Công ty TNHH tăm bri 27/7 dơi UBND n'gor Dak Lak an manh rlău 783 ha bri ta xã Ea Bung, nkuâl Ea Súp gay tĭng ƀư rgâl uĕh jêng, mât njrăng n'hanh tăm âk bri, yơn hŏ lơh n'hang hang rhiăng ha bri gay tăm keo lai

Ta tiểu khu 251, xã Ea Bung, nkuâl Ea Súp, meng trong Quốc lộ 14C, kâng n'har đah bri Yok Đôn, âk tơm si têh geh trong rvoal 10 – 40 cm, prêh 3 – 4 mét hŏ geh rôk rlơt n'gu, rgum mbŭch. Ta neh bri geh lơh n'hang, bar pe jât ha hŏ tăm tơm keo lai tâm rlŭ đah mbo. Wa Nguyễn Thanh Hồng, gŭ ta xã Ea Bung, nkuâl Ea Súp, du hê nuĭh râng tâm rgop tĭng ƀư trong nchrăp kan an  gĭt, bri geh lơh n'hang mpeh tiểu khu 251, tă bah wa Trịnh Thị Hương, aƀaơ lah Giám đốc Công ty tăm bri 27/7 mât. Lĕ rngôch rnoh bri geh lơh n'hang nklăp 100 ha. Wa Nguyễn Thanh Hồng lah:  

       “Khay 7 năm 2021 wa Hương an nuĭh n'hanh ndeh rklư nuĭh kuaih rlău 40 ha bri, hôm tât khay 5/2022 ri păng hôm nhuĭh tay hôm 60 ha đŏng. Lĕ rngôch lơh 2 năm mhe aơ lah 100 ha. Mhe aơ mpôl hăn ôp uănh tâm rgop âk n'gâng kan lăp ôp uănh, yơn mô hŏ saơ plơng ơh an ăp nuĭh tâm công ty mpôl hên.”

       Trong nchrăp rgâl uĕh jêng n'hanh tăm hvi tay neh bri dơi UBND n'gor Dak Lak ŭch dơn an Công ty TNHH tăm bri 27/7 tĭng ƀư  ma trong n'glêh an mbrô 2959, tâm khay 11 năm 2010. Lĕ rngôch rnoh neh  bri tĭng ƀư trong nchrăp kan lah 783,4 ha, ta tiểu khu 251, xã Ea Bung, nkuâl Ea Súp. Nău ŭch bah trong nchrăp kan lah tăm rơ̆ jêng bri n'hanh nkre đah tăm si gle. Nuĭh ntơh măt tĭng pháp luật n'hanh ƀư giám đốc công ty bôk năp lah wa Nguyễn Văn Quê, gŭ ta n'gor Tây Ninh n'hanh tât năm 2017 ri rgâl, tăch an wa Trịnh Thị Hương, gŭ ta n'gor Đồng Nai. 

         Tĭng wa Nguyễn Ngọc Luật – Groi kruanh UBND xã Ea Bung, tâm bah ri aơ nơh nhih pah kan dơi kan dơn geh nău lah bah nuĭh ƀon lan n'hanh du đêt nuĭh kan tâm Công ty TNHH tăm bri 27/7 geh ƀư âk nău tih. Xã hŏ kan nsum đah Hạt kiểm lâm nkuâl Ea Súp ndrel du đêt jrô kan rnâng kan bah nkuâl njêng mpôl hăn ôp uănh. Lôch jêh hăn ôp uănh, mpôl hăn ban saơ nău mât njrăng bri, tăm bri, tăm si tăch nkre bah doanh nghiệp dja mô hŏ tĭng du trong nchrăp kan dơi UBND n'gor Dak Lak uănh an dŏng. Lơn lah, hŏ geh rlău 326/783 ha bri geh hŭch hêng, tăm bar pe jât ha bri tâm rdăp mbâl tâm bri krŏng; nău mbơh nău ngăn geh bri mô tâm trŭp đah nău mbơh ngăn geh bri bah Hạt kiểm lâm nkuâl Ea Súp.

       "Kêng dŭt khay 9 mhe aơ, xã hŏ kan nsum đah Hạt kiểm lâm nkuâl Ea Súp ƀư hăn ôp uănh. Lôch hăn ôp uănh, rnoh hvi neh nhuĭh gŭ tâm trôm dăp rgum hun hao bri jŏ jong, n'hanh doanh nghiệp khân păng hŏ tăm bơi 62 ha keo lai ta nê hôm. Tĭng nău dơn kan, khân păng mô dơi tăm bri ta nê. Let năp tay, xã mbra dăn đă tay ăp nhih pah kan dơi kan geh nău rnâng kan n'hanh nău dơi kan gay nkra nkô̆ nău dja".

         Wa Nguyễn Như Hoàng – Hạt trưởng hạt kiểm lâm nkuâl Ea Súp nkoch, ta trong nchrăp rgâl uĕh jêng bri, mât njrăng n'hanh hun hao bri bah Công ty TNHH tăm bri 27/7 ta xã Ea Bung, mô dơn tih mpeh mât njrăng bri, rôk nhuĭh, rdâk njêng, lơh n'hang bri mô geh nău way tăm tơm tuch tăm, ma hôm geh lĕ ma nău tih geh tât tăch rgâl neh bri đŏng. Ăp nău tih dja lah jru hô, yơn lah nău dơn kan nkra mpeh gưl bah lơ jêng hạt hŏ geh siƀŭt njuăl dăn đă gay rmal ăp nuĭh geh tât. Wa Nguyễn Như Hoàng lah:

        “Hạt kiểm lâm nkuâl hŏ dăn đă Chi Cục kiểm lâm n'gor Dak Lak đă Công ty TNHH tăm bri 27/7 ân rblang n'hanh ƀư kloh nkô̆ nău bri geh hŭch âk rlău 326 ha bri n'hanh nău mƀơk lhoi mât njrăng bri; ƀư hăn ôp uănh lam lĕ rngôch trong nchrăp kan gay ƀư kloh nău dơn kan, nău khlay kan bah Ban giám đốc lĕ ma ơm n'hanh mhe tâm ban kơt ăp nuĭh geh tât đŏng. Dăn đă UBND nkuâl đă công an nkuâl Ea Súp dơn siƀŭt nău tih na nê̆ gay nkra lhăt tĭng quy định bah pháp luật.”

        Ta nkuâl Ea Súp, n'gor Dak Lak geh 26 trong nchrăp kan jao bri, an manh bri, rlong ƀư tuch tăm nkre đah tăm si gle, lĕ rngôch rnoh hvi bơi 20.000 ha. Yơn lah, rlău 10 năm an ƀư, âk trong nchrăp kan mô nsĭt geh nău dơi, an lơn ma hô geh nău  lơh n'hang bri, pit in neh bri. Tâm nê geh lĕ ma nău nđơn tăch trong nchrăp kan, muĭh kăl gay tăm tuh mbo, bum biăp, tơm jong nar, mô dơn nê hôm tâm pă blah, tăch neh./.

Tuấn Long/Nuĭh rblang: Điểu Thân