Geh ndâk tâm lơ 6/12/1989, Rmôt tahen ơm Việt Nam lah du ntŭk kan chính trị, rêh jêng, ntoh măt ân nau ŭch ndrel nau geh bah tahen, lah rmôt kan nsum bah MTTQ Việt Nam yor Đảng rđau. Ntơm bah rnôk ndâk njêng tât rnôk aơ, rmôt kan mro têh dăng, pah kan ueh, tâm di trong ndrel săk tam. Đại hội geh ƀư tâm dŭt năm 2022 hŏ rgum, nchră nau tă dơi ƀư bah nau ntrŭnh Đại hội ntoh măt lam dak rmôt tahen ơm Việt Nam tal VI, tă bah nê nchŏng kloh nau dơi, nau ê dơi ndrel rvăt nau tă geh dơi, uănh nau nchrăp kan, ntrong kan tâm năm kan VII, lvang năm 2022-2027. Đại hội lah nau kan chính trị khlay tâm nau kan chính trị, rêh jêng bah tahen ơm ndrel ƀon lan tâm lam dak, bah nê lŏ ƀư rjăp nau kan, nau dơi ndrel ăp nau rgop bah rmôt tahen ơm Việt Nam tâm nau ndâk njêng, mât neh dak.

            Ntoh nau tam nar đại hội Tổng Bí thư Nguyễn Phú Trọng lah rjăp, jêh ƀư dơi nau kan bah ăp rmôt, âk rkeh cán bộ, tahen jêh lôch hăn hŏ sĭt ƀon nơm mô lah ntrơn ntŭjk kan tâm ăp nau. Tahen ơm lah nŭih tă geh chiăr nti ndrel têh jêng tâm rnôk tâm lơh, hŏ geh nau kơl an ueh ân nau rklaih rnoi mpôl, ndâk njêng ndrel mât neh dak, nar aơ dôl lah du rmôt khlay bah ƀon lan. Rnê ăp nau tă dơi bah nau kan ma rmôt tahen ơm Việt Nam geh tâm rơh rlau aơ nê lah nau gay ma rnê, rgop nau gay “Neh dak nơm ê mâp geh nau dơi dăng ndrel nau rnơm tâm lam ntur neh kơt nar aơ”, Tổng Bí thư Nguyễn Phú Trọng lah kloh, Đảng ndrel Ngih dak rnê prêh nau kan ndrel ăp nau rgop bah tahen ơm Việt Nam đah nau ndâk ndrel mât neh dak, ăp nŭih nê tâm di lah ntŭk nsing rnơm bah ăp gưl uỷ, n’gâng kan ndrel ƀon lan.

            Lah kloh, ăp năm tât, nau geh bah lam ntur neh hôm jêr rdâng, tâm dak, nơm mâp âk nau jêr, nau ntul tlong, Tổng Bí thư Nguyễn Phú Trong mbơh, đah rmôt tahen ơm, Đại hội XIII bah Đảng kŏ nchŏng kloh nau kan “Bonh tahen ơm ƀư ueh nau dơi, nau vay ơm “Tahen Wa Hồ” tâm nau ndâk njêng ndrel mât Đảng, Ngih dak, ƀon lan ndrel ăp kơn xã hội chủ nghĩa, mât nau mĭn bah Đảng, nsôih lơh ăp nau tih, nau tâm rkeh; tâm kơl ƀư nau kan văng sa, rgâl nau rêh. N’hao nau dơi bah tahen ơm tâm nau ntĭm nti nau rŏng dak, nau ơm cách mạng ân rơh mom, rgop nau ndâk ndrel ƀư nâp nau kan chính trị, ndâk njêng Đảng ndrel ntrong kan chính trị kloh, nâp” tâm nuih n’hâm aơ, Tổng Bí thư Nguyễn Phú Trọng đă:

            ‘Tahen ơm Việt Nam  tâm ăp gưl ân ƀư ueh lơn tay nau dơi tơm lah chính trị, geh nau dơi khlay tâm nau ƀư, bonh đă ƀon lan kơt ntrong kan, nau ntrŭnh bah Đảng, pháp luật bah Ngih dak, n’hao nau tâm rnglăp ăp rnoi, ƀư ueh nau dơi ƀư tơm bah ƀon lan, rgum ăp nau dơi gay hun hao văng sa, rêh jêng, ntŭk man bah nau rêh bah nsum mpôl ƀon lan, ntrŭt dăng ăp nau kan tâm rlong rŏng dak, ƀon lan ƀư tơm, ndâk njêng nau tâm ban tâm nau rêh gay rgop nau ƀư dơi ăp nkô̆ nau,  nau kan chính trị bah neh dak tâm rơh mhe. Đảng rđau, Ngih dak mât, ƀon lan ƀư tơm lah 3 n’gâng tơm nâp ngăn tâm nau ndâk njêng ndrel mât neh dak nơm”.

Tổng Bí thư Nguyễn Phú Trọng đă, Rmôt tahen ơm ăp gưl nsôih mât nau dơi bah cách mạng, n’hao nau ntĭm nti chính trị, nau mĭn, kơl an cán bộ, nŭih kan gĭt kloh ntrong kan bah Đảng, nau kơl an pháp luật bah Ngih dak, vay ntĭm nti, nkoch mbơh đah ăp gưl uỷ, n’gâng kan rgop nau bah tahen ơm, bah ƀon lan mpeh ăp nau hun hao văng sa, rêh jêng, đăp mpăn neh dak:

‘Rmôt tahen ơm ăp gưl ân geh ƀư ueh ăp tu tơm ndrel nau kơl an bah Ngih dak đah tahen ơm, tâm rgop nsum đah ăp nau kan, ăp nau rgŏ jă tâm tahen ơm du trong ân săk tam, ntrŭt dăng ndrel n’hao nau nâp bah nau nau kan “Tahen ơm tâm kơl ƀư n’huch ach o, ƀư văng sa blau”. Nau khlay kơl an lơn tât ăp nkuăl jêr jŏt, nkuăl jru, nkuăl ngai, nkuăl căn cứ cách mạng, bonh đă ăp rmôt, ăp nŭih tahen nsôih râng nau kan ê nkra, tăch rgâl, nsôih ƀư sâm geh ân tam di, ƀư ueh nau vay ơm “Ngêt dak kah gĭt tu” ƀư ân nau kan kơl an, du nau ueh ơm “Tahen Wa Hồ” bah tahen ơm Việt Nam”.

Tổng Bí thư Nguyễn Phú Trọng kŏ đă, mât chăm ndâk njêng rmôt tahen ơm Việt Nam kloh, nâp dăng mpeh chính trị, nau mĭn ndrel ntŭk kan, rgâl mhe rjăp nau kan ndrel nkô̆ nau kan gay rmôt kan ƀư ueh nau dơi, nau kan bah nơm, đăp mpăn tâm di ma ăp nŭih, rƀŏng tât tâm dâng, uănh nau nâp, nau săk tam, der nau ƀư mô tâm ban, mô tâm di ndrel nsôih râng ndâk njêng Đảng, Ngih dak ndrel ntrong kan chính trị nar lơn ma kloh, nâp, ƀư ueh nau tâm rgop ma ƀon lan, ƀư nâp nau rnơm bah ƀon lan đah Đảng ndrel Ngih dak./.