Kêng măng 15/12, ta nkual ƀon têh Buôn Ma Thuột ƀư bôk nău kan “Mâp măt n’hanh rnê rhơn sinh viên rnoi mpôl đêt ntoh lư” n’gor Dak Lak rơh tal 16”. Ăp năm bah năp, ndrel đah druh ndăm lam dak, druh ndăm ăp rnoi mpôl đêt Dak Lak mĭn lah tay nău tơm, mô rlu nti nsơm, nsrôih hao tâm nău rêh. Ta bôk nău kan mâp măt, ăp sinh viên ntoh lư tât râng lĕ râng âk nău ƀư kơt:

Mpoh su nhang ta Rup ndah nkah gĭt ăp tahen Nam Tiến n’hanh an nkao ta Rup ndah wa Hồ; trong hăn “Mĭn joi văn hóa”, rƀŭn “Tâm nchră mpeh nău uĕh ntơr sinh viên Dak Lak tâm trong rgum lăp n’hanh hun hao”, tâm nchră “Boăt nthoi sinh viên đah doanh nhân, doanh nghiệp”. Rơh aơ, Rmôt sinh viên Việt Nam n’gor Dak Lak lĕ rnê rhơn 50 sinh viên rnoi mpôl đêt ntoh lư; Ƀư mbơh câu lạc bộ Bản sắc Sinh viên Dak Lak. Câu lạc bộ dơi ndâk njêng gay geh ntŭk pâl uĕh, kơl ăp băl mom dơi mĭn joi, uănh ƀư n’hanh mât ndrăy ăp nău khlay văn hóa way ơm bah rnoi nuĭh nơm.