Joi trang web dulich.daknong.gv.vn, ntŭk ntô 3 trong mpeh N’glău Tà Đùng, uĕh nđir kơt wơt jă năch tât đah Dak Nông. Ta trang web aơ, năch pâl nđaih dơi mĭn joi mpeh ăp ntŭk pâl nđaih ntoh lư bah n’gor, dơi an nău mbơh mpeh ăp tuor pâl nđaih, ndơ rlu rlău, lữ hành, răm rlưn, ndơ ngêt sa...Aơ lah du gâl bah trong pâl nđaih thông minh n’gor Dak Nông mhe dơi ndơ̆ an dŏng bah nar 15/12/2022. Nchrăp jêh 3 khay rlong dŏng, tĭng nău uănh lah rhoăt nău bnlău n’hanh lôch jêh, ndơ mbra kơt dŏng na nê̆ rhŏ an dŏng, hun hao pâl nđaih bah n’gor; rgâl uĕh trong kan mât uănh, mpla nsơ, ƀư ngăn ndơ pâl nđaih. Pâl nđaih dơi nchăm ndoh ndơ trực tuyến, uănh tuor, mbơh tuor tâm trong pâl nđaih thông minh aơ.

Hăn ndrel đah n’gâng kan ƀon lan ndâk njêng n’hanh hun hao hệ sinh thái pâl nđaih thông minh lah Chi nhánh Tập đoàn viễn thông quân đội Viettel Dak Nông. Wa Nguyễn Anh Tuấn, Giám đốc trong kra công nghệ thông tin Viettel Dak Nông an gĭt:

Website mpeh pâl nđaih-du gưl tâm trong pâl nđaih thông minh Dak Nông

 “Trong ƀư aơ mbra kơl N’gâng kan Văn hóa-Thể thao n’hanh pâl nđaih Dak Nông mpla nsơ ăp ndơ văn hóa, pâl nđaih bah n’gor. Đah năch pâl nđaih ri mbra dơi joi, ƀư ngăn văn hóa pâl nđaih 3D n’hanh rup lor rnôk tât Dak Nông”.

Ndrel đah nău hun hao hệ sinh thái pâl nđaih thông minh, Dak Nông dôl tâm rgop đah Viện Hàn lâm Khoa học n’hanh Công nghệ Việt Nam mbơh ƀư Bản đồ pâl nđaih điện tử n’gor Dak Nông. Aơ lah n’gor bôk năp ta nkual Tây Nguyên ƀư bản đồ điện tử pâl nđaih. Tĭng nĕ, bản đồ pă an tât nuĭh dŏng uănh joi mpeh ăp ntŭk pâl nđaih, tâm rgop đah ntung trong: ndeh rdêng hăn trong, ăp ntŭk an manh ndeh ƀĭt êng, mbơh mpeh lễ hội mô lah ăp tuor pâl nđaih n’hŭch thuk... Thạc sĩ Đào Thị Lưu, Viện Hàn lâm KH&CN Việt Nam nkoch, bản đồ pâl nđaih điện tử Dak Nông ndâk nkra tâm di nău ngăn ta ntŭk, rgâl uĕh ăp ntil ndơ.

“Bản đồ pâl nđaih điện tử bah n’gor Dak Nông ri mpôl hên dŏng rup vệ tinh Sentinel dơi pă 5 nar 1 tơ̆, tă bah nĕ kơl groi nđôi nău ngăn rgâl bah nkual n’hanh he mô kâp tât ta ntŭk. He knŭng uănh tâm rup dơi saơ nău rgâl ngăn gay ma ndơ̆ mbơh njrăng, nchroh mbơh n’hanh geh ăp trong gay mkra ngăch. N’hanh bản đồ geh tay Comment gay năch pâl nđaih n’gluh an ăp nău lah, nău rgop, plơ̆ tay”.

          Joi ƀư nău dơh đah Công viên địa chất lam ntŭr neh UNESCO, tât aƀaơ, UBND n’gor Dak Nông lĕ dăp rgum n’hanh ntuh kơl 44 ntŭk tât tĭng 3 bôk nău khlay geh: “Trường ca bah ŭnh n’hanh dak”; Bản giao hưởng bah trong sial mhe” n’hanh “Âm vang từ Trái đất”. Tĭng trong ƀư rgâl mrô tâm nău kan pâl nđaih bah 2020-2025, n’gor Dak Nông kơl an kơt dŏng công nghệ mhe ngăn gay n’hao săk rnglăy trong kan mât uănh, mpla nsơ pâl nđaih, wăch rgum, đah năch n’hanh ăp doanh nghiệp, nuĭh ntuh kơl. Wa Khúc Thị Thoi-Groi Giám đốc N’gâng kan VHTT&DL n’gor Dak Nông an gĭt:

      Ntĭm dŏng công nghệ rup ngăn VR rhŏ an năch pâl nđaih.

    “Mpôl hên lĕ dăn nău ntrŭnh bah UBND n’gor gay ndâk ƀư trong hun hao nău rgop tâm nchră pâl nđaih aơ tâm lvang 2022-2025. Na nê̆ ntơm ndâk ƀư phần mềm geh ăp app tâm điện thoại thông minh, jêh nĕ mbra tâm rgop lĕ rngôch ntŭk pâl nđaih, ntŭk rlu rlău pâl nđaih, ăp ndơ pâl nđaih, nkual pâl rlưn... jêng dữ liệu nsum ta lam n’gor mpeh nău ƀư pâl nđaih”.

Đah âk ntŭk ntô uĕh, di tích lịch sử văn hóa, geh công viên địa chất lam ntŭr neh UNESCO Dak Nông-ntŭk bah ăp nău nteh, Dak Nông uĕh năch pâl nđaih tât joi, ƀư ngăn ăp nkual neh mhe. Joi ƀư, mât uĕh nău geh, nău dơh nĕ, n’gor rƀŏng tât năm 2025 geh đêt ngăn 1 nkual pâl nđaih tâm di lam dak, n’hanh 5 nkual, ntŭk pâl nđaih têh gưl n’gor let lơ. Mpŏng đah ăp njoăt hăn mhe kơt dŏng công nghệ mrô, pâl nđaih Dak Nông geh njoăt hun hao mhe, ntŭk tât đăp mpăn, uĕh an năch tâm n’hanh bah dih dak./.