Ta nău nteh n’gŭr răm, ŭnh ang n’hanh lĕ rngôch sân khấu dơi ƀư đah rup gui ăp ndơ cà phê uĕh kah nkual ƀon têh yôk Pleiku, ăp nuĭh kan bah Công ty TNHH BaKa (Pleiku, Gia Lai) nkoch mbơh ndơ. Wa Nguyễn Thị Thanh, Groi Giám đốc công ty, an gĭt, nău ƀư aơ lĕ ƀư ăp nar tâm lôch bơi 2 năm aơ. Aơ lah njoat hăn kơl doanh nghiệp nkoch n’hanh ndơ̆ ndơ kah Gia Lai tât ty nuĭh dŏng ta lam dak. Knŭng đêt năm, ndrơng ndơ bah doanh nghiệp lĕ wăch rgum hang rbăn nuĭh uănh nđôi, dơi uănh lah rlău 4,2 sao. Wa Nguyễn Thị Thanh an gĭt, ndrel đah pơk hvi ntŭk tăch, doanh nghiệp uănh mĭn trong nkra njêng, n’hao uĕh kah ndơ, rgâl dŭng ntô n’hanh uănh khlay nău rhŏ an.

Ăp măng, mpôl hên geh 2 băl livestream bah 7 tât 10 mông măng. Ăp rơh line dơi nchrăp uĕh mpeh ŭnh ang, micro, nău nchrăp lor. Ntŭk tăch điện tử saơ he ƀư nău gơih, khân pơng ntop kơl đah voucher an dơm rdêng ndơ tât năch rwăt ăp nar rnôk dôl live. Aƀaơ, ăp ndrơng ndơ bah BaKa ta ntŭk tăch điện tử uănh lah bah 4,5 tât 4,9 sao. Mpôl hên nsing nơm ƀư nău kan rjăp mbra dơi geh săk rnglăy uĕh.

Ndrel đah cà phê, aƀaơ dŭt âk ndơ uĕh kah bah Gia Lai kơt dak sŭt, tiêu, grăp điều lĕ hao ntŭk tăch điện tử, đah rnoh geh hao rlău 8% du năm. Tâm bôk nău kan rgâl mrô, Gia Lai lĕ ntop kơl doanh nghiệp ndâk ƀư 255 website tăch rgâl điện tử gay moh săk ndơ, joi tu tơm n’hanh tăch tĭng tâm trong mrô. Rlău ma nĕ, rlău 90 tài khoản tăch ndơ trực tuyến lĕ dơi ndâk ƀư an 30 doanh nghiệp nsing nơm. Wa Phan Thanh Thiên, Groi Kruanh Hội Doanh nhân mom Gia Lai, mbơh:

Aơ lah trong tăch ndơ uĕh an n’gor n’hanh nkual Tây Nguyên. Rmôt kan mbra kơl nuĭh kan ta Gia Lai du khay jă ăp KOL, KOC, tiktoker gay tăch ndơ, ntop kơl doanh nghiệp ntrôl dăng geh prăk.

Ăp năm bah năp, nău kan công thương Gia Lai lĕ ƀư âk rƀŭn nchră, tiăr nti gay n’hao nău wât n’hanh nău blău an ăp doanh nghiệp, hợp tác xã n’hanh nuĭh ƀon lan tâm nău kơt dŏng tăch rgâl điện tử. Mhe aơ, N’gâng kan Công thương Gia Lai tâm rgop đah Hiệp hội Doanh nhân mom Gia Lai n’hanh ntŭk tăch điện tử 2 rơh tăch ndơ megalive (rơh tăch ndơ ndơ trực tuyến têh). Dôl uănh, ta ăp rơh aơ, Giám đốc n’gâng kan Công thương lĕ na nê̆ lăp đah nuĭh rwăt ndrel ntoh măt ntô lĭr ndơ. Săk rnglăy, geh 12.700 sam ƀŭt rwăt ndơ lĕ dơi tăch đah dĭng lĕ khlay geh 1,8 rmen prăk. Bôl ndrĭ, tĭng wa Phạm Văn Binh, Giám đốc N’gâng kan Công thương Gia Lai, tăch rgâl điện tử ta n’gor tâm lvang bôk năp. Aƀaơ mơ geh 40% tâm dĭng lĕ 5.000 doanh nghiệp ta n’gor geh website tăch điện tử. Yơn săk rnglăy ăp rơh tăch ndơ trực tuyến mhe rlău an saơ, ndơ lŏ mir Gia Lai dơi geh nsĭt tay prăk âk ta ăp ntŭk tăch điện tử:

2 rơh livestream mhe rlău an saơ nău uănh tât dŭt têh bah năch. Nău aơ an saơ nău tăch điện tử, bôl hôm e mhe, hôm e dơi geh têh ta Gia Lai. Mpôl hên mbra tâm rgop đah Tiktok n’hanh Shope gay ndâk ƀư ăp nar tăch ndơ, pơh lễ tăch ndơ megalive tĭng bôk nău  êng mpeh ndơ lŏ mir kah Gia Lai. Aƀaơ, N’gâng kan Công thương dôl dăn đă n’hanh N’gâng kan Công thương ndâk ƀư ntŭk ntop kơl tăch rgâl điện tử, jêng ntŭk boăt nthoi doanh nghiệp ta Gia Lai.

Tăch rgâl điện tử dôl jêng ntung nthoi khlay, ndơ̆ ndơ lŏ mir Gia Lai hao ngai bah ntŭk tăch tâm n’gor tât tăch n’gluh lam ntŭr neh. Knơm nău ngăch n’hanh dŏng nău geh bah tăch rgâl điện tử n’hanh rlơ̆ tay, ăp nău ơh bah năch rgop kơl doanh nghiệp n’hanh nuĭh ƀon lan nar lơ âk lơn an ndơ bah nơm. Aơ lah ntơm bôk năp ntrôl nău ŭch hao an du trong lŏ mir mhe n’hanh nâp nâl ta n’gor./.