Mbah ƀon lan, đồng chí n’hanh tahen lam dak.

Du năm mhe Quý Mão dôl tât ta neh dak Việt Nam dŭt ueh rmên bâh lĕ mpôl he! Ta rnôk tâm rgâl năm mhe đah năm ơm geh âk nău huêng khlăy n’hanh âk nău răm rhơn aơ, ndơn kan an nuĭh leo kan Đảng n’hanh ngih dak, gâp dăn njoăl nău rŏng tât lĕ rngôch ƀon lan, đồng chí n’hanh tahen lam dak, âk ƀon lan nuĭh Việt Nam he ta dak bah dih ăp nău rŏng dăch bên, nău ôp khâl bâh nuih n’hâm n’hanh nău rhơn năm mhe dŭt ueh. Gâp dăn njoăl tât băl mpôl ta lam ntur neh, ƀon lan ăp dak ta lam ntur neh nău njoăl rhơn đăp mpăn, tâm rnglăp, tâm kơl n’hanh mô rlu hun hao!

Năm Nhâm Dần -2022 mhe lĕ rlău đah âk nău kahgĭt dŭt n’hâm- du năm geh âk nău jêr jŏt, ntul rlong têh, nău tât ndal ntoh luh, nău tât mô ueh, tâm âk trong pah kan n’hanh khuch mô dơn tâm dak he ma hôm nha ta lam ntur neh đŏng. Tâm rnôk nău tât dŭt âk kơt nĕ, lam Đảng, lĕ ƀon lan, lĕ tahen he lĕ n’hao nău rŏng dak dŭt ueh, nău mĭn nsrôih âk, ntrong kan khlăy, nău dơi, nău tâm rnglăp, gơih nđơr, mĭn kan, nsrôih an dơi geh âk nău dơi dŭt khlăy, lĕ rngôch, đah âk nău geh ntoh lư khlăy ngăn. Nkre rgum njrăng, rdâng, mât njrăng nuh srê, nkre lah ntrôl an ndâk nsơm n’hanh hun hao wăng sa- rêh jêng, rdâk njêng n’gâng kan wăng sa đăp mpăn mât kan êng ndrel đah leo kan, nsrôih lăp kan ndrel lĕ rngôch, têh hvi lĕ rngôch n’hanh săk rnglăy, chính trị rêh jêng đăp mpăn, mât rnă njrăng ngih dak, rnă njrăng đăp mpăn geh mât ueh, mât nâp ntŭk gŭ rêh đăp mpăn, ueh lăng gay ma hun hao neh dak, ndâk nsơm n’hanh n’hao prêh nău knơm bâh ƀon lan đah Đảng, ngih dak n’hanh nău kơl kan bâh chủ nghĩa xã hội, gay an tay ăp nău kahgĭt ueh, geh ƀon lan n’hanh băl mpôl lam ntur neh kơp dơn, rnê mpư âk, mpôl he lĕ geh ntop tay âk nău tă gĭt nti khlăy. Ndơn kan an nuĭh leo kan Đảng n’hanh ngih dak, gâp dŭt rnê nsơm, rhơn rnê, n’hanh dŭt ryơk, lah ueh ƀon lan, đồng chí n’hanh tahen lam dak mpeh ăp nău dơi geh, nău dơi n’hanh tâm rgop kan an geh nău dơi têh kuăng tâm năm ba năp nơh.

Ntơm lăp năm mhe Quý Mão-2023, lah năm tal pe, năm bah dih meng, geh nău kan dŭt khlăy tâm nău pah kan ƀư tĭng Nghị quyết Đại hội lam dak tal 13 bâh Đảng n’hanh nău nchrăp hun hao wăng sa- rêh jêng 5 năm 2021-2025. Đah nău mpŏng ŭch n’hanh nău nsrôih an geh hun hao neh dak ăp nar lơ ma têh ndrŏng, hun hao, hơm răm, lĕ Đảng, lĕ ƀon lan, lĕ tahen he an geh n’hao nău mĭn kan rŏng dak, nău way kan ơm tâm rnglăp dơn ngoăy, rlet rlău ăp nău jêr, nău ntul rlong, ntrôl dăng ăp nău kan n’hanh an ƀư tâm ban tay lơn nău kan rgâl mhe, rdâk njêng n’hanh mât nâp ueh ngih dak, mât nâp nău rêh đăp mpăn, ueh lăng, ƀư tĭng geh nău dơi âk ăp nkô̆ mpŏng kan, nău kan lĕ ngluh mbơh, njêng jâng nsan n’hanh nău nsrôih gay ma ntrôl an neh dak hun hao ngăch n’hanh nâp nâl tâm ăp năm let năp tay, ntop rdâk njêng neh dak ueh mêr bâh he ăp nar lơ ma hun hao, têh ndrŏng, ăp nar lơ ma tâm di lơn, têh ueh lơn.

Tâm nău răm rhơn vơt năm mhe Quý Mão, du tơ̆ tay, gâp dăn njoăl nău răm rhơn tât lĕ rngôch ƀon lan, đồng chí, ăp rnăk vâl, ăp nuĭh ƀon lan Việt Nam tât năm mhe geh âk dăng săk soan, âk nău răm rhơn, hơm răm n’hanh geh nău dơi lơn.        

Rhơn năm mhe, đah nău nsrôih mhe, nău dơi kan mhe, nău gĭt blău mhe, âk nău dơi mhe! Ăp rnăk ăp jay hơm răm, ăp nuĭh ăp ntŭk đăp mpăn!

Dăn mbah rhơn lĕ rngôch!