Mpôl hăn ôp uănh mbrô 1355 bah Ban Bí thư tă bah Thượng tướng Trịnh Văn Quyết, Chủ nhiệm Tổng cục Chính trị Tahen ƀon lan Việt Nam ƀư kruanh mpôl, hŏ geh rơh pah kan đah Ban Thường vụ Tỉnh ủy Gia Lai, ôp uănh nău tĭng ƀư n’glôch jêh mbrô 21, mpeh nău n’hao dăng rdâk njêng, rmăn glêh tam Đảng n’hanh lam trong kan chính trị, nkre nking nchăng n’hanh rmal lhăt ăp nău mpơl hŭch hêng tâm cán bộ, đảng viên.

Lôch rnôk djăt nău mbơh, Thượng tướng Trịnh Văn Quyết nchih nkah n’hanh rnê âk ăp nău dơi geh ma Ban Thường vụ Tỉnh ủy Gia Lai hŏ dơi geh tâm nău tĭng ƀư n’glôch jêh mbrô 21, nkre njrăng đă Ban Thường vụ Tỉnh ủy Gia Lai đăm jru tay, ƀư jêng ngăn ngăn n’hanh an tĭng ƀư nău n’glôch jêh mbrô 21 du trong lĕ nuih n’hâm lơn. Ăp gưl ủy, mpôl kan Đảng ta n’gor ân rhuăt luh nău tă ơm gĭt kan ăp nkô̆ nău ma mpôl hăn ôp uănh nchŏng luh n’hanh ôp uănh êng gay geh trong nchrăp nkra bah. Lơn lah, ân uănh khlay tât pah kan ôp uănh, groi nđôi, năn ngăch ban saơ n’hanh nkah di ăp nău mpơl tih leh tâm nău mĭn n’hanh nău kan bah cán bộ, đảng viên.