Tât tâm ntŭk pah kan bah n’gor Dak Lak tâm nar pah kan bôk năp jêh rlu sa tết năm mhe Quý Mão, nô Trần Tuấn Song, tâm xã Cư Êbur, nkuăl ƀon têh Buôn Ma Thuột rhơn yor ăp nau kan geh ƀư ngăch, rnôk nô geh plŏ sŏk săm ƀŭt jêh tă nkra gay ma hăn plŏ tay nkuăl ƀon têh Hồ Chí Minh pah kan:

            ‘Aơ lah nar pah kan bôk năp jêh nar rlu tết, gâp tât ƀư săm ƀŭt lý lịch tư pháp. Gâp saơ nau gơih pah kan bah cán bộ viên chức ueh ngăn đah ƀon lan, ƀư jêh nau kan ngăch đŏng”.

            Tâm nar pah kan bôk năp jêh rnôk rlu tết năm mhe, rnoh nŭih tât pah kan tâm Trung tâm Hành chính công n’gor Dak Lak mô lăng âk. Yơn lah, ăp cán bộ, công chức, viên chức hŏ plŏ tay pah kan đah nau gơih, n’ơr, mra ƀư kơl an ueh ngăn nau ŭch bah ƀon lan.  Wa Đinh Thị Hương, Chuyên viên Bảo hiểm xã hội n’gor, nkoch:

            ‘Dĭng lĕ oh nô bah Trung tâm hành chính công n’gor Dak Lak pah kan ueh tŏng ndrel tâm di mông, đah nuih n’hâm gơih ngăn. Ăp oh nô tâm ntŭk kan ndrel ntŭk ƀư nau kan bảo hiểm xã hội đah nuih n’hâm kơl an bôk năp ân ăp nŭih ueh răm, rnôk hăn sĭt ri bu kŏ tâm di nuih đah ntŭk kan hên”.

            Tâm rkŭm công nghiệp Tân An, nkuăl ƀon têh Buôn Ma Thuột, công ty cổ phần Ban mê Green Farm ƀư nau hăn kan, ê nkra sầu riêng, mrăch gay ma leo tăch luh dak ba dih bôk năp bah năm mhe tât Trung Quốc, Nhật Bản. Wa Nguyễn Thái Thanh, Giám đốc Công ty cổ phần Ban Mê Green Farm mbơh, tâm lôch nar rlu tết mhe rlau, ăp nau kan tăch rgâl, tâm nthoi ma năch dak ba dih hôm geh mât ueh. Rnơm nê, công ty mro geh dơi ăp nŭih ŭch rvăt mhe ndrel ntơm hăn kan bôk năm đah ăp nau gơih n’ơr:

            ‘Rnôk aơ, rnoh ntŭk bu ŭch rvăt` ndơ hŏ geh âk ngăn tâm năm 2023, hao rlau 3 tŏ rđil năm 2022, đah ăp ntil ndơ kơt sầu riêng, bơ, mrăch ndrel chanh rse. Gay tŏng dơi geh ndoh ndơ leo tăch ri hên ntơm nkra ntơm bah lơ 6 đah ndơ bôk năp lah sầu riêng ndrel mrăch”.

            Tâm ntŭk tuch tăm, mir ba, tâm ăp nar bôk năm, nŭih ƀon lan Dak Lak hŏ plŏ ma nau kan kơt mât chăm tơm tăm, mpa rong jêh ăp nar sa tết năm mhe. Ăp nŭih kŏ mpŏng geh nau dơi ngăn tâm ăp nar bôk năm mhe, yan tuch tăm geh âk, rnoh tăch tâm ban ndrel hao khlay. Nô Phan Quốc Tế, tâm xã Ea Kpam, nkuăl Cư M’gar, n’gor Dak Lak, ngơi:

‘Tĭng kơt nŭih tăm cà phê ri bôk năp kŏ lah bôk yan vai, ndri ma ân geh uănh rjăp kao păng hŏ luh tâm ban jêh gay ma nơm tŏ dak, koh n’ging jêh rnôk klih, tŏ dak nchrăp ân bôk yan mhe. Nau ma nŭih ƀon lan bu ŭch ngăn lah mih nar tâm ban tâm di, rnoh geh tăch khlay, ăp năm êp aơ rnoh thuk ngăn ri ma ƀon lan kŏ mâp nau jêr”.

            Tâm ban ma nê, ăp nkuăl mpeh Tây Bắc kŏ ƀư âk nau kan ntơm leo kan bôk năm mhe tâm nau khuh n’gor, rhơn răm, nsôih geh du năm geh âk nau dơi lơn. Yuh Cà Thị Lê tâm ƀon Giảng Lắc, Phường Quyết Thắng, nkual ƀon têh Sơn La, mbơh: Nar bôk năp aơ, ăp nŭih tâm rnăk vâl ndrel ƀư nau rôk jăm tỏi, đah nau ŭch du năm geh mih lăng, prăng tâm di, ăp nau kan ueh lăng, ngăn lah geh tăch ndơ âk lơn gay ma n’hao nau geh ân rnăk vâl:

            ‘Ntơm hăn kan bôk năm aơ ri rnăk hên ŭch lah mra geh âk lơn ndơ nơm tuch tăm, mih lăng prăng ueh, geh rnoh tăch khlay geh prăk ân rnăk nơm hơm răm”.

            Tâm rnôk nê ta Công ty Cổ phần nkra sĭk tao Sơn La, nar bôk năm mhe bah năm, nau pah kan, jan sa geh ƀư ueh ngăn tâm lam nkualư tăm tao bah Ngih máy ndrel ăp ntŭk ê nkra. Tĭng nau nchrăp, yan 2022-2023, công ty nsôih pơk hvi ntŭk tăm tao hao 9.500 ha, rnoh geh tao rlau 600 rbăn tấn, geh nkra 70 rbăn tấn sĭk. Wa Bùi Minh Tuấn, cán bộ công ty nkra tao Sơn La mbơh: Ntơm lơ 3 tết, nô ndrel ăp cán bộ ƀư nau kan bah ntŭk tăm tao bah công ty hăn nkoch mbơh, bonh đă ăp rnăk ntơm sreh tao kơt nau nchrăp gay tŏng 5000 tấn tao ân ngih máy nkret tâm du nar, kơl an ăp nau kan ntơm bah lơ 4 tết:

            ‘Gay đăp mpăn ân nau nchrăp nkret bah ngih máy, gâp tât nkoch mbơh ân kônh wa hăn sreh tơm tao tŏng khay, tŏng jâk ndrel nkoch mbơh ân oh nô ƀĭt ndeh ri rdeng ân tâm di rnoh jâk, tâm di nau ntrŭnh bah pháp luật”.

            Hôm tâm ăp n’gor Lào Cai, Yên Bái ƀư nau rgŏ jă “Tết tăm tơm si mro mrăng nkah gĭt Wa Hồ” ndrel ăp nau kan tăm tơm si lŏ geh ƀư tay tĭng bôk nau kan “Tăm du rmen tơm si lvang năm 2021-2025” yor Thủ tướng Chính phủ rgŏ jă kŏ kơt lah ntrŭnh ƀư tâm ăp nkual bah 2 n’gor./.