Rnăl wâl wa Nông Minh Thước ta thôn Đức An, xă Thuận An, nkuăl Dak Mil, n’gor Dak Nông geh 2ha tăm cà phê, năm aơ nchrăp nsĭt geh rlău 800 rkeh prăk. Âk năm bah năp wa râng nkra njêng cà phê uĕh kah đah hợp tác xã, rnoh khlay âk mro ntŭk tăch bah 500-700 prăk/kg. Gay geh rnoh khlay uĕh, wa Nông Minh Thước an nkra njêng cà phê tĭng rjăp ăp rnoh tâm di uĕh kah, cà phê knŭng dơi pĕ rnôk dŭm 90% let lơ.

Aƀaơ ƀư cà phê an dŭm lah khlay ngăn. Hôm pĕ lĭt bôk năp lah mô tŏng uĕh kah, tăl 2 rnoh geh ndơ hŭch. Ƀon lan he aƀaơ tĭng OCOP ri rnoh an dŭm gay tăch geh khlay âk lơn.

Ndrel đah wa Thước, lĕ 114 nuĭh Hợp tác xã Công Bằng Thuận An, nkuăl Dak Mil, ƀư tĭng nkra njêng cà phê kloh, cà phê kah. Ndơ cà phê môi bah hợp tác xã lĕ dơi UBND n’gor Dak Nông kơp dơn tâm di OCOP 4 sao. Cà phê Thuận An lĕ tăch n’gluh hăn ăp ntŭk rwăt đă uĕh kah âk kơt Nhật Bản n’hanh du đêt dak châu Âu. Nô Nguyễn Quốc Vương, mât uănh bah hợp tác xã an gĭt.  

Hợp tác xã uănh khlay tât nău cà phê gŭ ta nkual kơp dơn OCOP, dơi kơp dơn lah ntŭk mô phah ntŭk ntô gŭ âm. Bah ntĭm kỹ thuật mât chăm tơm tăm an tât ăp ntil ri hợp tác xã lĕ tiăr an ăp nuĭh hôm, jêng nkual tăm mbra ƀư uĕh. Tâm rnôk pĕ ri uănh khlay cà phê dŭm, rnoh dŭm âk.

Ta nkual cà phê têh bah n’gor Dak Nông, bah du ƀon lan kan lŏ mir, wa Trương Thị Thanh Lam, ta thôn Kẻ Đọng, xă Đức Minh, nkuăl Dak Mil lĕ jêng ndâk njêng ndơ moh êng cà phê wâr kĭn. Râng bôk nău kan du xă du ndơ, rnăk wâl wa dơn geh ntop kơl bah ăp gưl, ăp nău kan tâm nău ndâk njêng moh êng ndơ, ƀư rup gui, dŭng ntô, joi tu tơm. Ăp ndơ cà phê môi, cà phê rlăi bah rnăk wâl mhe dơi kơp dơn n’hao tâm di OCOP bah 3 hao 4 sao.

Rnôk he 2 sao hao 4 sao lah geh nsing nơm hôm yơn mô di yor nĕ ma gâp rlu tay. 6 jay tăm cà phê an mpôl hên lah đah rnăk wâl n’hao rnoh dŭm 100% gay hao uĕh kah. Ntĭt nsa rnoh khlay ntŭk tăch aƀaơ khân pơng rwăt 23.000 prăk/kg ri gâp rwăt âk lơn 8.000 rnăn/kg.

Aƀaơ, âk ndơ lŏ mir bah nkuăl Dak Mil, n’gor Dak Nông lĕ jêng geh trong tâm rgop nkra njêng, ndâk ƀư geh ndơ moh êng n’hanh n’hao khlay rnôk râng bôk nău kan du xă du ndơ. Nô Phan Gia Long, ta xă Đức Minh, janh rdâk njêng nău kan đah nău mĭn nkra njêng ăp ndơ bah prit lĭt. Ăp ndơ kơt rnih prit lĭt, grăp rnih prit lĭt dak sŭt, miến kro prit lĭt... mbrơi mbrơi dơi ntŭk rwăt wơt dơn n’hanh mhe dơi kơp dơn tâm di OCOP 3 sao. Nô Phan Gia Long an gĭt.

Rgum ăp nkô̆ nău ri gưl điểm chấm OCOP dŭt tâm di yor tĭng rnoh an nĕ ri gâp mơ mĭn lah trong hăn bah gâp, trong ƀư rjăp bah gâp lĕ rngôch di. Nĕ lah du ntŭk pâl di an ăp nuĭh pah kan rjăp. Lơ ƀư lơ saơ he hăn di trong n’hanh ntŭk pâl OCOP aơ di nkô̆ nău an uĕh.

Wa Nguyễn Văn Tuấn, Kruanh jrô kan Tuch tăm mât rong n’hanh hun hao ƀon lan nkuăl Dak Mil, n’gor Dak Nông an gĭt, jêh 6 năm mbơh ƀư bôk nău kan du xă du ntil ndơ, tât aƀaơ nkuăl lĕ geh 19 ndơ dơi kơp dơn OCOP 4 sao n’hanh 3 sao. Ăp ndơ rgop khlay mpla nsơ, n’hao nău geh an nuĭh ƀon lan, nkre rgop mkra nău kan ta ntŭk.

Tâm rnôk ƀư tĭng ri nuĭh ƀon lan dŭt ngăch n’hanh gơih prăl lĕ hăn mĭn joi, nti, kơt râng ăp rgum mpla tăch, tâm rgop đah ăp ntŭk kan êng, jêh nĕ ndơ̆ hăn ntŭk tăch điện tử gay n’hao prêh, gay mpla nsơ rup gui, ndơ moh êng bah ndơ lŏ mir Dak Mil.

Bôk nău kan du xă du ndơ ta nkuăl Dak Mil, n’gor Dak Nông lĕ an saơ săk rnglăy ngăn ngên hun hao n’hâm soan ta ntŭk, n’hao rnoh khlay wăng sa ta nkual ƀon lan. Mât uĕh ăp ndơ geh bah ƀon lan, jêng trong tâm rgop nkra njêng tĭng tâm di uĕh kah, ndâk njêng moh êng ndơ, ndơ lŏ mir Dak Mil lah êng, n’gor Dak Nông lah nsum doll ntơm dơi n’hao hao prêh lăp dak lêng têh./.