nau kan tơm. Tă bah nê, ntơm bôk năm kan tât rnôk aơ, xã Đạ Long hŏ rnglăp geh 17 đảng viên, tâm nê geh 11 đảng viên lôch nti Đại học ndrel 5 đảng viên trung cấp. Aơ lah ăp nŭih đảng viên mom, nŭih rnoi mpôl đê̆ geh ân lah nŭih ndơn tâm nau ndâk ndrel hun hao đảng tâm năm kan tât. Wa Cil Ha Poh, mbơh:

            “Tâm nau rđau đă bah gưl kan ba lơ ri Đảng uỷ xã hŏ rjăp ngăn tâm nau joi nŭih, pă nau kan đảng uỷ viên ƀư ăp nau kan bah ăp chi bộ, ndrel ăp chi uỷ chi bộ uănh, ntĭm, nchiăr ndrel ƀư ueh nau mĭn. Uănh khlay tât nŭih geh nau dơi lah druh ndăm tă lôch hăn tahen, druh ndăm gơih ueh tâm nau pah kan hun hao văng sa, druh ndăm nsôuh râng nau tâm rlong rŏng dak...Ntơm bah nê geh dơi nŭih ndrel pơk nau dơi ân hăn nti ăp jrâu gĭt tât Đảng. Jêh lôch nti gĭt tât Đảng, ăp đảng viên tâm chi bộ lŏ kơl an, nchiăr ntĭm tay gay geh nau gĭt tâm di, nau mĭn tâm di rnôk geh lăp Đảng”.

            Ăp đảng viên mom, blau tâm nkuăl rnoi mpôl đê̆ bah n’gor Lâm Đồng dôl ƀư rjăp nau leo trong, nchrăp nsôih tâm nau tuch tăm ndrel nau rêh jêng. Nau aơ lah rjăp trong hăn tâm di, nâp nâl tâm nau kan ndâk Đảng ndrel ma hun hao nkuăl rnoi mpôl đê̆ tâm rnôk aơ. Aơ geh uănh lah nau kan chính trị khlay, lah trong ƀư gay Lâm Đồng ƀư nâp ntrong kan chính trị tâm dâng, rgop nau ntrŭt dăng nau hun hao văng sa, rêh jêng, mât đăp mpăn ndrel n’hao nau dơi tâm nau tâm rnglăp lam rnoi mpôl tâm n’gor./.