VOV4.M’nông: Đại hội ntoh măt druh ndăm cộng sản Hồ Chí Minh tahen mhe geh ƀư ta Hà Nội. Mbơh nau tâm đại hội mbơh: 5 năm rlau aơ, nau kan đoàn, druh ndăm tahen lŏ ƀư rjăp nau kan, nau dơi bôk năp tâm nau kan đoàn ndrel nau kan druh ndăm, kon se tâm lam dak, rgop nau khlay tâm nau kan ndâk njêng tahen, ndâk njêng ndrel mât neh dak. Nau nê ân saơ mom ndăm tahen hŏ ntoh dơi nau kan têh, nau mpŏng prêh.

            Tâm ăp rmôt tahen mra tâm lơh, đoàn viên druh ndăm geh bơi tât 80% tahen, ƀư ăp nau kan kơl an tahen, neh dak, tơm. 5 năm rlau aơ, 100% cán bộ, đoàn druh ndăm ƀư jêh nau kan chiăr nti mra tâm lơh, ntĭm nti, pah kan jan sa...Aơ lah ăp rmôt mro geh tât tâm ăp ntŭk jêr gay ma kơl an ƀon lan rdâng đah trôk nar lơh, srê ji, joi kơl an nŭih tât khuch, ƀư nau rjăp nau kan kơl an neh dak, kơl an ƀon lan. Rgop nau tâm nau kan nê, Thượng uý Phan Văn Linh, ntoh măt Quân đoàn 1, mbơh:

            ‘Ndâk njêng ân dơi nau mât nâp chính trị, nau ŭch rŏng neh dak, nau rnơm tâm nau kan tahen Việt Nam, tâm nau dơi, nau blau nau kan, nau dŏng ndrak nsiu ndơ dŏng dôl geh. Ƀư tĭng nau kan blau, ueh, nsôih, chiăr nti, ƀư dơi ân ngăch đah nau ŭch, nau geh dơi ƀư kan ngăch, geh nau mĭn kơt tĭng rjăp, tŏng dơi nau đă nau kan tâm nau tât”.

            Êp nê, nau kan blau nau mhe bah mom ndăm ndrel nau kan pă nkhôm ân rơh mom ndăm blau nau mhe saơ ma rhiăng rbăn nau kan geh tam, mpŏng kơl ân ăp nau blau khoa học mom bah lam tahen. Ma rbăn nau kan geh nau mhe jêh rnôk geh nau dơi nkhôm lŏ geh ăp nŭih ƀư ân jêh, leo lăp dŏng hvi tâm neh dak tâm ăp năm ma rhiăng rmen prăk. Rhơn rnôk geh rnâng nau nkhôm mom ndăm blau mhe, Trung tá Hoàng Văn Tiến, Khoa Hàng Không vũ trụ, Học viện Kỹ thuật Quân sự nkoch:

            ‘Phung hên rhơn ngăn rnôk leo nau ŭch, nuih n’hâm blau bah nơm gay ma njêng luh ăp ntil ndơ ueh lơn, kơl an nau ŭch hăn ro bah tahen”.

            Bah năp ăp nau kan mhe ndŏ luh dŭt n’hâm jâk yơn kŏ geh âk nau ueh ang đah mom ndăm lam tahen tâm rơh tât, Đại hội Đoàn druh ndăm Tahen rơh aơ hŏ uănh nkô̆ nau prêh lơn đah 10 nkô̆ nau ƀư tâm năm kan 2022-2027. Nkre lah ntoh luh 3 nkô̆ nau kan têh. Nê lah: Rgâl mhe mpeh nau kan ntĭm nti cách mạng, rgâl mhe mpeh nau ntĭm nti, mra tâm lơh, nti kan, mĭn njêng khoa học, ntĭm nti nau ngơi dak ba dih, nau ngơi rnoi mpôl đê̆, ƀư tơm nau dŏng kan ê nkra ndrel ƀư du đê̆ ntil ndrak nsiu mhe, dŏng nau ueh, nau blau tâm nau ntrơn rgâl mrô mpeh nau ndâk nau kan ân nâp, nau rêh văn hoá, n’hao nau kơt tĭng pháp luật, kỷ luật ndrel đăp mpăn. Nau kan đoàn ndrel nau kan druh ndăm hŏ, dôl ndrel hôm lah nkô̆ nau khlay tâm nau rđau, nau nchrăp kan đảng, nau kan chính trị bah ăp rmôt, kơt nau mbơh bah Trung tướng Trần Hoài Trung, Chính uỷ Quân khu 7:

            ‘Gưl uỷ, chính trị, chính trị viên, nŭih rđau kan, ntŭk kan chính trị ăp gưl hŏ tât rđau kan, đă, njêng luh ăp nau nơih ueh ngăn ân nau kan đoàn, ndrel nau kan druh ndăm hun hao, rgop nau gay rmôt tahen quân khu ƀư jêh ăp nau kan geh jao. Ndơn saơ kloh mpeh nau kan, nau dơi, nau khlay bah nau kan đoàn, nau kan druh ndăm, ndrel kŏ geh nau tâm ban ƀư moh nau kan ri ŭch ân jêh ngăch ndrel geh nau dơi ri ân geh nau rđau, ân geh nau đă ndrel ƀư geh nau dơi, tâm nê nau kan druh ndăm lah nau kan khlay”.

            Ăp nkô̆ nau bah mom ndăm tahen mra rgop nau khlay tâm nau ndâk tahen ueh, gleh, dăng, pơk trong nơih nâp nâl ngăn gay năm 2030 Tahen nơh hao jêng nau ueh mhe, n’hao nau dơi mât neh dak tă bah ơm, tă bah ngai, dôl geh kơl an ndrel mpŏng hao. Groi Bí thư Quân uỷ Trung ương, Kruanh n’gâng kan neh dak, Đại tướng Phan Văn Giang lah kloh:

            ‘Quân uỷ Trung ương, rđau ăp N’gâng kan neh dak ndŏ nau rnơm tâm mom ndăm lam tahen, nkre mro uănh kơl an ndrel pơk trong nơih ngăn gay ăp đồng chí ƀư dơi nau ŭch, nau kan tâm nau ƀư ndâk njêng tahen ƀon lan Việt Nam cách mạng, chính quy, blau nâp, ăp nhoat geh nau dơi mhe, ndâk ndrel mât nâp nâl neh dak Việt Nam xã hội chủ nghĩa. Đă ăp đồng chí lŏ nsôih kơl an tâm lơh gay ma tŏng dơi đah nau rnơm ndrel nau mpŏng bah Quân uỷ Trung ương, N’gâng kan neh dak”./.